Read Weh Efesus 4 Bible Online

Efesus 4 - Weh bible

Efesus 4

¹Mə wən n loʼnə wù ndaw tsaʼ boʼnə n fwaʼa tə̀ Mûkəbii, n buʼu bə kəwɔɔ tə̀ ghaa nə̀ ghaa i muu muu zey i kpiilənə tə̀ ghə̂ ghey Zə̀ kə sàynə ghə.

²Ghaa i muu tən kə nə ingɔɔmə, maʼlə tsu uwû, kwɔ keeli fə̀ŋ tə ghaa, tɔɔmə kɔʼɔ ndow wû i ghaa nə iləghə.

³Zay kə Zow kə n buulə fə̀ŋ tə ghaa tə nə̀ ghaa i loʼ n fə̂ kəmɔʼ. Sey, ndeemi tsu na wû zə ni muu tən kə nə kəfə kəmɔʼ tə̀ ghaa loʼnə nya.

⁴Saa dzəŋi loʼ tə̀ a loʼ wû u wù u loʼnə nə kəfə kəmɔʼ, Zay kə Zow kə u loʼnə kə kəmɔʼ tə̀ saa adzəm, ighələ tə̀ saa ghən adzəm Zə̀ kə tɔŋɔnə saa, saa ləmmənə fə kə mɔʼɔ kə.

⁵Saa khə mûkəbii umɔʼ, khə soʼo bəghəm i fə̀ŋ imɔʼ, saa dzəŋi ney mmuu n Kəzə̀ n zəd i wù umɔʼ.

⁶Saa khə soʼo Kəzə̀ kəmɔʼ, tə loʼnə Bày tə̀ ghəə a mbi ghə adzəm. Tə saʼa aghə̂ adzəm, loʼ nə aghəə adzəm, muu n fəŋŋə kə ghə̂ adzəm.

⁷À kee loʼ nə̀ Klisto dii kay wù saa n ndzuŋ n nəŋ n nəŋ, fuu saa n naamə kə tə̀ tə tsəm tsunə.

⁸À wən loʼ ghə i tii zə màʼlə K-a-zə̀ kə dzanə nə̀, “Nghee Klisto â kɔʼnə idəŋ idəŋ, Tə n ney ndəm aghə̂ tə â kwunə n tsam, Tə n fuu soʼo unaamə tə̀ ghə̂ ghə.”

⁹A bə a dza tsunə nə̀, “Tə â kɔʼ idəŋ idəŋ”, i dii tsu nə̀ ngee? I dii tsu nə̀, tə mâ tsu n dəŋə kə mbi kə itən kə?

¹⁰Sey, a loʼ Klisto wən tə â tsu bənə fa n mbi tə kɔʼ soʼonə idəŋ idəŋ, sey nə̀ tə i loʼ n badla tə mbi tədzəm.

¹¹À loʼ wi tə â fuunə naamə wən n dzəŋi kə dzûmə tə Klisto. Naamə u tii u loʼ nə̀, tə ghəŋə nə̀ ghə̂ a loʼ a doʼo ngəd tə wi, naŋa a loʼ ghə tə̀ a loʼ tûm tə Kəzə̀, naŋa a loʼ ghə tə̀ a loʼ ghə̂ ghən ghə bwey naʼlənə tûm i dzuŋu zə, naŋa a loʼ tə̀ a loʼ ghə fɔɔngili, naŋa soʼo a loʼ ghə nə̀ a loʼ ghə̂ dii ghə.

¹²Naamə wən u loʼ ni fuu kədaʼa tə̀ ghə̂ a Kəzə̀ ghə. Seynə ghə i loʼ ni fwaʼ fwaʼ kən Zə̀ kə fuu naŋanə tə̀ ghə, ghəŋŋə nə̀ Ndaw Kəzə̀ zən i loʼnə wû u Klisto wə idzəm, i nyim beyyə dzɔb tsu n ghəə a Kəzə̀.

¹³Fwaʼ K-a-zə̀ kən khə ni ndow kə sey ni ndow kuum n nəŋə zey saa adzəm i doʼo bənə nə kəfə kəmɔʼ n bəghəm i fə̀ŋ i saa nsə nə̀ saa tɔʼ keeli tsu wù wey Waa Kəzə̀ loʼ ghii kə. N nəŋə zey saa i tɔʼ beyyə tsunə n doʼo i saa ghi Klisto, saa i loʼ ni muu n jìi zey Klisto â muunə tii.

¹⁴Sey, saa i kəm way dzə tə̀ a loʼ aghinətəghə n bəghəm i fə̀ŋ i saa. Saa i kəm fwɔdlɔ way tə̀ a loʼ kəfən n dzuu, zəŋ maŋa tənnə kaabənə, zə n tən n bad kən, zə n kəm tən ndow n bad kə key, ghə̂ a tsìi ghə i way ni maŋ sìi ndzəŋ saa n tɔb u ghə u tsɔŋɔ wə.

¹⁵Saa khə ni fədlə ghɔɔmə kə isəŋə, khə iləghə n wû i saa sey nə̀ saa loʼ ni nyim doʼo bə tə̀ a loʼ Klisto, tə loʼnə tow kə saa kə.

