Read Weh 2 Kɔrint 4 Bible Online

2 Kɔrint 4 - Weh bible

2 Kɔrint 4

¹Nghee tə Zə̀ kə kwɔɔlənə sî zə n kow ghey, fuu ghey n fwaʼ kə kən, fə̂ kə loʼ kə way kə loʼ ni ghəŋə nə̀ ghey buu səə.

²Ghey n tuu maʼa ghəə a dədlə a kətow ghey ghə̂ a ghəŋnənə nə kələm. Ghey ghəŋŋə way ghəə a tsìi ghə, ghey fwɔdlɔ soʼo way ghɔɔmə i Kəzə̀ zə. Ghey kee ghɔɔmə bə isəŋə n mgbaŋ nə̀ ghə̂ adzəm ghə i khə n fə̀ŋ tə ghə nə̀ ghəə ghey ghey ghəŋŋə, a kpiinu n sə K-a-zə̀.

³Abə i loʼ kə nə̀ ghə̂ a zowkeeli way tûm i dzuŋu zən ghey naʼlənə, à loʼ kə ghə̂ ghey ghə laʼa nay ndownə, ghə zowkeeli way.

⁴Nghee tə̀ ghə̂ ghən ka bəghəm tə̀ Zə̀ kə, zə̀ kə mbi kən tɔŋŋə Satan n ghəŋə naŋa ləm kə n fə̀ŋ tə ghə, sey nə̀ kə ghə nə koʼonə tsə u tûm i dzuŋu wey u dii bənə kɔʼlə n Klisto wən tə loʼnə tə̀ a loʼ Kəzə̀.

⁵Ghey naʼlə way tûm bòʼ wû i ghey, ghey fədlə naʼlə tûm bòʼ Klisto tə loʼnə Mûkəbii. Wû i ghey, ghey loʼ ghə̂ a kəfwaʼ a ghaa bòʼ Yeso.

⁶À loʼ Kəzə̀ tə â dza tsu nə̀, “Tsə u bàŋ shi bə nə kələm”, à loʼ wi tə ghəŋənə nə̀ tsə u bàŋ n fə̀ŋ tə ghey sey nə̀ ghey koʼ kɔʼlə n Kəzə̀ mən n baŋanə n tûm usə u Klisto.

⁷Ghey khə ndzoʼo fə u səŋi wən n tɔ̀ɔ tə itsaʼ, ni dii tsu nə̀ faalə faalə kə kədaʼa kən ghey khənə nuu bə n wɔ Kəzə̀, a way dzə kə ghey kə.

⁸Ghey keeli kaabə nchɔd badla tədzəm, wə u kee wey way ghey. Nəŋə tə loʼ tə ghey n zowkeeli way, à kee loʼ nə̀ ghey buu doʼlə way.

⁹Ghey khə ghə̂ a təngəmə n ndəm, à kee loʼ nə̀ Zə̀ kə ka kam tuu maʼa koʼ tsə ghey. Ghə bwɔdlə bəəbə ghey, à kee loʼ nə̀ ghə ka ghey wey maʼa dzə.

¹⁰Ghey loʼ tən tsə kə tə ghey boʼo keeli və i Yeso nə uwû, sey nə̀ ghə̂ ghə i koʼo bə muu i Yeso zə n kow ghey.

¹¹Ghey koʼo tənə tsə kə ivə n muu i ghey bòʼ Yeso, sey nə̀ ghə̂ ghə i loʼ ni koʼ muu i Yeso n vən fə uwû fə ghey.

¹²Sey ghey sa koʼo ivə nə̀ ghaa keeli imuu.

¹³Màʼlə K-a-zə̀ kə dza nə̀, “N ghɔɔmə n təŋkey mə n bəghəm.” Sey, à loʼ kə n Zay kə bəghəm i zən ghey ghɔɔmənə n təŋkey, ghey n bəghəm.

¹⁴Ghey ghəə ghən ghəŋŋə n təŋkey, ghey khənu nə̀ Zə̀ kən kə â zhəm dzəŋŋə bənə Mûkəbii Yeso nə ivə, tə i zhəm dzəŋŋə bə soʼonu saa nə ivə. Tə i ney kɔʼ ghey ghi ghaa, tə naŋa bə n səə wi.

¹⁵Ghəə ghən adzəm a loʼ ni gaamə ghaa sey nə̀, nghee tə̀ ndzuŋ ə Kəzə̀ zaamə ndownə, ndəmə aghə̂ ghə i loʼ ni ndəŋə fuu ndow zɔŋŋə kə tə̀ Zə̀ kə ni ghəŋə nə̀ ndəmə aghə̂ ghə i fuu kɔʼləmə tə̀ wi.

¹⁶À wən loʼ ghə i tii zə, fə̀ŋ tə ghey tə way ni buu doʼo, abə i loʼ kənə nə̀ ghey lay may ndow nə uwû, Zə̀ kə n ghəŋə nə̀ zay kə ghey kə i fədlə taw doʼlə bə tsuʼu ndzəm.

¹⁷Sey, nyaŋi mə nchɔd mən saa koʼonə nyisa, n fədlə bayyə naŋa bə saa nə̀ saa i keeli kɔʼlə mən n nə may way, n tsəghəshinə chɔd mən n dzəm a keelinə.

¹⁸I loʼ sey n təŋkey, ghey naŋŋə dzə way sə̂ zə n fə̂ wən a koʼonə, ghey fədlə naŋŋə ndòw isə̂ n fə̂ wey a koʼo way, bòʼ nə̀, fə̂ wən a koʼonə, u doʼlə tsuŋŋə way, fə̂ wey a koʼo way kee doʼlə tənənu.