Read Weh 2 Kɔrint 1 Bible Online

2 Kɔrint 1 - Weh bible

2 Kɔrint 1

¹À màʼlə kən tɔ̀ɔ bə mə Pɔl, mə wən Zə̀ kə sàynə nə̀ n doʼo ngəd ə Yeso Klisto. N loʼ fa ghi waazə saa Timoti. N tɔ̀ɔ bə tə̀ ghə̂ a Kəzə̀ ghey n naʼ i Kɔrint, nsə ghə̂ a Kəzə̀ ghey adzəm n mbuʼu Akaya idzəm.

²N gɔŋŋə nə̀ Zə̀ kə, tə loʼnə Bày saa nsə Mûkəbii ə saa Yeso Klisto fuu ghaa n ndzuŋ nsə buulə zə.

³Saa fuu kəzɔŋŋə tə̀ Zə̀ kə tə loʼnə Bày Mûkəbii saa Yeso Klisto. Tə loʼ Bày wən tə khənə sî i kwɔɔlə zə, loʼ soʼo Zə̀ kən kə tsəmmənə fə̀ŋ tə aghə̂ tə tədzəm.

⁴Tə tsəmmə saa n chɔd n saa ndzəm, sey nə̀ saa i loʼ soʼo ni tsəmmə ghə̂ ghey ghə loʼnə nə uchɔd n jìi zey Zə̀ kə tsəmmənə ghey tii.

⁵I loʼ sey n təŋkey, nghee tə̀ saa ndəŋə fəʼlənə bòʼ Klisto, a loʼ ighələ Zə̀ kə tsəmmə soʼonə saa naʼ idzəm bòʼ wi.

⁶Abə ghey fəʼlənə nya, ghey sey fəʼlə bòʼ ghaa nsə ni ghəŋə nə̀ Zə̀ kə bəghəshi ghaa. Abə Zə̀ kə kee tsəmmənə fə̀ŋ tə ghey tə nya, à sey loʼ ni tsəmmə soʼo fə̀ŋ tə ghaa sey nə̀, ghaa i loʼ ni kow fə̀ŋ tə ghaa n fəghə zən ghaa fəʼlənə nya ighələ tə̀ ghey â kownə fə̀ŋ tə ghey tə.

⁷Fə kə loʼ kə way kə loʼnə ni təʼlə maʼa fə̀ŋ zey ghey gaʼnə n kow ghaa n təŋkey, ghey khənu nə̀ nghee tə̀ ghaa fəʼlə dzəŋinə ghi ghey n chɔd mən ghey koʼonə, abə Zə̀ kə i tsəmmənə ghey, tə tsəmmə soʼonu ghaa.

⁸Waazə ghə, ghey ləghə nə̀ ghaa zowkeeli ndzoʼo chɔd mey ghey a koʼnə n mbuʼu Eshya. Ghəə â tii a ma tsəghəshi daʼa kə ghey kə, ghey n kəm way ni kow fə̀ŋ. Ghey a nya moʼlə kə nə̀ ghey maŋ loʼ fə wə ivə.

⁹Ghey â nya ndzəm loʼ kə tə̀ a loʼ ghə̂ ghey ghə tsəʼlə dzənə saʼ n tow u ghə nə̀ ghə khə ni kpu. À kee loʼ nə̀ ghəə a tii ghə â shi n ghəŋə nə̀ ghey keeli tsu nə̀ ghə i loʼ i way ghey loʼ ni kəm ghəŋə n daʼa kə ghey, à may kə n daʼa K-a-zə̀. À loʼ wi tə zhəm nuu dzəŋŋə bənə ghə̂ ghə nə ivə.

¹⁰Tə mâ bəghəshi ghey n ndzoʼo ngoʼ i faalə zən zə â loʼnə ni ney nuu tow kə wù. Tə nə nam bəghəshiə kənu ghey. Ghey sey gaʼ fə̀ŋ tə ghey n kow wi nə̀ tə i ndow kə n sə kə ni bəghəshiə ghey.

¹¹Zə̀ i doʼlə sey n təŋkey, ghaa gaamənu ghey n gɔŋŋə zey ghaa gɔŋŋənə tə̀ ghey. Gɔŋŋə i ghaa zə i ghəŋŋə nə̀ ndəmə aghə̂ ghə i fuu zɔŋŋə kə tə̀ Zə̀ kə n tow u ghey. Gɔŋŋə zən ndəmə tə aghə̂ tə gɔŋŋənə n tow u ghey n ghəŋə nə̀ Zə̀ kə dii ghey n fə̀ŋ ə wi i dzuŋu zə.

