Read Weh Galeshia 6 Bible Online

Galeshia 6 - Weh bible

Galeshia 6

¹Waazə ghuŋ ghə, abə wù ghaa u loʼ u ghəŋə bəəbə tsunə ghə zə, ghaa ghən ghaa muu nə n daʼa Zay kə Zow kə, ghaa khə ni nyoʼlə bɔɔ teyyə dzəŋŋə bə wù tii n jii ibam, kee ghə̂mə kə nə kə fə kə loʼ kə nə chimmənə ghaa nə ghaa nyi ndow soʼo ni ghəŋə ghəə a bəbə ghə.

²I tɔɔmə tiilə na wû i ghaa zə n nəŋə zə uchɔd n jii i zən. Abə ghaa ghəŋŋə nə̀ sey, ghaa sey naŋŋə laŋ kə Klisto.

³Abə wə moʼlə nə̀ wə dow tsəghənu ni fuu wù n gaamə zə, wə sey nəbə wû wə, n təŋkey, wə ka dow tsəghə dzə.

⁴Kay wù khə ni tɔʼ laalə kɔʼ bə muu i wi ni koʼ nə̀ i dzɔbə kənu ə. Abə i dzɔbə nə̀, wə loʼnu ni tsɔb fə̀ŋ zə n nəŋə i tii zə n ghəə ghey wə ghəŋənə. Wə khə dzə way ni ney ghəə ghey wə ghəŋənə, wə baalə ndow ghi ghəə zey wù loʼ ghəŋənə.

⁵N sey dza təŋkey, kay wù khə kə ni fwaʼ fwaʼ key Zə̀ kə fuu naŋanə tə wi nə tə fwaʼ.

⁶Ghə̂ ghən ghə zoʼlənə ghəə a Kəzə̀ ghə, khə ni fuu ndow soʼo fə u dzuŋu wən ghə khənə tə ghə̂ ghən ghə diinə ghə n ghəə a Kəzə̀.

⁷Kə ghaa nə nəbənə wû i ghaa zə, wù way ni tsìi Kəzə̀. Fə key wə zəghənə, wə i keeli soʼo kə ghii.

⁸Wù wey tə ghəŋŋənə ghəə ghey gow uwû wi ləghənə, i keeli ivə. Wù wey tə kee ghəŋŋə nə̀ ghəə ghey Zay kə Zow kə ləghənə, i keeli muu zə itsali.

⁹Sey, i kə saa nə buu doʼlənə ni ghəŋŋə ghəə a dzuŋu ghə nəŋə tədzəm, n təŋkey abə saa ka buu doʼo ni ghəŋŋə ghəə a dzuŋu ghə, nəŋə i bəghənu, saa i keelinə naamə.

¹⁰À wən loʼ zuŋ key, saa khə ni ghəŋŋə ghəə a dzuŋu ghə tə ghə̂ ghə adzəm abə saa keeli kɔʼ buʼ kə tii kə. A ka ndɔm dza dzə ghə̂ ghən ghə bəghəm nə tə Klisto.

¹¹Koʼo na nghee sə̂ a kəmàʼlə ghən ngɔʼɔ downə tii! À loʼ ni dii tsu nə a tɔ̀ɔ mə n wɔ kuŋ kə.

¹²Ghə̂ ghey ghə dza nə̀ ghaa səghə tyi u ghaa, loʼ ghə̂ ghey ghə ləghə kə ni dii uwû nə ghə tɔʼɔ fwaʼa fwaʼ K-a-zə̀. Zuŋ kə ighəə key ghə ghəŋŋənə ghəə ghən loʼ nə̀, ghə tsəŋə nə̀ kə ghə̂ a nə chɔdlɔnə ghə, nə ghə naʼlə tûm nə Klisto â kpu n zat kə fəkaʼ ni bəghəshi aghə̂.

¹³Wû i ghə̂ ghən ghə loʼ nə ghə n səghə tyi u ghə wə, ghə naŋŋə way laŋ kə, ghə kee ləghə kə nə ghaa səghə tyi u ghaa, sey nə̀ ghə i ghaŋŋə wû zə nə̀ ghaa n bəghəm fu tə ghə.

¹⁴Abə mə, mə i kee ghaŋŋə kə uwû n ghəə ghey a shinə tə mə bòʼ və i Mûkəbii ə saa, Yeso Klisto n zat kə fəkaʼ. À loʼ bòʼ zat kə fəkaʼ n loʼnə tə a loʼ fə kə ivə tə ghəə a mbi ghə, ghəə a mbi ghə a kəm way soʼo n taŋ tə mə.

¹⁵Tə ghə səghə tyi kə kə̀ nkee ghə ka səghə, kweyyə kə loʼ way dzə n sə K-a-zə̀. Isəŋə loʼ kə nə̀, saa doʼo bə ghə̂ a fəghə ghə.

¹⁶Abə tə ghə̂ ghən ghə bweynə n jii zən, n gɔŋŋə nə̀ buulə i Kəzə̀ nsə sî i kwɔɔlə i wi zə i loʼ ghi ghə nsə n kow ghə̂ a Kəzə̀ ghə adzəm.[1]

¹⁷Ni ney nuu tsu nya, ndow n sə kə, i kə wù nə kəm fəmmə, bòʼ nə̀, tɔ̀ɔ tən n kow mə tə dii may bə nə̀ n loʼ kɔd kə Yeso.

¹⁸Waazə ghə, gɔŋŋə zuŋ i loʼ nə̀, ndzuŋ ə Mûkəbii saa Yeso Klisto, zə i loʼ ghi ghaa adzəm. A may kə sey.