Read Weh 1 Kɔrint 7 Bible Online

1 Kɔrint 7 - Weh bible

1 Kɔrint 7

¹N ləghə ni ghɔɔmə bə nya kuum ghəə ghey ghaa â tɔ̀ɔ bəb bənə bòʼ ney zə iwû, “Ow, à loʼnu ghə i dzuŋu zə tə̀ weynum ni doʼo nə̀ tə ka nyəŋi ghi weyzən.”

²Nghee ghəə a laŋŋə a ngii kəmənə n fəŋŋə kə ghaa, kay weynum khə ni ney ndòw wey wi, kay weyzən khə ni ney ndow soʼo num wi.

³Weynum khə ni nyəŋi ndòw ghi wey wi, weyzən i nyəŋi ndòw soʼo ghi num wi, tə̀ a loʼ num ghi wey.

⁴I loʼ sey, n təŋkey, weyzən khə dzə way daʼa kə n wû u wi, à kee loʼ num tə khə daʼa kə tii kə. À loʼ soʼo ighələ ghi weynum tə khə way daʼa kə n kow wû u wi, à loʼ wey tə kee khənə daʼa kə tii kə.

⁵Kə̂ ghaa nə̂ tuu ni nyəŋi n wû i ghaa tə a loʼ num ghi wey, a may kə nə̀ ghaa saalə tsunu ni doʼo n tɔŋɔ fə inəŋə nə̀ ghaa nyəŋi way, sey nə̀, ghaa loʼ ni fuu nyi may ndòw wû i ghaa nə igɔŋŋə. Abə ghaa gɔŋŋə may tsunə, ghaa n kəm kaʼ dzəŋŋə i ndow ni ghəŋə nə̀ kə Satan nə keelinə buʼ kə ni mɔm koʼ ghaa nghee i loʼ nə̀ ghaa way ni doʼo nə̀ ghaa nyəŋi dzəŋi way.

⁶N ghəə ghən maŋa dza nə̀ ghaa zowkeeli tsu, n tsəʼlə dzə way laŋ kə loʼ kə.

⁷Abə ghə̂ adzəm a mə loʼ ni doʼo tə n loʼnə, tə̂ n mə ləghə. À kee loʼnə i way ni doʼo sey, n təŋkey, kay wù khə kə naamə kə wi key Zə̀ kə â fuunə tə̀ wi. Wù wən n khə naamə kə kən, u loʼ wey n khə naamə kə nuu kə.

⁸Tə̀ ghə̂ ghən ghə ka kam ney iwû nsə ghey a kpusə ghə, n dza bə tə̀ ghaa nə̀, i dzɔbənu nə̀ ghaa doʼo ndow kə nə̀ ghaa ka wû i ney, tə̀ n loʼnə.

⁹Abə i kee tawnə tə̀ ghaa ni kwu keeli wû i ghaa, ghaa n baa ney ndòw num nkee wey. Tə̀ ghaa ni zhɔdlɔ kaabə, i baa dzɔbə nə̀ ghaa ney ndow iwû.

¹⁰Abə tə̀ ghə̂ ghey ghə neynə wû zə, n fuu bə kəlaŋ tə̀ ghaa, à way dzə laŋ kuŋ, à loʼ laŋ kə Mûkəbii, nə̀ abə a tsəmə shiə kə kee, weyzən khə way ni sam shi num wi.

¹¹Abə weyzən ə tii sam shinə, tə khə way ni kəm ney num u nuu wə, nə̀ a way sey, tə n ndow bayyə dzəŋŋə tsu imuu ghi num wi. Weynum khə soʼo way ni dzum shi wey wi.

¹²Tə ghə̂ a loʼ ghən, n kee fuu bə ghaa n laŋ kə nə̀ à way dzə laŋ kə Mûkəbii nə̀, abə dzûmə Klisto u loʼ u khənə wey nə̀ tə ka bəghəm tə Zə̀ kə, nə̀ tə kee ləghənu ni muu ghi wi, tə khə way ni dzum shi weyzən ə tii.

¹³Abə weyzən wən tə loʼnə dzûmə Klisto khənə num nə̀ tə ka bəghəm tə Zə̀ kə, num tii kee ləghənə ni muu ghi wi, kə weyzən ə tii nə sam shiənə weynum ə tii.

¹⁴N sa dza təŋkey, weynum wey tə way dzûmə Klisto, Zə̀ kə bəghəm naŋŋənu wi n təŋkey tə ney weyzən wey tə loʼnə dzûmə Klisto. Weyzən wey tə way dzûmə Klisto, Zə̀ kə bəghəm naŋŋə soʼonu wi n təŋkey tə ney weynum wey tə loʼnə dzûmə Klisto. Abə a mə way sey, tə Zə̀ kə mə way ni bəghəm naŋa waa a ghaa. Isəŋə kee loʼ nə̀ Zə̀ kə n bəghəm naŋa waa a ghaa ghə.

