Read Weh 1 Kɔrint 9 Bible Online

1 Kɔrint 9 - Weh bible

1 Kɔrint 9

¹Ghaa khənu nə̀ n way dzə n tənə wù! Ghaa khənu nə̀ n loʼ ngəd ə Klisto! Ghaa khənu nə̀ mə n koʼ Mûkəbii saa Yeso! À loʼ nə̀ ghaa məghənu nə̀ a loʼ mə n ghəŋənə nə̀ ghaa i loʼ nə kəfə kəmɔʼ ghi Mûkəbii ə?

²Abə ghə̂ a nuu a moʼlə kə nə̀ n way ngəd ə Yeso, n khənu nə̀ ghaa kee khənu nə̀ n loʼ ngəd ə Yeso, n təŋkey, nghee ghaa loʼnə nə kəfə kəmɔʼ ghi Klisto dii bənu nə̀ n loʼ ngəd.

³Tə̀ ghə̂ ghey ghə dza nə̀ n way ngəd Yeso, ghəə ghən n dzanə tə̀ ghə loʼ nə̀,

⁴ghə moʼlə nə̀ i kpiilə way tə̀ ghey ni keeli fə kə zəə kə nkee fə kə məə kə ə?

⁵Ghə moʼlə nə̀ i kpiilə soʼo way tə̀ ghey ni ney ndow weyzən wən tə bəghəmnə tə̀ Zə̀ kə n wey, ghey i bwey dzəŋi ndow ghi wi tə ngəd tə Klisto tə loʼ tey nsə waazə a Mûkəbii ghi ghə Pita ghə â ghəŋŋənə ə?

⁶Nkee ghə moʼlə nə̀ i kpii kə tə̀ mə ghi Banabas ni fwaʼ tə̀ ghey ni keeli fə kə zəə kə ə?

⁷À loʼ wù ghaa wə tə fwaʼanə tə a loʼ sawgoʼ nə̀ tə zəə kə n mbəghə kə wi ə? À loʼ ndee tə̀ zəghənə tam wə, tə n ka kɔy nəghə ə? Nkee a loʼ ndee tə nyiəllənə mbɔŋ tə, tə n way ni kammə mə̂ ghii n tii mə ə?

⁸Ghaa moʼlə nə̀ n ghəə ghən maŋa dza n daʼa kə wù sɔŋtsuʼ ə? À loʼ nə̀ laŋ kə dza way ghə i mɔʼɔ zə ə?

⁹N sey dza n təŋkey i tɔ̀ɔ doʼo n Laŋ kə Mushi nə̀, “Kə̂ wù nə̂ dzəŋŋə naŋŋənə tsaʼ n dzuu i mbɔŋ i vəllə zə n nəŋə zey i dəʼlənə kuu ghə.” À loʼ nə̀ Zə̀ kə ghəə ghən â dza nə̀ tə ghə̂mə kə tə mbɔŋ tə vəllə tə ə?

¹⁰N khənu nə̀ tə ghəə ghən â dza soʼo bòʼ saa. I loʼnu nə̀ tə ghəə ghən â tɔ̀ɔ tə saa n təŋkey ghə̂ ghey ghə vəllənə nsə ghə̂ ghey ghə bwɔdlɔnə, fwaʼa sey, khə tən n moʼlə tə ghə nə̀ ghə i dzəŋi dzawnu fəzəə wə abə wə i fən bə.

¹¹Abə i loʼ nə̀ ghey n zəghə naŋa ghəə ghə, a nuu bənə n wɔ Zay K-a-zə̀ kə n fə̀ŋ tə ghaa, à kee bəbə kee tii tə̀ ghaa ni fuu bə ghey n fə wə ə?

¹²Abə i kpiinə tə ghə̂ a loʼ ghə ni keeli igaamə n wɔ ghaa, ghaa moʼlə nə̀ i ka kpii tə̀ ghey ni mbɔŋ keeli igaamə n wɔ ghaa buʼ tsəghəshi ghə̂ a loʼ ghey ə? Ghey a ka kee dəm dzə ni teeli ney fə wey wə â kpiinə tə̀ ghey ni ney n wɔ ghaa nghee â tsəm loʼ kənə buʼ kə ghey kə ni ney. Ghey â fəd bəghəm ni fəghə n nəŋə ghey sey nə̀ kə ghey nə təʼlə maʼanə tûm i dzuŋu zən ghey naʼlənə kuum Klisto.

¹³Ghaa məghənu nə̀ ghə̂ a Kəzə̀ ghey ghə fwaʼanə n Ndaw Kəzə̀ i nii zə, zəə fəzəə wey u nuu bənə n dzəŋi kə dzûmə tə Klisto ə? Ghaa məghə soʼonu nə̀ wù wey tə fwaʼanə n tsə zey ghə fəələnə maʼlə wə tii zəə n fə wey ghə̂ a bə fəələnə maʼlə wə tii ə?

¹⁴À loʼ soʼo ighələ, Mûkəbii dzanə nə̀ ghə̂ ghey ghə naʼlə tûm i dzuŋu zə, khə ni zəə soʼo n bam i tûm i dzuŋu zən ghə naʼlənə.

