Read Weh 2 Kɔrint 12 Bible Online

2 Kɔrint 12 - Weh bible

2 Kɔrint 12

¹N khə ni tsəm ndow kə n sə kə ni tsɔbə fə̀ŋ. Abə i loʼ kə nə̀ i khə way gaamə i loʼ zə, n dza n dza bə ghaa n ghəə ghey Mûkəbii diinə tə̀ mə̀ nə ujim nsə ghəə a nyiə doʼo ghey tə chi diinə tə̀ mə.

²N khənu wù loʼ tə â bəghəmnə tə̀ Klisto, a nya loʼ tənum ighəm n num tə təkaykə, ghə n ney nuu kɔʼ ndòw wi idəŋ. N kee way ni dza nə̀ â loʼ n wû u wi nkee â loʼ n zay kə wi. À khə kə Kəzə̀.

³N kee khənu nə̀ ghə â ney kɔʼ ndòw wù wən idəŋ. Nə̀ â loʼ n wû u wi nkee n zay kə wi, a khə kə Kəzə̀.

⁴Ghə â ney kɔʼ ndow wi idəŋ n luʼu key ghə tɔŋŋə nə̀ à loʼ Paradays[1]. Tə n zow aghəə fu nə̀ wù sɔŋtsuʼ u loʼ u way ni tiilə, aghəə nə̀ laŋ kə ka bəghəm soʼo nə̀ wù tiilə dza.

⁵Sey, n loʼnu ni tsɔb fə̀ŋ bòʼ ndzoʼo wù wən. N way ni tsɔb fə̀ŋ n wû wuŋ, abə n dza i tsɔb fə̀ŋ, n tsɔbə fə̀ŋ n ghəə ghey a diinə nə̀ n laynu.

⁶Abə n dza i tsɔb fə̀ŋ, n way dzə ni doʼo wù laʼlə n təŋkey, ghəə ghey n dzanə loʼ isəŋə. N kee kwɔɔ tsu kə wû wuŋ n təŋkey, n ləghə dzə way nə̀ wù loʼ i kɔʼlə mə nə ighəə tsəghəshi ghəə zey tə̀ koʼnə n ghəŋənə nkee n dzanə.

⁷Sey, nghee tə̀ mə â loʼ nə̀ mə n koʼ ndəmə nfaalə, mə n keeli kɔʼ dzaŋ i loʼ zə n wû wuŋ, zə̀ n loʼ tə̀ a loʼ tsəndəghə Satan tə̀ tûmnə ni chɔd mə, sey nə̀ kə̂ n nə̂ ghaŋŋənə wû wə.

⁸Tənəŋə tətəghə nə̀ n buʼu kə kəwɔɔ tə̀ Mûkəbii nə̀ tə ney nuu dzaŋ i tii zə.

⁹Tə n fəd dza tə̀ mə nə̀, “Ndzuŋ zuŋ kpiinu tə̀ wɔ, n təŋkey, nəŋə zey wə laynə tii, à wey loʼ nəŋə zey daʼa kuŋ kə dzɔbənə n kow wɔ.” Sey, mə i baa ghaŋŋə tsəghəshiə uwû nya nə̀ n tsəŋə way n ghəə ghey a ghəŋŋənə nə̀ mə i lay, sey nə̀ daʼa kə Klisto kə i loʼ n kow mə.

¹⁰À wey loʼ ghə i tii zə n khə way fəmmə kə n fə̀ŋ abə n laynə, ghə̂ a kpaalənə mə, koʼo uchɔd, ghə̂ a tsayyənə mə, chɔdlɔ soʼo mə, n təŋkey nəŋə zey n laynə, à wey loʼ nəŋə zey Klisto fwaʼa dzɔbənə n kow mə.

¹¹N loʼ wù laʼlə nə̀ a ghəŋə ghaa, kuumnə â loʼ ghaa ni kɔʼlə mə. N təŋkey abə i loʼ kənə nə̀ n way wù, n təbə dzə way n sə̂ kə ghə̂ a nii a ghaa ghey ghaa tɔŋŋə nə̀ a loʼ təngəd.