¹⁵A kee loʼ nə, abə wù wey tə ka bəghəm tə̀ Zə̀ kə ləghənə ni zəghə maʼa ney zə iwû i tii zə, kə wə nə tuunə. Nə̀ tə zəghənu, wɔ wən wə loʼnə dzûmə Klisto, wə kəm khə way ghə i loʼ zə ni ghəŋə n ney zə iwû i tii zə, n təŋkey, Zə̀ kə ləghə nə̀ ghaa i muu nə ibuulə.

¹⁶Wɔ weyzən wən wə loʼnə dzûmə Klisto, wə khə way nə̀ a loʼ ni loʼ wɔ ni bəghəshi num wə ə? Nkee wɔ weynum wən wə loʼnə dzûmə Klisto, wə khə way nə̀ a loʼ ni loʼ wɔ ni bəghəshi wey wə ə?

¹⁷I loʼ kə nə̀, kay wù khə ni muu kə tə̀ a loʼ dzûmə Klisto n jii i ghaa zə Mûkəbii naŋanə wi tii, tɔŋŋə jìi zey tə â buʼ loʼnə tii n nəŋə zey Zə̀ kə â tɔŋɔnə wi. À wən loʼ laŋ key n fuunə tə̀ dzəŋi u dzûmə tə Klisto wə udzəm.

¹⁸Abə wù loʼnə nə̀ ghə mâ səghə tsəghə tyi kə wi kə tə̀ wi ni bə bəghəm tə̀ Zə̀ kə, tə khə way ni dəm ni kweyyə. Nə̀ wù kee loʼ nə̀ tə bəghəm tə̀ Zə̀ kə nə̀ ghə ka kam səghə tyi kə wi kə, tə khə way ni dəm nə̀ ghə səghə tyi kə wi nya.

¹⁹I loʼ sey n təŋkey, abə wə səghənə tyi kə kə̀ mɔ wə ka səghə, Zə̀ kə ney way n taŋ. Ghəə zey Zə̀ kə baa neynə n taŋ loʼ nə̀ wə i naŋŋə laŋ u wi wə.

²⁰Sey, kay wù khə kə ni bɔɔmə doʼo n jìi zey tə â bùʼ loʼnə tii tə̀ wi ni bə bəghəm tə Zə̀ kə.

²¹Abə Zə̀ kə â tɔŋɔ kənə wɔ nə̀ wə loʼ tsə kəkɔd, kə wə nə fəmmənə wû wə tii. Abə wə kee keelinə buʼ kə ni doʼo n ngəŋ zə, ney tən kɔʼ buʼ kə tii kə.

²²I loʼ sey n təŋkey, wù wey tə â bəghəmnə tə̀ Mûkəbii wi nə̀ tə loʼ kəkɔd, nya loʼ wù ngəŋ tə̀ Mûkəbii. Wù wey tə â kee bəghəmnə tə̀ Zə̀ kə nə̀ tə loʼ n ngəŋ, nya kee loʼ kəkɔd tə̀ Klisto.

²³Keeli tsu na nə̀ Zə̀ kə â zuu nuu shi bə tow u ghaa n wən i taw zə, sey, kə wù ghaa u loʼ u nə̂ kəm bəghəm ni doʼo kəkɔd tə̀ wù sɔŋtsuʼ.

²⁴Sey, waazə ghə, kay wù khə ni bɔɔmə doʼo kə n jìi zey tə â buʼ loʼnə tii tə̀ wi ni bə bəghəm tə Zə̀ kə. Ghaa khə ni doʼo kə nə kəfə kəmɔʼ ghi Zə̀ kə.

²⁵N ghəə ghən ghaa a tɔ̀ɔ bəb bənə kuum ghə̂ ghən ghə ka kam ney iwû, n khə way laŋ kə loʼ kə Mûkəbii fuu bənə. Nghee Mûkəbii kwɔɔlənə sî zə n kow mə, ghəŋə nə̀ ghə̂ a loʼ ni gaʼ fə̀ŋ n kow mə, n kee fuu bənu saalə kuŋ kə.

²⁶N jìi zey ghəə a loʼnə nya, n moʼlə nə̀ i dzɔbənu nə̀ ghə̂ a bɔɔmə doʼo kə n jìi zey ghə loʼnə tii.

²⁷Weynum wey tə loʼ nə̀ tə n ney wey, kə tə nə̂ dzawwənə wû wə ghi wi. Nə̀ wə khə way wey, kə wə nə̀ kəŋənə wey.