¹⁵Mə â ka kee dəm dzə ni teeli ney fə wən wə â kpiinə tə̀ mə ni ney. N ghəə ghən tɔ̀ɔ bə dzə way nə̀ n moʼlə nə̀ ghaa i ghəŋŋə bə ghəə ghən tə̀ mə. Tə mə ni bəghəm nə̀ wù loʼ bə buu naŋa mə nə̀ n ka tsɔb fə̀ŋ n fə key n teynə tii, n baa kpu kə tii.

¹⁶I loʼ nə̀, n khə way ni tsɔbə fə̀ŋ abə n naʼlənə tûm i dzuŋu zə n təŋkey n khə ni naʼa tûm i tii zə. Mə i keeli ngoʼ abə n ka naʼa tûm i dzuŋu zən.

¹⁷Abə à mə loʼ nə̀ a tsə̀m kɔʼ mə ni naʼlənə tûm i dzuŋu zən, tə n mə moʼlə nə̀ ghaa khə ni tsə mə n fwaʼ kə tii kə. À fa kee loʼ nə̀ a ka tsəm dzə mə ni fwaʼ fwaʼ kən, à loʼ Kəzə̀ kə sàynə mə nə̀ n fwaʼ fwaʼ kən tə fuu naŋanə tə̀ mə.

¹⁸Naamə kuŋ kə baa loʼ kee n fwaʼ kən n fwaʼanə ə? Naamə kuŋ kə loʼ ni naʼlə tûm i dzuŋu zə nə̀ kənunu, bəbə way fə kə tii. À wey loʼ ghə i tii zə n ney way fə key kə kpiinə tə̀ mə ni ney tə a loʼ wù wey tə naʼlənə tûm i dzuŋu zə.

¹⁹Nghee n loʼ kənə nə̀ n fwaʼa way n tənə wù loʼ, way soʼo kɔd kə wù loʼ, mə n naŋa wû wuŋ wə nə̀ n doʼo kəkɔd tə̀ ghə̂ ghə adzəm, sey nə̀, abə jìi loʼnə n loʼ ni ndəŋ kwu zə̂ bə ndəmə aghə̂ tə̀ Klisto.

²⁰Abə n loʼnə ghi ghə̂ a Təjuu ghə, mə n doʼo ndòw tə̀ a loʼ wù Juu, ni kwu zə̂ bə ghə tə̀ Klisto. Abə n muunə n fəŋŋə kə ghə̂ ghey ghə muunə n tənə Laŋ kə Mushi, mə n doʼo bə tə̀ a loʼ wù wey tə loʼnə n tənə Laŋ kə Mushi, sey nə̀, n loʼ ni kwu zə̂ bə soʼo ghə tə Klisto.

²¹Ambə n loʼ ghi ghə̂ ghey ghə way n tənə laŋ kə Mushi, mə n muu soʼo tə n way n tənə laŋ kə Mushi, sey nə̀, n loʼ ni kwu zə̂ bə soʼo ghə tə Klisto. Abə n ghəŋŋənə sey, i dii dzə way nə̀ n naŋŋə way laŋ u Kəzə̀ wə. Isəŋə loʼ nə̀ n loʼ n tənə laŋ kə Klisto.

²²Abə n loʼnə ghi ghə̂ ghey ghə ka kam beyyə n bəghəm i fə̀ŋ i ghə, mə n doʼo bə soʼo tə a loʼ wù wey bəghəm i fə̀ŋ i wi i ka kam beyyə, sey nə̀ mə i loʼ ni kwu zə̂ bə ghə tə̀ Klisto. Sey, n bwey ufə ghi ghə̂ ghə adzəm ni ghəŋə nə̀ abə i bəb kə ngee, mə i loʼ ni bəghəshi a loʼ ghə.

²³Zuŋ key n ghəŋŋənə ghəə ghən adzəm loʼ nə̀ tûm i dzuŋu zə i zam ndow, sey nə̀, mə i mbɔŋ keeli soʼo ibuulə tii.

²⁴Ghaa mgbaŋ khənu nə̀ abə ghə̂ a nyəŋə baalənə, ghə̂ ghey ghə nyəŋənə ghə loʼ n ndəm, à kee loʼ nə̀ à loʼ kə wù umɔʼ tə i keelinə naamə key wù kəsə̂ i neynə. Sey, ghaa khə ni nyəŋə n jìi zey ghaa i keelinə naamə kə.

²⁵I loʼ soʼo nə̀ ghə̂ ghey ghə nyəŋə baalənə ghə maʼlə tsu iwû ni naŋa kɔʼ ndow laŋ wey u laalənə ghəə â nyəŋə ghə. Ghə ghəŋŋə sey ni keeli kənaamə nə kə i doʼo tsuŋŋə way. Abə ghey, ghey kee nyəŋə ni keeli naamə key kə doʼlə tənə nə.

²⁶A wey loʼ ghə i tii zə n nyəŋənə ni zə̂. N way dzə tə̀ a loʼ wù təngɔʼ wey tə maŋa sayyənə ngɔʼ tə n luʼu tə zum tə.

²⁷N ghəŋə naŋa wû wuŋ nə̀ kə u nə zownə fɔɔbə zə abə ghə tsɔɔbənə mə, ghəŋə soʼo nə̀ wə i zow bə tə mə. N sey ghəŋŋə nə̀ i kə n nə naʼlənə tûm i dzuŋu zə tə ghə̂ ghə, wû wuŋ n ka keeli naamə key n khə ni keeli.