Read Weh Galeshia 5 Bible Online

Galeshia 5 - Weh bible

Galeshia 5

¹Zuŋ key Klisto â kùmshinə saa tii loʼ ni ghəŋə nə̀ kə saa nə doʼlənə kɔd wə n tənə kəlaŋ. Sey, ney na ghə̂mə zə kə wù loʼ nə kəm sii dzəŋŋə nə ghaa nə ghaa kəm doʼo ukɔd n tənə kəlaŋ.

²Tɔʼɔ zəllə bə na ghɔɔmə zən mə Pɔl, n dza bənə tə ghaa. Abə ghaa bəghəm nə ghə səghə tyi u ghaa tə laŋ kə ghə̂ a Təjuu kə diinə, i sey dii nə̀, Klisto kəm khə way fwaʼ kə loʼ kə tə ghaa.

³N dza n tɔʼ dza kpiʼi bə nə̀, wù wən tə bəghəmnə nə̀ ghə səghə tyi kə wi, i sey dii nə̀ tə bəghəm soʼonu ni naŋa may ulaŋ udzəm.

⁴Wù wən tə ləghənə ni doʼo tsətsəghə n sə K-a-zə̀ a dza tə naŋŋə kəlaŋ, tə n baʼ nuu shi bə wû u wi wə n səə Klisto. Tə sey ney nuu shi bə dzə wû u wi n jìi zey tə kəm way ni keeli ndzuŋ ə Kəzə̀.

⁵Saa ghən saa muunə n daʼa kə Zay kə Zow kə, ləmmə tənə ni doʼo tsətsəghə n sə K-a-zə̀, n təŋkey, saa n bəghəm tə Klisto.

⁶Nghee saa doʼo bə dzənə nə kəfə kəmɔʼ ghi Yeso Klisto, abə ghə səghə tyi kə kə̀ mɔ ghə ka səghə ə, i zey khə way ghə i loʼ zə ni ghəŋə ghi muu i ghaa zə. Ghə i səŋi zey i loʼnə tii, loʼ bəghəm i fə̀ŋ zən saa khənə nsə ləghə zən saa khənə n wû i saa.

⁷Ghaa â mgbaŋa bwey dzɔbənu n muu i ghaa ghi Klisto. À ghaa â kəm kwu naŋa ndee nə̀ ghaa ka təmi tən kə nə isəŋə zən ghaa â bəghəm nə ə?

⁸N khə nə̀ wù wey tə nəb nə ghaa n jii zən, a way dzə Zə̀ kə kən kə â tɔŋɔnə ghaa.

⁹N dza ghə dza tsə nə̀, “À loʼ kə luʼu fə mbvuŋ sa n tɔ̀ɔ nfuŋ, fə ghəŋŋə nə̀ fuŋ n tii mə n dzəm n kɔʼ.” À wey loʼ nghee ghə sìi laʼanə ghaa tii.

¹⁰Fə̀ŋ baŋa dzə way mə n kow ghaa, n təŋkey, n khənu nə nghee tə ghaa loʼ dzənə nə kəfə kəmɔʼ ghi Mûkəbii, ghaa kəm way ni ney dzuu i nuu zə, tsəghəshiə way i zən n fuunə tə ghaa. Sey, keeli tsu na nə̀ Zə̀ kə i chɔdlɔ wù wey tə ləghənə ni fwɔd maʼa ghaa abə a loʼ kə ndee.

¹¹Waazə ghə, abə a mə loʼ nə n nam naʼlə kə nə̀ gheynum a khə ni teeli səghə tyi u ghə tə̀ laŋ kə dii nə̀, tə ghə̂ a Təjuu a mə chɔdlɔ way mə. À sə fa loʼ kə nə̀ n naʼlə tûm bòʼ və zən Yeso â kpunə tii n zat kə fəkaʼ, à wey loʼ i ghi ghə chɔdlɔnə mə.

¹²Abə a mə loʼ kə tə mə, ghə̂ ghən ghə fəmmənə ghaa nə̀ ghaa səghə tyi u ghaa tə laŋ kə dii nə̀, ghə mə ndow n sə kə ni kee kâa tsu wû i ghə.

