Read Weh 2 Kɔrint 10 Bible Online

2 Kɔrint 10 - Weh bible

2 Kɔrint 10

¹À loʼ mə̀ Pɔl n wû wuŋ wə, n maʼa tsunə wû wə ni buʼ kəwɔɔ tə̀ ghaa n zəd i Klisto wən tə buulənə, zə̀ələ loʼ soʼo. À loʼ mə wən ghə̂ a loʼ a dza kaabənə nə̀ abə n loʼnə n sə kə ghaa, mə n tsəŋə, kee tɔɔbə ghɔɔmə abə n nuu ndownə.

²N buʼu bə kəwɔɔ tə̀ ghaa nə̀ kə ghaa nə̂ ghəŋŋənə nə̀ n tɔɔbə ghɔɔmə abə mə î bənə, n təŋkey n loʼnu ni tɔɔbə ghɔɔmə tə̀ ghə̂ ghey ghə dzanə nə̀ ghey ghəŋŋə aghəə n jìi zey ghə̂ a mbi a ghəŋŋənə.

³À loʼnu isəŋə nə̀ saa muu fa n mbi, à kee loʼ nə̀ saa təmə dzə way tsam nghee tə̀ ghə̂ a mbi a təmənə tii.

⁴Fə̂ u tsam u ghey u maŋ way dzə tə̀ a loʼ u wù sɔŋtsuʼ wə, u fəd loʼ fə u tsam u Kəzə̀, ghey neynə ni təm saʼ luʼu tey ghə̂ a təngəmə a ghey a bəghə doʼonə tii.

⁵Ghey saʼa maʼlə bə ghə̂ ghey adzəm ghə maŋa buʼunə dzuu zə, sìi ndzəŋŋə soʼo aghə̂ nə̀ kə ghə nə keelinə Zə̀ kə. Ghey kwɔɔ naŋŋə bə moʼlə tə ghə̂ ghey adzəm ghə ləghə way ni zow ghɔɔmə i Kəzə̀, ghey n ghəŋə nə̀ ghə̂ a tii ghə i zow tə̀ Klisto.

⁶Ghey ləmmə tənə nə̀ ghaa doʼo may bə ghə̂ ghey ghə zownə tə̀ klisto, sey ghey i loʼ ni chɔd ghə̂ ghey ghə zow way tə̀ wi.

⁷Ghaa maŋa laalə kə aghə̂ a bii. Wù wey tə̀ khənə nə̀ tə ndzəm bəghəmnu tə̀ Klisto, tə kəm tɔʼ moʼlə tsu n wû u wi n təŋkey, ghey loʼ nə kəfə kəmɔʼ ghi Klisto tə̀ ghə loʼ soʼonə nə kəfə kəmɔʼ ghi wi.

⁸N way dzə ni dəd n tow kə, abə i loʼ kənə nə̀ n ngii tsɔbə fə̀ŋ bòʼ daʼa kən Mûkəbii fuunə tə̀ ghey, tɔŋŋə daʼa kən tə̀ fuunə nə̀ ghey bəghə kɔʼ bə bəghəm i fə̀ŋ i ghaa, a way dzə ni wey maʼa bəghəm i fə̀ŋ i ghaa.

⁹N ləghə dzə way nə̀ i doʼo tə̀ n bəmi bə ghaa n màʼlə wən n tɔ̀ɔ bənə.

¹⁰N dza sey n təŋkey, ghə̂ a loʼ a dza nə̀, “Màʼlə u wi u khə kəzən, taw, abə tə kee teynə n wû u wi wə, tə way ni dza ghə i səŋi i loʼ zə.”

¹¹N ləghə nə̀ ndzoʼo ghə̂ ghən zowkeeli tsu nə̀, ghəə ghən ghey dzanə nə kəmàʼlə abə ghey way ghi ghə, à bɔɔmə loʼ ghəə ghey ghey ghəŋŋənə abə ghey loʼnə ghi ghə.

¹²À way dzə nə̀ ghey foʼlə iwû nkee ghey baalə ghi ghə̂ ghey ghə kɔʼlənə wû zə nə̀ ghə loʼ ghə̂ a səŋi ghə. Abə ghə fòʼlənə wû i ghə zə sey, baalə soʼo sey n wû i ghə, ghə sey laʼlə maʼa wû i ghə.

¹³Ghey way dzə ni kɔʼlə iwû tsəghəshi luʼu key ghey khə ni kɔʼ kuum tii, ghey kee kɔʼlə kuum tsuu kə iwû n luʼu key Zə̀ kə bayyə naŋa nə̀ ghey kɔʼ kuum tii. Ghaa loʼ soʼo n fəŋŋə kə luʼu key Zə̀ kə bayyə naŋa nə̀ ghey kɔʼlə kuum iwû tii.

¹⁴Ghey ka kɔʼlə dzə wû zə tsəghəshi fwaʼ kə ghey tə̀ a i dza ghey ka kam bə koʼ tsə fey n səə ghaa. Â loʼ ghey ghə̂ a sə isə ghə ni ney bə tûm i dzuŋu zə bòʼ Klisto tə̀ ghaa.

¹⁵Ghey ka kɔʼlə dzə wû zə nə kəfwaʼ nə̀ à fwaʼ ghə̂ a nuu ghə. Ghey kee ləmmə kə nə̀ nghee tə bəghəm i fə̀ŋ i ghaa i nyim kɔʼɔ ndownə, luʼu key ghey khə ni fwaʼ kuum tii, kə i ndəŋə dow shiə ndow soʼonu.

¹⁶Ghey i loʼ ni naʼa tûm i dzuŋu zən nə təluʼu nə̀ ghə n tsəghə dəŋə tey ghaa loʼnə tii. N dza sey n təŋkey ghey ləghə way ni tsɔb fə̀ŋ n fwaʼ key wù loʼ fwaʼ tsəghə dzənə nə kəluʼu.

¹⁷N kee ləghə ni ghəŋə tə̀ i tɔ̀ɔ doʼonə n màʼlə K-a-zə̀ nə̀, “Wù wey tə̀ ləghə ni tsɔb fə̀ŋ, tə tsɔb fə̀ŋ n fwaʼ key Mûkəbii ghəŋənə nə̀ tə fwaʼ.”

¹⁸I loʼ sey n təŋkey, à way dzə wù wey tə kalinə wû u wi wə, tə ghəŋŋənə ghəə ghey a kpiinə n sə K-a-zə̀, à fəd loʼ wù wey Mûkəbii kalinə, tə ghəŋŋənə ghəə ghey a kpiinə n sə K-a-zə̀.