¹²Mə â kow tsu fə̀ŋ ni ghəŋə ndəmə ghəə a zum ghə idzuu ghə nsə faalə mə n fəŋŋə kə ghaa ni dii bə tə̀ ghaa nə̀ n ndzəm loʼ ngəd ə Yeso.

¹³À baa loʼ ghə i ghaa zə̀ n ghəŋənə tə̀ dzəŋi u dzûmə tə Klisto tə loʼ tey nə̀ n ka ghəŋə fey nə ghaa tsəghəshiə way nə̀ n ka bəb ghaa n gaamə i loʼ zə ə? Neyzəə na mə n bəb i tii zə!

¹⁴À nya ndòw tənəŋə tətəghə n bayyənə ni bə n səə ghaa, sey, mə î nam nɔɔ dzə way gaamə i loʼ zə n wɔ ghaa, n təŋkey n ləghə dzə way fə̂ u ghaa wə, à loʼ ghaa n ləghənə. I loʼ nə̀, ghinətəghə a way dzə ni kəŋə fuu tə̀ ghə bày a ghə ghə, a fəd loʼ ghə bày, ghə kəŋə fuunə tə̀ waa a ghə ghə.

¹⁵Sey, mə i fuu maynu fə̂ wey n khənə tə̀ ghaa, n buʼ fuu daŋŋə soʼo wû wuŋ ni ghəŋə nə̀ ghaa nyim n bəghəm i fə̀ŋ i ghaa. Nghee tə̀ n ngii ləghənə ghaa, à kee loʼ kee ghaa ləghə way mə ə?

¹⁶Ghaa khənu nə̀ mə â ka fəmmə dzə ghaa n ghə i loʼ zə. Wù loʼ loʼnu ni nam dza nə̀ mə â tsìi ghaa, nəəbə kwu kɔʼ soʼo ghaa n ghəə a badla ghə.

¹⁷Mə â kpaʼi nəəbə zə̂nu ghaa n ghə̂ ghən mə̀ â tûm bənə n sə̀ə ghaa ə?

¹⁸Mə â buʼ kəwɔɔ tə̀ Taytus nə̀ tə bə n sə̀ə ghaa, mə n tûm bə soʼo waazə ə saa u loʼ wə ghi wi. Ghaa dza i dza nə̀ Taytus â nəəbə zə̂nu ghaa ə? N dza tə â bɔɔmə khə kə ndzoʼo fə̀ŋ zey n khənə ə? N dza tə â bɔɔmə khə soʼo ndzoʼo mwam wən n khənə ə?

¹⁹Ghaa moʼlə nə̀ ghey ləghə ni bəghəshi wû i ghey n sə̂ kə ghaa n ghəə ghən adzəm ghey dzanə fa ə? À way dzə sey. Ghey dza isəŋə n sə K-a-zə̀ n jìi zey Klisto i ghəŋŋənə nə̀ ghey ghɔɔmə. Waazə ghuŋ a dzuŋu ghə, ghəə ghən adzəm ghey ghəŋŋənə loʼ ni bəghə kɔʼ bə bəghəm i fə̀ŋ i ghaa.

²⁰N dza sey n təŋkey, n fa tsəŋə nə̀ abə mə î bənə, mə i ka koʼ ghaa n jìi zey n ləghənə nə̀ ghaa doʼo tii, ghaa soʼo ghaa i ka koʼ mə nə̀ n way dzə n jìi zey ghaa ləghənə nə n doʼo tii. N tsəŋə nə̀ n loʼ ni bə nə̀ ghaa khə izùu n fəŋŋə kə ghaa, khə kəghoʼ, khə nəghə u fəə wə, khə umə̂, kpaalə kaabə iwû, baŋŋə təfəghəm, kɔʼlə kaabə iwû, fwɔdlɔ maʼa soʼo wû i ghaa.

²¹N tsəŋə nə̀ abə mə i kəm bənə, tow kə i ngii dəd mə n sə kə Zə̀ kuŋ bòʼ ghaa. Mə i kaʼ ni mow bòʼ ndəmə ghə̂ ghey ghə â ghəŋənə bəb zə, ghə a nam loʼ nə̀ ghə ka kam kweyyə nuu bə fə̀ŋ tə ghə tə n ghəə a ghə a dzəə ghə, ghəə a laŋŋə ghə nsə moʼlə tə dzəə tey ghə â khənə.