¹³Waazə, ghə Zə̀ kə a say shi bə ghaa nə̀ kə ghaa nə kəm muulənə tə a loʼ ukɔd n tənə kəlaŋ. I kə ghaa nə kee ney kɔʼɔnə nə̀ nghee ghaa kəm way kɔd wə n tənə kəlaŋ, a loʼ kəbùʼ tə ghaa ni ghəŋŋə ghəə a bəbə ghən gow uwû ghaa ləghənə ni ghəŋŋə. Fət ney na buʼ kə tii kə ni gaamə tiilə wû i ghaa nə iləghə.

¹⁴Keeli tsu na nə̀ laŋ u Kəzə̀ udzəm u bəghə doʼo n laŋ kə kən kəmɔʼ, laŋ kə tii kə loʼ nə, “Wə khə ni ləghə wù wey n səə wɔ tə wə ləghənə wû wə wə̀.”

¹⁵Abə ghaa ŋaŋi kaabənə wû i ghaa zə tə a loʼ təbvə n jìi zey ghaa muu nə tii, kee ghə̂mə kə na nu kə ghaa nə weyyənə wû i ghaa zə.

¹⁶N dza bə tə ghaa nə̀ ghaa khə ni muu n daʼa kə Zay kə Zow kə, n təŋkey, a wey loʼ fə key kə i gaamənə ghaa nə ghaa ka i ghəŋŋə ghəə a bəbə ghey gow uwû ghaa ləghənə.

¹⁷N sey dza n təŋkey, ghəə ghən gow uwû ləghənə, bəghəm dzəŋi dzə way ghi ghəə ghən Zay kə Zow kə ləghənə. Ghəə ghən Zay kə Zow kə ləghənə bəghəm dzəŋi soʼo way ghi ghəə ghən gow uwû ləghənə. Fə wən ubəghə dzəŋi zuu baalənu, dii tsu nə wə khə way daʼa kə ni ghəŋə ghəə zey wə ləghənə ni ghəŋə

¹⁸À kee loʼ nə̀, abə wə bweynə n daʼa kə Zay kə Zow kə, i sey dii nə̀, wə way dzə n tənə kəlaŋ.

¹⁹Ghəə ghən gow uwû saa ləghənə loʼ, ilaŋŋə, ghəə a dzəə ghə, ghəə a laʼlə ghə

²⁰ni ngɔɔmə muʼu mə, ghəə a kəvuŋ, baa zə iwû, fəghəm tə baŋŋə tə, kəghoʼ, mbwu kə fə̀ŋ, sə a shiə ghə nə ufə̂, nəghə u fəə wə, wù dzawwə maʼa wə aghə̂ wə,

²¹wù wey tə ləghə way ni koʼ nə̀ wù loʼ shi kəfə, ni məə khəə nlə mə, dzəŋi u bəbə wə nsə ndəmə ghəə a bəbə a loʼ ghə tə a loʼ a ghən. Tə mə â buʼ kii naŋa dzənə tə ghaa, n nam kii naŋŋə bə ghaa nə̀, wù wey tə ghəŋŋənə ndzoʼo ghəə ghən nə nyi koʼ way n fɔɔ u Kəzə̀.

²²Ndzoʼo mwam wey Zay kə Zow kə ləghə nə̀ saa keeli loʼ, iləghə, iduʼlə, ibuulə, ni kow fə̀ŋ, fə̀ŋ i dzuŋu zə, ghəə a dzuŋu ghə, zə̀ələ kə fə̀ŋ,

²³ni bɔɔmə ghəŋŋə ghəə ghə nsə zuŋ kə umwam kə. Laŋ kə loʼ kə way dzə kə tuunə nə wə ka ghəŋə ghəə ghən.

²⁴Ghə̂ ghən ghə loʼnə nə kəfə kəmɔʼ ghi Yeso Klisto, ghə n tuu maʼa ghəə ghən gow uwû ləghənə, baa naŋa kɔʼ n zat kə fəkaʼ.

²⁵Nghee saa muunə n daʼa kə Zay kə Zow kə, saa khə ni bwey ndow kə n ghow kə ibwey kə wi.

²⁶Kə saa nə kɔʼlənə wû zə, kə saa nə kɔʼlənə wû i saa zə, kə saa nə ghoʼo soʼo nə wû i saa zə.