Read Weh 1 Kɔrint 8 Bible Online

1 Kɔrint 8 - Weh bible

1 Kɔrint 8

¹Ni ghɔɔmə bə nya n ghəə ghey ghaa â bəb bənə tə̀ mə kuum fəzəə wey ghə fuunə tə a loʼ umaʼlə tə̀ muʼu mə. À loʼnu isəŋə nə̀, “Saa adzəm saa khənu ndəmə aghəə kuum ghəə ghə mmuʼu.” I loʼ nə̀ tɔb u ghəŋŋə wù tə n baa ni ghaŋŋə wû wə, a kee loʼ nə̀ ləghə i bəghə imuu.

²Wù wey tə moʼlənə nə̀ tə khənu ghəə ghə, tə kam khə dzə way ghəə ghə nghee tə mə khənə ni keeli.

³Wù wey tə kee ləghənə Zə̀ kə, Zə̀ kə khənu wi.

⁴N ghəə a zəə ghə nfəzəə mən ghə fuunə tə̀ muʼu mə, saa ndzəm khənu nə̀ muʼu n khə way daʼa kə loʼ kə fa n mbi, saa a khə soʼonə nə̀ Zə̀ kə loʼ kə kəmɔʼ.

⁵Abə i loʼ kənə nə̀ fə u loʼnu idəŋ nkee fa a ghəlitsə ghə̂ a tɔŋŋə nə̀ a loʼ “uzə̀”, tə̀ saa ndzəmə koʼo ndownə nə̀ “zə̀” u loʼ n ndəm, ghə “mûkəbii” ghə a loʼ soʼo n ndəm.

⁶A kee bə saa, saa khə kə Kəzə̀ kəmɔʼ. À loʼ Bày saa tə bɔmnə fə wə udzəm, saa fa muu bòʼ wi. I loʼ soʼo nə̀ saa khə kə Mûkəbii umɔʼ. À loʼ Yeso Klisto wən Zə̀ kə â bɔmnə fə wə udzəm fa n mbi n bam i wi, à loʼ soʼo n bam i wi saa muunə.

⁷À kee loʼ nə̀ à way dzə aghə̂ adzəm ghə khənə isəŋə zən. Ghə̂ a loʼ ghə n khəələ doʼo n ghəə ghə mmuʼu n jìi zey abə ghə zəənə fəzəə wey ghə fuunə tə a loʼ umaʼlə tə̀ muʼu mə, fə̀ŋ tə n fəmmə ghə, ghə sə loʼ nə̀ fə̀ŋ tə ghə tə ka kam tɔʼ beyyə n ghəə a Kəzə̀, ghə n moʼlə kə nə̀ ghə sey dzəələ dzə wû i ghə n sə K-a-zə̀.

⁸Isəŋə loʼ nə̀, fəzəə wey wù zə̂ənə, ghəŋŋə dzə way saa nə̀ a i loʼ tsətsəghə n sə K-a-zə̀, n təŋkey kweyyə kə loʼ kə way dzə abə wə zə̂nə nkee wə ka zə̂.

⁹Kee ney na ghə̂mə zə nə̀ kə ghəə zey ghaa moʼlə nə̀ i kpiilənu tə̀ ghaa ni ghəŋə, nə ghəŋŋə nə̀ waazu wey tə loʼ nə̀ tə ka kam tɔʼ beyyə n bəghəm i fə̀ŋ i wi nə ghəŋŋənə ghəə a bəbə ghə.

¹⁰N sey dza n təŋkey abə wù wən fə̀ŋ ə wi ka kam tɔʼ beyyə n ghəə a Kəzə̀, koʼ bənə wɔ wən wə dzanə nə̀, “Wə ngii khə aghəə”, zəənə n ndaw zey ghə fəələnə maʼlə wə tii tə̀ muʼu mə, ghaa moʼlə nə̀ tə i keeli way fə̀ŋ ni zə̂ fəzəə wey u loʼ nə̀ ghə n fuu tə a loʼ umaʼlə tə̀ muʼu mə ə?

¹¹À sey loʼ nə̀ wɔ wən wə moʼlə nə̀ wə ngii khə aghəə, n ghəŋə nə̀ dzûmə Klisto wən tə loʼ nə̀ fə̀ŋ ə wi ka kam tɔʼ beyyə n ghəə a Kəzə̀, tə nyəŋ laʼ n bəghəm i fə̀ŋ i wi, loʼ sey nə̀ Yeso kpu soʼo n tow kə wi.

¹²Abə ghaa ghəŋŋənə ghəə ghən, ghaa ghəŋŋə bəəbə tə̀ dzûmə tə Klisto tən tə loʼ nə̀ fə̀ŋ tə ghə tə ka kam tɔʼ beyyə, dii tsu nə̀ ghaa sey ghəŋŋə bəəbə soʼo tə̀ Klisto.

¹³Sey abə i loʼnə nə̀ fəzəə wən n zə̂ənə, ghəŋŋə nə̀ dzûmə Klisto u loʼ u bwu n ghəə a bəbə ghə, mə i kəm fə koʼ tsə way nyam tə̀ mbi nə bə may, sey nə̀ kə̂ n nə̂ ghəŋŋə nə̀ dzûmə Klisto u loʼ u nyi n ghəə a bəbə ghə.