²⁸Nə wə kee ney ndòw wey, wə ka ghəŋə bəəbə dzə, waa u zən wey tə ney ndownə num, tə ka ghəŋə bəəbə soʼo. Isəŋə kee loʼ nə̀ ghə̂ ghey ghə neynə wû zə i keeli ndəmə nchɔd n muu i ghə, à wey loʼ i ghii n dəmənə ni ghəŋə nə̀ kə ghaa nə nyiənə n chɔd mən.

²⁹Waazə ghə, ghəə zey n dzanə loʼ nə̀, nəŋə i Mûkəbii ni bə dzəŋŋə n shɔd. Sey, ni zey tsu nya ndòw n sə kə, gheynum ghey ghə khənə ghey ghə khə ni muu tə̀ a loʼ ghə̂ ghey ghə khə way ghey ghə,

³⁰a ghey ghə mownə, ghə i muu tə̀ ghə mow way, a ghey ghə duʼlənə, ghə i loʼ tə̀ ghə duʼlə way, a ghey ghə zûnə fə̂ wə, ghə i muu tə̀ à way ghə, ghə khənə fə u tii wə.

³¹Abə a ghey ghə fwaʼanə n fə̂ u mbi, kə ghə nə ngii fuu nyiə ndownə wû i ghə zə tii n təŋkey mbi zən a loʼnə tii, nya tsəghə daŋŋənu.

³²N ləghə way nə̀ ghaa ngii fəmmə wû i ghaa. I loʼ nə̀ weynum wey tə khə way wey, fuu nyiə ndow wû u wi n fwaʼ kə Mûkəbii, n təŋkey tə ləghə kə ni ghəŋŋə ghəə zey Mûkəbii ləghənə.

³³Wù wey tə khənə wey, kee ndəŋə fuu nyiə ndow wû u wi n ghəə a mbi, n təŋkey tə ləghə ni ghəŋə ghəə ghey wey wi ləghənə.

³⁴I loʼ sey n təŋkey fə̀ŋ ə wi dzawwə doʼonu. A kee bə weyzən wən tə khə way num nkee weyzən wən tə ka kam nyəŋi ghi weynum, tə ndəŋə fuu nyiə ndow wû u wi n fwaʼ kə Mûkəbii sey nə̀, tə loʼ ni fuu nyi may ndow wû u wi nsə fə̀ŋ ə wi idzəm n fwaʼ kə Mûkəbii. Weyzən wey tə khənə num, ndəŋə fuu nyiə ndow wû u wi n ghəə a mbi n təŋkey tə ləghə ni ghəŋə ghəə ghey num wi ləghənə.

³⁵N ghəə ghən dza n ndzuŋ ə ghaa, a way dzə nə̀ n kədlə ghaa. N fədlə ləghə nə̀ ghaa i muu n jìi zey i loʼnə tsətsəghə, muu soʼo n jìi zey ghaa loʼ ni fuu may ndow muu i ghaa n fwaʼ kə Mûkəbii.

³⁶Abə wù koʼ tsunə nə̀ tə ghəŋŋə dzɔbə way tə̀ weyzən wey tə nyi naŋanə, way ni kwu keeli wû u wi, tə u way soʼo ni doʼo nə̀ tə ka ney wey, tə n baa ney ndow kə wey, a way dzə ghə i bəbə zə.

³⁷Wù wey tə kee tsə̀m kɔʼnə n fə̀ŋ ə wi nə̀ ghə ka wi tənnə, tə u ndzəm koʼ tsu soʼonə nə̀ tə loʼ ni kwu keeli wû u wi, nə̀ tə n naŋa n fə̀ŋ ə wi ni doʼo nə̀ tə ka ney weyzən wey tə â nyi naŋanə, tə n ghəŋə ghə i dzuŋu zə.

³⁸Sey, wù wey tə ney ndòwnə weyzən wey tə â nyi naŋanə, tə ghəŋə dzɔbnu, à kee loʼ nə̀ à ghəŋə dzɔb tsəghəshi wù wey tə doʼonə nə̀ tə ka ney wey wey tə â nyi naŋanə.

³⁹Weyzən khə ni bɔɔmə doʼo kə ghi num wi abə num nam loʼnə utaw. Nə̀ num kpuunu, tə loʼnu ni ney num u nuu wə abə tə ləghənə, abə i loʼnə nə̀ weynum ə tii bəghəm dzənu tə Mûkəbii.

⁴⁰N kee dza bə n moʼlə zuŋ nə̀ a loʼ ghə i dzuŋu zə tə̀ wi ni doʼo sey nə̀ tə ka num ney. N moʼlə nə̀ Zə̀ kə n fuu soʼo mə n Zay kə Zow kə ni mbɔŋ fuu bə tsə̀ zən.