Read Weh Galeshia 2 Bible Online

Galeshia 2 - Weh bible

Galeshia 2

¹Ambə num tə tsəghə tsunə ighəm nsə num tə təkaykə, mə n kəm nuu kɔʼ dzəŋŋə ndow n Yerosalem ghi Banabas. Mə n ney kɔʼ soʼo Taytus, ndow ghi wi.

²Mə â ndow fu, n təŋkey, Zə̀ kə â dii bə tə̀ mə nə̀ n ndow fu. Ambə n ndownə fu, mə n ghɔɔmə tsu kə ghi ngəd tey fu n dzəŋi kə dzûmə tə Klisto, tiilə dza ndow tûm i dzuŋu zən n naʼlənə tə̀ ghə̂ ghən ghə way ghə̂ a Təjuu ghə. Mə â ghəŋə sey təŋkey mə â ghə̂mə nə kə fwaʼ key n fwaʼ naŋanə nsə fwaʼ key n fwaʼanə nə naynə nə kənunu.

³Ghə â ka kee təmi kɔʼ dzə nə ghə teeli khə ni səghə tyi kə Taytus wən tə â loʼ nə ghi mə loʼ sey nə̀ tə way wù Juu.

⁴Ghə nəb ityim a loʼ ghə n nyi bə n fəŋŋə kə ghey tə a loʼ ghə̂ a tətsìi. Ghə â bə ni tsi koʼ muu i dzuŋu zən ghey khənə nghee ghey loʼnə nə kəfə kəmɔʼ ghi Yeso Klisto. Ghə â ləghə ni ghəŋə nə̀ ghey doʼo ukɔd n laŋ u ghə̂ a Təjuu.

⁵Ghey â ka tsəm bəghəm dzə ghəə ghey ghə â dza bə nə̀, ni ghəŋə nə̀ ighəə imɔʼ i ka nay dzə nə isəŋə zən i loʼ nə n tûm i dzuŋu zən ghey naʼlə tə ghaa.

⁶Ghə̂ ghey ghə â loʼ tə a loʼ təngəd fu, ka tsəm kuu kpiʼi ghəə i loʼ zə n tûm zuŋ. N ghəə ghən maŋ dzanu, bùʼ key ghə khənə ghii kə, khə way ghə i loʼ zə ni ghəŋə ghi mə, n təŋkey, Zə̀ kə saʼa dzə way wù nə tə laalə ndow tûm usə u wi.

⁷Ghə n fəd koʼ keeli bə nə Zə̀ kə n sày mə nə n naʼa tûm i dzuŋu zə tə ghə̂ ghən ghə way ghə̂ a Təjuu ghə, ighələ tə̀ tə sàynə Pita nə tə naʼa tûm i dzuŋu zə tə ghə̂ a Təjuu ghə.

⁸Â loʼ Zə̀ kə mɔʼɔ kə, kə â fuunə mə n daʼa kə nə n fwaʼ tə a loʼ ngəd tə Yeso tə ghə̂ ghən ghə way ghə̂ a Təjuu, ighələ tə̀ tə â fu nə tə Pita nə doʼo tsəndəghə ə Yeso tə ghə̂ a Təjuu ghə.

⁹Ambə Jems, Pita nsə Jɔn, ghə â loʼnə tsən tə fu, koʼ keeli tsunə nə̀ Zə̀ kə n fuu mə n ndzuŋ, ghə n tɔʼ tɔŋɔ zow bə mə ghi Banabas ni dii tsu nə ghey fwaʼa fwaʼ kə mɔʼɔ kə ghi ghə. Ghə n bəghəm dzəŋi kɔʼ nə̀, Banabas ghi mə fwaʼa ghi ghə̂ ghən ghə way ghə̂ a Təjuu ghə, ghə u kee fwaʼa nə ghi ghə̂ a Təjuu ghə.

¹⁰Ghə i loʼ kə imɔʼ ghə â dza nə̀, ghə â dza nə̀ ghey i moʼlə tsu kə ghə̂ a laa ghey ghə loʼ nə n fəŋŋə kə ghə. À n loʼ nə a bɔɔmə loʼ ghəə zey zə â loʼ nə n fə̀ŋ zuŋ ni ghəŋə.

¹¹Ambə Pita bənə n naʼ i Antyɔk mə n tuu maʼa tən ndow tə wi n mgbaŋ nə̀ ghəə ghey tə ghəŋŋə nə̀, a kpiilə way.

