Read Weh 2 Kɔrint 3 Bible Online

2 Kɔrint 3 - Weh bible

2 Kɔrint 3

¹Ghaa moʼo nə̀ ghey kəm kaʼ ndow ni kali wû i ghey ə? Nkee ghaa moʼo nə̀ ghey khə ni bə dii bə ghaa n màʼlə kə nə̀ à tɔ̀ɔ bə ghə̂ a nuu ghə nkee nə̀ à tɔ̀ɔ ghaa kə kalinə ghey nə̀ ghey loʼ ghə̂ a dzuŋu ghə ə?

²À loʼ ghaa, ghaa loʼnə màʼlə kə ghey kə, kə tɔ̀ɔ doʼonə n fə̀ŋ tə ghey, ghə̂ adzəm a khənə, tɔŋŋə soʼo.

³Ghaa dii bənu nə̀ ghaa loʼ kəmàʼlə Klisto tɔ̀ɔ bənə, tûm bə n wɔ ghey. Klisto â ka tɔ̀ɔ dzə màʼlə kə tii kə n dzaŋ k-a-màʼlə, tə â tɔ̀ɔ n Zay kə Zə̀ kən kə loʼnə utaw. Tə â ka tɔ̀ɔ soʼo màʼlə kə tii kə nə atay, tə â fəd tɔ̀ɔ n fə̀ŋ tə aghə̂.

⁴Ghey dza ghəə ghən n təŋkey ghey gaʼ fə̀ŋ n kow Zə̀ kə n bam i Klisto.

⁵Ghey dza dzə way nə̀ ghey kɔʼ kpiinu ni fwaʼ ghəə ghən n ngəŋ ə ghey, à loʼ Kəzə̀ kə fuunə ghey n daʼa kə tii kə.

⁶À loʼ wi tə ghəŋənə nə̀ ghey kɔʼ kpii tə̀ a loʼ ghə̂ a kəfwaʼ n kâa n fəghə mən. Kaa n fəghə mən ka tɔ̀ɔ doʼo dzə n màʼlə K-a-zə̀, à loʼ n Zay kə Zow kə, kuum nə̀ ghəə ghey a tɔ̀ɔ doʼonə nə kəmaʼlə fədlə wey wù, Zay kə Zow kə u kee fuunə muu zə.

⁷Laŋ kən ghə â kpeyyə naŋa nyi ndownə n bad wə atay, kə â ney bə ivə. Laŋ kə tii kə â bə n nyiələ zə, ghə̂ ghə Izree ghə n way ni laalə tûm usə u Mushi nghee tə wə â ngii nyiəllənə loʼ sey nə̀ nyiəllə i tii zə â nya buʼu nəmmə nyiə ndownu.

⁸Abə laŋ kən â loʼ ni nyiəllə n jii zən, i sey dii nə̀ kə key Zay kə Zow kə i bəghənə n ghii kə i nyiəllə tsəghəshiənu.

⁹Abə laŋ kən kə i ghəŋŋənə nə̀ ghə̂ a kpuulə loʼ ni nyiəllə, i sey dii nə̀ kə kən kə ghəŋŋənə nə̀ ghə̂ a doʼo tsətsəghə i nyiəllə tsəghəshiənu.

¹⁰Saa loʼ ni ndzəm dza nə̀, tsə u laŋ kə wey kən nya nəmmə may nyiə ndownu, tsə u laŋ fəghə kən u nəmmə koʼo tsə way a kee taw may kɔʼɔ bənə.

¹¹Abə Laŋ kə wey key â loʼ ni nyiəllə loʼ sey nə̀ kə â loʼ kə n tɔŋɔ fə inəŋə, i sey dii nə̀, kə fəghə kən kə nəmmə koʼo tsə way i nyiəllə tsəghəshiənu.

¹²Sey, ghey khə way tsəŋ zə abə ghey ghɔɔmənə n tənkey, ghey ləmmə ghəə ghən.

¹³Ghey way dzə tə̀ a loʼ Mushi, tə â bəghə tə n tsəd naŋa tsu tûm usə̂ u wi nə təndzə̂, nə̀ kə ghə̂ ghə Izree a nə koʼonə nghee tə̀ nyiəllə zey n tûm usə̂ u wi u may ndownə tii.

¹⁴Sey, fə̀ŋ tə ghə tə n taw doʼo i tsu. Ni bə kùm na, abə ghə zow tsu nghee ghə tɔŋŋənə kaa n wey mə, a n loʼ tə a loʼ ndzə̂ tey tə nam tsəd doʼo kə n tûm usə̂ u ghə, n təŋkey, à loʼ kə n bam i Klisto ghə loʼnə ni tsɔʼ nuu ndzə̂ tə tii tə.

¹⁵N dza bə tə̀ ghaa nə̀, ni bə kùm na abə ghə tɔŋŋənə laŋ u Mushi wə, ndzə̂ tə tii tə n nam tsəd doʼo kə n fə̀ŋ tə ghə.

¹⁶Abə wù tsəm bəghəm dzənə tə̀ Mûkəbii, Mûkəbii chiə nuulənu ndzə̂ tə tii tə.

¹⁷Nya, Mûkəbii wən ghə dzanə loʼ Zay kə Zow kə, nsə sey luʼu wey Zay kə Mûkəbii kə loʼnə tii, ghə̂ a kəm muu way n tənə kəlaŋ fuu tii.

¹⁸Saa ghən adzəm saa loʼnə nya n tûm n təsə mə təghə, saa n koʼ nghee Mûkəbii nyiəllənə tii. Nghee tə̀ saa koʼonə sey, Zay kə Zow kə nya kweyyə nuulə bə saa nyaŋi fənyaŋi nə̀ saa doʼo bə tə̀ a loʼ Mûkəbii sey nə̀, ghə̂ a loʼ ni tɔʼ koʼ nghee tə nyiəllə tii.