¹⁶À loʼ Klisto tə təm naŋa dzəŋinə saa nə kəfə kəmɔʼ tə̀ a loʼ wû u wi, a loʼ wi tə zuŋŋə naŋa bənə saa. Sey, abə badla tə uwû tə saa tədzəm tə fwaʼa dzɔbənə n dəŋə kə ghə, gaamə tiilə iwû, wû udzəm wə n nyîmmə dzɔbə nə iləghə.

¹⁷À wən loʼ ghə i tii zə n dza i ghɔɔmə bə tə̀ ghaa n daʼa kən Mûkəbii fuunə tə̀ mə, tɔʼɔ zəllə tsu na. I kə̂ ghaa nə̂ kəm muulənə tə̀ a loʼ ghə̂ ghey ghə ka bəghəm tə̀ Zə̀ kə, ghə moʼlə kə ndzoʼo ghəə ghey a gaamə way wù.

¹⁸Fə̀ŋ tə ghə tə zowkeeli way ghə i loʼ zə n ghəə a Kəzə̀, ghə khə soʼo way wɔɔ kə n muu zən Zə̀ kə fuunə, n təŋkey, ghə khə way ghə i loʼ zə, taw soʼo n tow kə.

¹⁹Ghə kəm khə way tow kə dədlə kə, ghə n wû i ghə fuu may nyi ndow ni ghəŋŋə ghəə a dzəə ghə, tɔʼ ngii khə zay n ghəə a tii ghə.

²⁰À wən way dzə ghəə ghey ghaa â zoʼlənə kuum Klisto.

²¹N khənu nə̀ ghaa zownu ghəə ghə kuum Klisto, ghaa n zoʼlə shi kɔʼ isəŋə zən i loʼnə kuum Yeso Klisto.

²²Ghə â zoʼlə ghaa nə̀ ghaa khə ni tuu maʼa muu i ghaa i wey zey ghaa muu tsənə tii. Muu i tii i nəbə ghaa nə̀ ghaa i ghəŋŋə ghəə a bəbə ghə, tɔʼɔ weyyə ghaa n fə̀ŋ.

²³Ghaa khə ni fu ndow wû i ghaa tə̀ Zay K-a-zə̀ kə nə̀ kə kweyyə bə fə̀ŋ tə ghaa, ghaa doʼo bə ghə̂ a fəghə ghə.

²⁴Ghaa khə ni muu muu i fəghə zə, muu zey i loʼnə tə̀ a loʼ muu i Kəzə̀, sey nə̀, ghaa i ndzəm loʼ tsətsəghə, zow n muu i ghaa.

²⁵A wey loʼ ghə i tii zə, ghaa khənə ni tuu maʼa ghəə a badla ghə. Ghaa i ghɔɔmə isəŋə n wû i ghaa, boʼnə saa dzəŋi loʼ nə kəfə kəmɔʼ n doʼo i saa ghi Klisto.

²⁶Abə wə fəələnə nəghə wə, ka bəghəm nə nəghə u fəə u tii u ghəŋə wɔ nə̀ wə ghəŋə ghə i bəbə zə. Ka bəghəm soʼo nə̀ ghab kə ngii shi, tsuʼ u bə dzə nə̀ wə nam fəələ kə unəghə.

²⁷Kə̂ wə nə̂ fuunə buʼ kə tə̀ vəətsəə ghə nə̀ a chimmə wɔ nə̀ wə ghəŋə bəb.

²⁸Wù wey tə â tsɔŋɔ tsənə, khə ni maʼa mwam u tsɔŋɔ wə. Tə khə ni fwaʼa fwaʼ kə səŋi kə n wɔɔ a wi ghə, sey nə̀, tə i mbɔŋ loʼ ni gaamə ghə̂ ghey ghə laʼanə.

²⁹I kə ghɔɔmə i dzəə i nə̂ shiənə n dzuu i ghaa, a may kə ghɔɔmə zey i bəghənə ghə̂ ghə n muu i ghə, sey nə̀, ghəə ghey ghaa ghɔɔmənə, ghə i fuu gaamə zə tə̀ ghə̂ ghən ghə zəllənə ghəə ghey ghaa dzanə.

³⁰Kə ghaa nə̂ ghəŋŋənə nə̀ Zay kə Zow kə i mow n jìi zey ghaa muunə a tii. Zay kə Zow kə loʼ tə̀ a loʼ tsəə Zə̀ kə kuu naŋanə n kow ghaa ni dii tsu nə̀ ghaa loʼ ghə̂ a wi ghey tə i bəghəshiənə fa mbi abə nəŋə i kpii bənə.

³¹Ghaa khə ni buu naŋa ni khə nyiʼi fə n fə̀ŋ, ghaa buu naŋa fəmbow, ghaa buu naŋa soʼo nəghə u fəə wə. Kə ghaa nə̂ keelinə zuu zə. Kə̂ ghaa nə̂ kpaalənə ghə̂ ghə, bəəbə kaabə zəd a ghə. Kə ghaa nə̂ zuŋŋə naŋanə moʼlə tə bəbə tə n fə̀ŋ tə ghaa.

³²Ghaa fəd khə ni ghəŋŋə ndzuŋ n wû i ghaa, buulə ghəŋŋə aghəə, neyzəə tûmmə iwû, ighələ tə̀ Zə̀ kə neyzəənə bəb i ghaa zə n bam i Klisto.