Read Weh 2 Kɔrint 6 Bible Online

2 Kɔrint 6 - Weh bible

2 Kɔrint 6

¹Nghee tə̀ ghey fwaʼa dzəŋinə ghi Zə̀ kə, ghey buʼu bə kəwɔɔ tə̀ ghaa nə̀ kə̂ ghaa nə bəghəmnə nə̀ ndzuŋ ə Kəzə̀ zən ghaa keelinə doʼo Kənunu.

²N dza sey n təŋkey Zə̀ kə dza nə̀, “Ambə nəŋə i kpii tsunə tə̀ mə̀ ni dii ndzuŋ zuŋ tə̀ ghaa, Mə n zow gɔŋŋə i ghaa, Ambə tsuʼ fə tii fə kpii tsunə tə̀ mə ni bəghəshi ghaa, Mə n gaamə ghaa.” Zow na! À wən nya loʼ nəŋə i tii zə ni keeli ndzuŋ ə Kəzə̀, à na loʼ tsuʼ fə tii fə ni keeli ibəghəshi.

³Ghey təʼlə way wù loʼ, sey nə̀ kə̂ bəb i loʼ i nə doʼlənə n fwaʼ kə ghey.

⁴Ghey fədlə dii bə wû i ghey tə̀ a loʼ ghə̂ a kəfwaʼ a Kəzə̀ a dzuŋu ghə nə̀ təjìi tədzəm, nghee ghey kownə fə̀ŋ n chɔd mən ghey keelinə, kow fə̀ŋ n ghəə ghən a tsəmə tawnə, kow soʼo fə̀ŋ nghee tə̀ ghey tsəmə zow kənə ngoʼ.

⁵Ghə n ghey bwɔd, fìi naŋa n ndaw tsaʼ, ghə̂ ghə n teyyə naŋa naʼa tə nə ifuu bòʼ ghey. Ghey n fwaʼ tə̀ a loʼ ukɔd, doʼo tsuʼu n loʼ mə nə̀ ghey bweeli way, ghey n muu soʼo n dzəŋ.

⁶Ghey n dii nə̀ ghey loʼ ghə̂ a kəfwaʼ a Kəzə̀ n muu i ghey i zow zə, n tɔb u ghey, n jìi zey ghey kownə fə̀ŋ tii, n mwam u ghey u dzuŋu wə. Zay kə Zow kə a loʼ n kow ghey, ghey u ləghənə ghə̂ ghə n fə̀ŋ tə ghey tə tədzəm.

⁷Ghey dza isəŋə nəŋə tədzəm, Zə̀ kə u fuu soʼonə ghey n daʼa kə ni ghəŋŋə ghəə ghey a kpiinə. Ghəə a dzuŋu ghən ghey ghəŋŋənə loʼ tə̀ a loʼ fə u tsam u ghey n kpii kə zə̂ə kə nsə n kpii kə kwɔɔ kə.

⁸Nəŋə tə loʼ tə, ghə n ngɔɔmə ghey, nəŋə tə loʼ tə ghə n tsayyə ghey. Ghə̂ a loʼ a kpaalə ghey, ghə̂ a loʼ ghə a kalinə ghey. Ghə̂ a loʼ ghə a koʼo ghey tə̀ ghey badla aghəə, loʼ sey nə̀ ghey dza isəŋə.

⁹Ghə ghəŋŋə tə̀ ghə khə way ghey loʼ sey nə̀ ghə adzəm khənu ghey. Ghey loʼ tə̀ a loʼ fə wə i ivə, nə ghey nam loʼ utaw. Ghə̂ ghə a chɔdlɔnə ghey, nam way ni wey ghey.

¹⁰Ghə̂ a loʼ a koʼo ghey tə̀ a loʼ ghə̂ ghey ghə mownə, loʼ sey nə̀ ghey duʼlə nəŋə tədzəm. Ghə̂ a loʼ a koʼo ghey tə̀ a loʼ ghə̂ a laa ghə loʼ sey nə̀ ghey ghəŋŋə nə̀ ndəmə aghə̂ ghə i kùm. Ghə̂ a loʼ a koʼo ghey tə̀ a loʼ ghə̂ ghey ghə khə way fə kə, loʼ sey nə̀ ghey khə ufə udzəm.

¹¹A ghə̂ a Kɔrint ghə, ghey â ka nyi naŋa dzə ghə i loʼ zə tə̀ ghaa, ghey mâ chi dii may bə fə̀ŋ tə ghey tə tə̀ ghaa.

¹²Ghey ləghə ghaa n fə̀ŋ tə ghey tə tədzəm, a fəd loʼ ghaa, ghaa dii may bə way ləghə i ghaa zə tə̀ ghey.

¹³N ghɔɔmə bə tə̀ ghaa tə̀ a loʼ waa ghuŋ n dzəŋi kə dzûmə tə Klisto, mbɔŋ dii bə na ghey n ləghə zə, ghaa chi dii may bə na fə̀ŋ tə ghaa tə tə̀ ghey.

¹⁴Kə̂ ghaa nə̂ təmə dzəŋinə ghi ghə̂ ghən ghə ka bəghəm tə̀ Zə̀ kə. N dza sey n təŋkey muu zən i kpiinə tə̀ Zə̀ kə bwey dzəŋi way ghi muu i bəbə zə. Ləm kə way soʼo ni doʼo n luʼu key daa kə loʼnə tii.

¹⁵Klisto khə way ghə i loʼ zə ni ghəŋə ghi Satan. Wù wey tə bəghəmnə tə̀ Zə̀ kə khə soʼo way ghə i loʼ zə ni ghəŋə ghi wù wey tə ka bəghəm tə̀ Zə̀ kə.

¹⁶Muʼu n khə way ghə i loʼ zə ni ghəŋə ghi dzəŋi kə dzûmə tə Klisto kə. N dza sey n təŋkey saa loʼ ndaw Zə̀ kən kə loʼnə utaw, tə̀ Zə̀ kə dzanə nə̀, “Mə i muulə ghi ghə Mə i bwey soʼo n fəŋŋə kə ghə, Mə i loʼ Zə̀ kə ghə kə, Ghə i loʼ soʼo ghə̂ ghuŋ ghə.”

¹⁷Sey, Mûkəbii dza nə̀, “Nuu shi bə na n fəŋŋə kə ghə, Ghaa doʼo bə n nəŋ. Kə̂ ghaa nə̂ kuunə wɔɔ a ghaa ghə nə udzə̂, Mə i daŋŋə kpii ney ghaa.”

¹⁸Zə̀ kə, tə khənə daʼa wə udzəm dza soʼo nə̀, “Mə i doʼlə Bày ghaa, Ghaa i loʼ waa ghuŋ a num ghə nsə a zən ghə.”