¹²I loʼ nə̀, Pita â zəə dzəŋi tsənu ghi ghə̂ ghən ghə way ghə̂ a Təjuu ghə. Ambə ghə̂ a Təjuu a loʼ a ndow bənə nə a ghə tûm bə Jems, Pita n doʼo ndow, kəm zəə dzəŋi way ghi ghə̂ ghən ghə way ghə̂ a Təjuu ghə. Tə â ghəŋə sey, n təŋkey tə â tsəŋə nə̀ kə ghə̂ a Təjuu ghən ghə â tey tənnə nə̀ ghə teeli khə ni səghə tyi kə wù, kə ghə nə sənnə nə nə̀ tə zəə dzəŋi ghi ghə̂ ghən ghə ka səghə tyi u ghə.

¹³Ghə̂ a Təjuu a loʼ ghey fu n dzəŋi kə dzûmə tə Klisto n zey soʼo ni nəŋŋə ghəŋə tə a loʼ Pita, sey, Banabas n nyəŋ laʼ soʼo n baa ghə, nəŋŋə ghəŋŋə soʼo ghəə tii ghə.

¹⁴Ambə n koʼ tsunə nə̀ ghə kəm bwey way nə isəŋə zən tûm i dzuŋu i dii nə̀, mə n dza ndow tə Pita n sə kə ghə̂ ghey fu adzəm nə “Wə mgbaŋ loʼ wù Juu, wə u muu nə tə alo wù wən tə way wù Juu. Wə kəm loʼ n ngee ni tənnə ghə̂ ghən ghə way ghə̂ a Təjuu ghə nə̀ ghə i dzûmə ghəə ghə inaʼ a Təjuu ghə ə?”

¹⁵Mə n ndow n sə kə ni dza nə̀, ghə ji saa a loʼ ghə tə a loʼ ghə̂ a Təjuu, dii tsu nə saa khə way bəb i loʼ zə n kow saa, saa u ney naŋa tsu nə ghə̂ ghey ghə way ghə̂ a Təjuu ghə nə a loʼ ghə̂ a bəbə ghə.

¹⁶Saa khənu nə̀, a way dzə laŋ wey wù naŋŋənə, u ghəŋŋənə nə̀ tə doʼo tsətsəghə n sə kə K-a-zə̀, à loʼ bəghəm i fə̀ŋ zən wù khənə n kow Yeso Klisto. À wey loʼ zuŋ key saa ghən saa loʼ nə ghə̂ a Təjuu ghə, saa â bəghəm tə Yeso Klisto sey nə̀ saa doʼo tsətsəghə n sə K-a-zə̀ n bam i bəghəm i fə̀ŋ zən saa khənə n kow wi, a way dzə n laŋ wey saa naŋŋənə. Isəŋə loʼ nə wù loʼ way dzə tə i doʼlənə tsətsəghə n sə K-a-zə̀ a dza tə naŋŋə laŋ wə inaʼ.

¹⁷Abə saa bəghəm nə tə Klisto, n təŋkey, saa ləghə ni doʼo tsətsəghə n sə K-a-zə̀, i kəm bə shi kɔʼ nə̀ saa n bwù laŋ kə. A loʼnu ni dza nə̀ Klisto gaamə nə̀ saa i ghəŋŋə ghəə a bəbə ghə ə? Ngaŋ a way ni dza koʼ sey!

¹⁸Sey, abə n kəm kaʼ tsu ni bəghə dzəŋŋə laŋ wən mə â sàʼ maʼa nə̀, i sey dii nə̀ a bwùlə maʼa mə laŋ kə.

¹⁹Abə a loʼ kə tə̀ laŋ kə, n bəghəmnu ni kpu, sey nə̀ mə i loʼ ni muu muu zey Zə̀ kə ləghənə.

²⁰N nya loʼ tə ghə â baa dzəŋi mə n zat kə fəkaʼ ghi Klisto. N kəm khə way daʼa kə n muu zuŋ, a loʼ Klisto tə khənə daʼa kə n muu zuŋ. Mùu zən n muu nə nya, n muu bòʼ bəghəm i fə̀ŋ zən n khənə n kow waa Kəzə̀ wən tə â ləghənə mə, bəghəm ni kpu n tow kuŋ.

²¹N way ni tuu maʼa ndzuŋ zən Zə̀ kə diinə tə mə, boʼnə abə wù mə loʼ ni doʼo tsətsəghə n sə K-a-zə̀, a dza tə naŋŋə kəlaŋ, zə i sey dii nə̀ Klisto â kpu nə kənunu!