¹²Fə̀ŋ tə ghey tə zownu, ghey u loʼnə ni kɔʼlə iwû nə̀ muu i ghey fa mbi â loʼ tsətsəghə loʼ soʼo nə̀ isəŋə. A wey bɔɔmə loʼ nghee ghey muunə ghi ghaa. Ghey ghəŋŋə dzə way ghəə ghə n tɔb u mbi, ghey ghəŋŋə aghəə adzəm n ndzuŋ zey Zə̀ kə diinə tə ghey.

¹³N ghəə ghən dza n təŋkey, ghey ka tɔ̀ɔ bə dzə̀ ghə i loʼ zə tə̀ ghaa nə̀ ghaa way ni zowkeeli. N moʼlə nə̀ ghaa i loʼ ni zowkeeli ghəə a tii ghə adzəm,

¹⁴n təŋkey, ghaa ka ghey kam tɔʼ zowkeeli. N sey gɔŋŋə nə̀ abə n tsuʼ fey Mûkəbii saa Yeso î bəghənə, ghaa i loʼ ni kɔʼlə wû zə bòʼ ghey ighələ tə̀ ghey kɔʼlənə wû zə bòʼ ghaa.

¹⁵Nghee tə̀ mə̀ â tɔʼ khənə ghəə ghən, mə n naŋa tsu n fə̀ŋ zuŋ nə̀ n khə ni bə dzə̀ n səə ghaa, sey nə̀ ghaa i loʼ ni keeli kuulə ibuulə.

¹⁶Mə â ləghə ni koʼ daŋ tsə̀ ghaa abə n ndòwnə n mbuʼu Masedonya, n bə koʼ daŋ tsə soʼo ghaa abə n dzəŋŋə bənə, ni ghəŋə tsu nə̀ ghaa i loʼ ni fuu mə n gaamə zə ni ndow n mbuʼu Judeya.

¹⁷Ghaa moʼlə nə̀ mə â fwɔdlɔnu nghee tə̀ n bayyənə ghəə ghən ə? Nkee ghaa dza n bayyə ghəə ghuŋ tə̀ a loʼ wù n mbi tə bəghəm kɔʼɔnə ghəə zə nə̀, “Ow, ow”, tsuŋŋə tsu tə n kəm tuu i tsu nə̀, “Ngaŋ, ngaŋ ə?”

¹⁸Nghee tə̀ Zə̀ kə ndzəmə ghɔɔmənə isəŋə, ghɔɔmə i Kəzə̀ zey ghey naʼlənə tə̀ ghaa, ghey fwɔdlɔ bəghəm dzə way ghəə zə nə̀, “Ow, ow”, loʼ sey nə̀ n fə̀ŋ tə ghey, ghey tuu maʼanu ghə i tii zə nə̀, “Ngaŋ, ngaŋ.”

¹⁹Waa Kəzə̀, Yeso Klisto wən ghey naʼlənə tə̀ ghaa, tɔŋŋə, mə, Sivanus, nsə Timoti, fwɔdlɔ bəghəm dzə way ghəə zə, tə n kəm tuu i tsu. Abə tə bəghəm kɔʼnə ghəə zə, tə n bəghəm, nə̀ tə tuunu, tə n tuu tən tsu.

²⁰I loʼ sey n təŋkey, à loʼ Klisto tə luulənə ghəə ghey Zə̀ kə â təb naŋanə adzəm. À loʼ n bam i wi ghey loʼnə ni bəghəm dzəŋi nə̀, “Zə̀ i loʼ sey.” Fuu ndow nkɔʼlə n dzəm tə̀ Zə̀ kə.

²¹À loʼ Kəzə̀ n wû u wi wə, tə ghəŋənə nə̀ saa adzəm, saa i loʼ nə kəfə kəmɔʼ ghi Klisto, tsuʼ naŋa kɔʼ saa nə̀ saa i loʼ ghə̂ a wi ghə.

²²Tə n kuu naŋa tsəə ə wi n kow saa, ghəŋə nə̀ Zay kə Zow kə i muu n fə̀ŋ tə saa tə̀ a loʼ ni dii nə̀ tə̀ i fuunu naamə key tə â təb naŋanə nə̀ tə i fuunu tə̀ saa.

²³Zə̀ kə loʼ ni təmi tiilə bòʼ mə nə̀ n dza isəŋə nə̀ ghəə zey mə â doʼonə nə̀ n ka kəm bə n Kɔrint, â loʼ n təŋkey mə̀ â ləghə way ni tɔɔbə n kow ghaa.

²⁴Ghey ləghə dzə way ni tə̀mmə ghaa nə̀ ghaa bəghəm ghəə zey ghey dzanə, n təŋkey ghey khənu nə̀ ghaa tey tawnu n bəghəm i fə̀ŋ i ghaa. Ghey maŋ loʼ ghə̂ a kəfwaʼ, ghey fwaʼa dzəŋinə ghi ghaa nə̀ ghaa i loʼ nə iduʼlə.