Read Weh 2 Kɔrint 2 Bible Online

2 Kɔrint 2 - Weh bible

2 Kɔrint 2

¹À wey loʼ ghə i tii zə mə â tsə̀m kɔʼnə n fə̀ŋ zuŋ nə̀ n way dzə ni kəm bə n səə ghaa, n bə ghəŋə ghaa nə̀ ghaa i fəələ n fə̀ŋ tə.

²Abə à loʼ nə̀ n ghəŋŋə nə̀ ghaa i fəələ n fə̀ŋ tə, à i kəm loʼ ndee tə i ghəŋŋə nə̀ mə i duʼlə ə? N dza a i mgbaŋ loʼ kə ghaa ghən n ghəŋŋənə nə̀ ghaa i fəələ n fə̀ŋ tə ə?

³À wey loʼ ghə i tii zə mə â tɔ̀ɔ bənə màʼlə key mə̀ â bùʼ tûm bənə tə̀ ghaa sey nə̀, abə n bənə, kə̂ ghaa nə ghəŋŋənə nə̀ n fəələ n fə̀ŋ loʼ sey nə̀ à mə loʼ ghə ni ghəŋə mə nə̀ mə i duʼlə. N khənu nə̀ abə n duʼlənə, i sey dii nə̀ ghaa adzəm duʼlə soʼonu.

⁴Mə â tɔ̀ɔ bə màʼlə key tə̀ ghaa n fə̀ŋ i baŋa zə, mə â ndzəmə fəələnu n fə̀ŋ, mə n tɔ̀ɔ tənə n sə̂ mə idey mə. Mə â tɔ̀ɔ dzə way ni ghəŋə nə̀ ghaa keeli kəfəmmə. Mə â ləghə ni dii tə̀ ghaa nə̀ n ngii ləghənu ghaa.

⁵Abə wù loʼ ghəŋənə nə̀ ghə̂ a zow ifɔɔbə, tə ka ghəŋə dzə tə̀ mə, tə ghəŋə tə̀ ghaa, abə a way kə tə ghaa adzəm. N ghəə ghən dza n təŋkey n ləghə dzə way ni ngii dowwə ghə i tii zə.

⁶Chɔd mən ndəmə ghaa fuunə tə̀ wù tii, mə n kpii.

⁷A nya kpii ni neyzəə wi, ghaa tsəmmə tsu wi, sey nə̀ kə̂ tə nə kəm ngii mow tsəghəshiənə, tə bwu n bəghəm i fə̀ŋ i wi.

⁸Sey n buʼu bə kəwɔɔ tə̀ ghaa nə̀ ghaa dii ndow tə̀ wi nə̀ ghaa ndzəmə ləghənu wi.

⁹Ghəə zey mə â tɔ̀ɔ bə soʼonə màʼlə key tə̀ ghaa, â loʼ ni mɔm koʼ ghaa, ni koʼ nə̀ ghaa i naŋŋə kənu ghəə ghey mə â dzanə tə̀ ghaa adzəm.

¹⁰Abə ghaa neyzəənə bəb i wù zə̀, mə n wi neyzəə soʼo. Abə n neyzəənə bəb i wù zə, abə a loʼ nə̀ n khə ni neyzəə wù n ghə i loʼ zə, n neyzəə n sə kə Klisto n ndzuŋ ə ghaa.

¹¹N sey ghəŋŋə nə̀ kə̂ Satan nə nəbənə saa, n təŋkey, saa khənu jìi tə utɔb tə wi tə tsɔŋɔ tə.

¹²Nghee mə̀ â ndòwnə n naʼ i Trowas ni ndòw naʼa tûm i dzuŋu zə bòʼ Klisto, à n loʼ nə̀ Mûkəbii n chi naŋa jìi tə̀ mə ni fwaʼ fu.

¹³À kee loʼ nə̀ mə â nam khə kəfəmmə n fə̀ŋ, n təŋkey n ka koʼ dzə waazə saa Taytus fu tii. Sey mə n dza ndòw tə̀ dzûmə tə Klisto tey fu nə̀ ghə doʼo kədzuŋ, nuu daŋŋə ndòw n mbuʼu Masedonya.

¹⁴Saa kee fuu kə kəzɔŋŋə tə̀ Zə̀ kə n təŋkey, abə saa loʼnə nə kəfə kəmɔʼ ghi Klisto nəŋə tədzəm, Zə̀ kə n sìi bwey kaabə tsə ghi saa tə a loʼ ghə̂ ghey ghə təm zə̂nə tsam n zəd i Klisto. Zə̀ kə ney saa ni ghəŋə nə̀ ghə̂ a keeli Klisto nə təluʼu tədzəm n tûm zey ghey naʼlə kaabənə. Tum tii loʼ tə̀ a loʼ zuʼ tə dzuŋu tə, tə ləmmənə dzɔbənə nə təluʼu tədzəm.

¹⁵Saa loʼ tə̀ a loʼ zuʼ tə inəŋ tə dzuŋu tə Klisto fuunə tə̀ Zə̀ kə, tə ləmmənə nə təluʼu tədzəm n kow ghə̂ ghey Zə̀ kə bəghəshiənə ghə nsə n kow ghə̂ ghey ghə sàŋŋə nay ndownə.

¹⁶Ghey loʼ tə̀ a loʼ zuʼ key kə ghəŋŋənə nə̀ ghə̂ a kpuulə tə̀ ghə̂ ghey ghə laʼa nay ndownə. A kee bə tə̀ ghə̂ ghey ghə keelinə bəghəshi zə, ghey loʼ tə a loʼ zuʼ key kə fuunə muu zə. A loʼ ndee tə̀ kɔʼ kpiinə ni fwaʼ ndzoʼo fwaʼ kən ə?

¹⁷Ghey way dzə tə̀ a loʼ ndəmə ghə̂ a loʼ ghə, ghə ney kɔʼnə ghɔɔmə i Kəzə̀ zə ni kəŋ ukhəə tii. Ghey naʼlə ghɔɔmə i Kəzə̀ n fə̀ŋ tə zow tə tə̀ a loʼ ghə̂ a kəfwaʼ a Klisto, Zə̀ kə tûm bənə.