Read Weh Galeshia 1 Bible Online

Galeshia 1 - Weh bible

Galeshia 1

¹À màʼlə kən tɔ̀ɔ bə mə Pɔl. N loʼ ngəd ə Yeso Klisto. À ka mə say dzə wù sɔŋtsuʼ, à way soʼo wù sɔŋtsuʼ tə tûmnə mə nə n doʼo tsəndəghə. À fəd loʼ Yeso Klisto nsə Zə̀ kə, tə loʼ Bày wən tə â zhəm dzəŋŋə bənə Yeso nə ivə.

²Waazə a saa ghən ghə bəghəm nə tə Zə̀ kə, ghə loʼ fa ghi mə, tɔŋɔ zow bə soʼo ghaa n dzəŋi u dzûmə tə Klisto wey tə loʼnə n mboʼo Galeshya.

³N gɔŋŋə ndow tə Zə̀ kə tə loʼ Bày saa nsə Mûkəbii Yeso klisto nə tə fuu ghaa n ndzuŋ nsə buulə zə.

⁴Yeso Klisto â bəghəm ni kpu bòʼ bəb i saa, nghee tə Zə̀ kə, tə loʼnə Bày, â bayyə naŋa nə̀, ni bəghəshi saa n mbi i bəbə zən a muunə tii nya.

⁵Kɔʼləmə i loʼ tə Zə̀ kə nəŋə tədzəm! Zə i loʼ sey.

⁶I tsəghəshiə mə ni koʼ nə̀ ghaa nya ghaʼi tuu maʼlə ndow Kəzə̀ tə â tɔŋɔnə ghaa n bam i ndzuŋ zən Klisto fuunə, nuu ndow ni bəghəm tûm i dzuŋu i nuu zə.

⁷Isəŋə loʼ nə̀, tûm i dzuŋu i nuu i kəm way dzə. I dii bə nə ghə̂ a loʼ a loʼnu ghə fwɔdlənə ghaa, ləghə ni kwey tûm i dzuŋu zə kùm Klisto.

⁸Abə à loʼ kə ghey nkee tsəndəghə Kəzə̀ tə nuu bə idəŋ naʼlə bə tûm i dzuŋu i nuu zə nə̀ a way dzə tûm i dzuŋu zən ghey â naʼanə tə ghaa, n gɔŋŋə nə̀ Zə̀ kə ləŋ naŋa ndzoʼo ghə̂ a tii ghə.

⁹Tə ghey â buʼ dza dzə nə̀, n nam dza kuulə bə tə ghaa nə̀, abə a loʼ kə wù ghaa wə tə naʼlə tûm nuu zə tə ghaa, nə̀ a way dzə tûm zən ghey â naʼlənə tə ghaa, n gɔŋŋə nə̀ Zə̀ kə ləŋ naŋa ndzoʼo wù tii!

¹⁰Ghaa moʼlə nə̀ n kəŋə kɔʼlə n wù sɔŋtsuʼ mɔ kɔʼlə n Kəzə̀ ə? Nkee ghaa moʼlə nə̀ n fwaʼa nə ghə̂ ghə i kali bə mə ə? Abə à mə loʼ nə n nam fwaʼa nə ghə̂ ghə i kali bə mə, i sey dii nə̀ n way dzə wù Kəfwaʼ a Klisto.

¹¹Waazə ghə, n ləghə nə̀ ghaa keeli tsu nə̀, tûm i dzuŋu zən n naʼlənə ka nuu bə dzə n wɔ wù sɔŋtsuʼ.

¹²À way dzə wù sɔŋtsuʼ tə â fu nə tûm zən tə mə, a way soʼo wù sɔŋtsuʼ tə zoʼlənə mə tii. À loʼ Yeso Klisto, tə chi dii bənə ghəə ghən tə mə.

¹³Wû i ghaa, ghaa mâ zow ndzoʼo muu zey mə â muu nə ghii zə n nəŋə zey mə â bəghəm nə tə ghəə a Kəzə̀ a ghə̂ a Təjuu ghə. Ghaa mâ zow jìi zey mə â chɔdlɔnə ghə̂ a dzəŋi kə dzûmə tə Klisto ghə a tii nə̀ mə n sə̂ a kəmə naŋa tən, ləghə ni mayyə ghə.

¹⁴Mə â ney kəsə̂ n ghaŋ fuŋ n ghəə a Kəzə̀ a ghə̂ Təjuu, mə n ngii khə zày n ghəə ghə inaʼ a ghə bày bày ghuŋ.

¹⁵À kee loʼ nə, Zə̀ kə mâ sày naŋa mə nə ghə ka mə kam ji, tɔŋɔ mə n bam i ndzuŋ ə wi nə̀ n doʼo wù kəfwaʼ a wi. Ambə nəŋə i wi i kpi tsunə,

¹⁶tə n chi dii bə tə mə nə̀ Yeso loʼ waa wi, sey nə̀, n naʼa tûm i dzuŋu zə bòʼ wi tə ghə̂ ghən ghə way ghə̂ a Təjuu ghə. Ambə n keeli tsu nə sey, mə n ka bəb zow dzə ghə i loʼ zə tə wù sɔŋtsuʼ,

¹⁷nkee ni kɔʼ n Yerosalem ni ndow koʼ ghə̂ ghey ghə â loʼ zey dzənə ngəd tə Yeso tə. Mə a fəd nuu ndow n mboʼo Arebya. Mə n nuu tsu fu, dzəŋŋə bə n naʼ i Damaskus.

¹⁸Ambə num tə tsəghə tsu tətəghə, mə n kɔʼ ndow n Yerosalem ni ndow koʼ Pita, doʼo tsu fu ghi wi nə ntsuʼ ighəm nsə tsuʼu mə ntaa.

¹⁹Mə â ka koʼ dzə ngəd tə Yeso tə loʼ tey tsəghəshiə way waazə Mûkəbii tɔŋŋə Jems.

²⁰Zə̀ kə khənu nə̀ ghəə ghən n tɔɔnə fa, a loʼ isəŋə, n badla dzə way ghəə ghə.

²¹Ambə n nuu tsunə fu, mə n nuu ndow n Sirya nsə n Silishya.

²²Â loʼ n nəŋə i tii zə nə̀ ghə̂ a dzəŋi u dzûmə tə Klisto wey n mboʼo Judeya, ghə bəghəmnə tə Klisto, kam khə way mə.

²³Ghə mâ kee zow kənu ghə dzanə nə̀, “Wù wən tə â chɔdlɔnə ghey ghən ghey bəghəm nə tə Yeso, nya kəm naʼlə tûm i dzuŋu zən tə â ləghə ni bəəbə maʼa.”

²⁴Sey ghə n fuu nkɔʼlə tə Zə̀ kə bòʼ mə.