Read Weh 2 Kɔrint 13 Bible Online

2 Kɔrint 13 - Weh bible

2 Kɔrint 13

¹À wən nya loʼ tənəŋə tətəghə n bwey bəghənə n səə ghaa. Màʼlə K-a-zə̀ kə dzanə, “Kə̂ ghaa nə̂ kwɔɔnə wù nə ighəə, à may kə nə̀ ghə̂ abəghə nkee atəghə bə təmi tiilənu n ghə i tii zə.”

²N mâ bùʼ kpaa ghaa ghən ghaa â ghəŋŋənə ghəə a bəbə ghə, kpaa tsu soʼo ghə̂ a loʼ ghey adzəm. N fa nam kpaa kpiʼi bə ghə nya wən n way n səə ghaa ighələ tə̀ mâ kpaanə ghə nghee mâ bə koʼonə ghaa ni ghəŋə tənəŋə təbəghə, nə̀ abə mə i kəm bənə, wù ghə umɔʼ î nɔb shi way n wɔɔ kuŋ.

³Nghee tə̀ ghaa ləghənə nə̀ n dii bə ghaa n tsə̀ə nə̀ à loʼ Klisto tə fuunə mə n daʼa kə nə̀ n ghɔɔmə ghəə ghən n ghɔɔmənə, mə i dii bənu. Klisto laʼa way daʼa kə ni teyyə naŋa bə ghaa, tə fədlə dii daʼa kə wi nghee tə fwaʼanə n fəŋŋə kə ghaa.

⁴N ghəə ghən dza n təŋkey, nghee tə̀ ghə â baanə wi n zat kə fəkaʼ tə â ndzəm khə way daʼa kə, tə kee nya muu n daʼa K-a-zə̀. Nghee tə̀ saa loʼnə ghi wi nə kəfə kəmɔʼ, i sey dii nə̀ saa khə soʼo way daʼa kə. À kee bə n doʼo i ghey ghi ghaa, saa i dzəŋi keeli ndzoʼo muu zey tə khənə n daʼa K-a-zə̀.

⁵Laalə tsu na wû i ghaa zə̀ ni koʼ nə̀ ghaa nam gaʼnu fə̀ŋ n kow Klisto ə? Ghaa koʼo keeli way nə̀ Klisto ndzəm loʼ n kow ghaa ə? À may kə nə̀ ghaa koʼ tsu nə̀ ghaa n bwu khə̂mə.

⁶N moʼlə nə̀ ghaa i koʼo keeli soʼonu nə̀ ghey ka bwu dzə.

⁷Ghey gɔŋŋə tə̀ Zə̀ kə nə̀ i kə ghaa nə ghəŋŋə bəəbənə ghə i loʼ zə. À way dzə ni dii nə̀ ghey n təm zə̂, à fəd loʼ ni ghəŋə nə̀ ghaa ghəŋə ghəə zey i kpiilənə, abə i loʼ kənə tə̀ ghey n bwu.

⁸Ghey way ni ghəŋə dzə ghə i loʼ zə, zə î təʼlənə ghəə zey i loʼnə isəŋə, ghey fəd tey kə n ghəə zey i loʼnə isəŋə.

⁹Ghey duʼlənu abə ghey loʼ tə̀ ghey khə way daʼa kə loʼ kə, ghaa u kee taw dzɔbənə. Ghey fa gɔŋŋə kə nə̀ ghaa i taw dzɔbə nə aghəə adzəm.

¹⁰À wən loʼ ghə i tii zə, n tɔ̀ɔ bənə ghəə ghən tə̀ ghaa nə̀ n way ghi ghaa, sey nə̀, abə n bənə, mə i ka tɔɔbə dzə ghi ghaa n daʼa kən Mûkəbii fuunə tə̀ mə. Mûkəbii fuu mə n daʼa kə tii kə ni bəghə bəghəm i fə̀ŋ i ghaa, à way dzə ni wey maʼa bəghəm i fə̀ŋ i ghaa.

¹¹Nyisa waazə ghuŋ a dzuŋu ghə, ghaa doʼo kədzuŋ! Dəm tsu na ni ghəŋə ghəə ghey a loʼnə tsətsəghə. Ghaa i naŋŋə tsə̀ zuŋ zə, zowkeeli tsuu na wû i ghaa zə, ghaa i muu ni ibuulə. N gɔŋŋə nə̀ Zə̀ kən kə fuunə ləghə zə nsə buulə zə i loʼ ghi ghaa.

¹²Tɔʼ tɔŋɔ zow tsu na wû i ghaa zə tə a loʼ dzûmə tə Klisto.

¹³Ghə̂ a Kəzə̀ ghən fa adzəm a tɔŋŋə zow bə ghaa.

¹⁴N gɔŋŋə nə̀ Mûkəbii Yeso Klisto fuu ghaa n ndzuŋ ə wi, nə̀ Zə̀ kə dii ghaa n ləghə i wi zə, Zay kə Zow kə i loʼ soʼo ghi ghaa adzəm.