Read Weh Efesus 5 Bible Online

Efesus 5 - Weh bible

Efesus 5

¹Ghaa khə ndeemi tsu iwû ni ney ghow kə ibwey K-a-zə̀, n təŋkey, ghaa loʼ waa a wi ghən tə ngii ləghənə.

²Ghaa khə ni khə ləghə zə n wû i ghaa, ighələ tə̀ Klisto â ləghənə saa, tə n fuu nuu ndow muu i wi ni kpu n tow u saa. Tə n fəələ ndow wû u wi tə a loʼ maʼlə u ləmmə dzɔbə wə tə̀ Zə̀ kə.

³Kə ghaa nə̂ ghəŋŋənə ghəə a laŋŋə ghə nsə mwam u dzəə wə. Kə ghaa nə̂ shiənə n sə̂ zə n fə̂ u ghə. Ndzoʼo ghəə ghən a khə way ni shiə n fəŋŋə kə ghaa, kə̂ ghə nə̂ buʼu zəŋŋənə nə̀ ndzoʼo ghəə ghən a shiə n fəŋŋə kə ghaa, n təŋkey, ghaa loʼ ghə̂ a Kəzə̀ a zow ghə.

⁴Maʼa na ghɔɔmə i dzəə zə, ghɔɔmə i bəbə zə nsə laʼlə kə isə̀ kə. Ghaa khə ni fədlə fuu ndow zɔŋŋə K-a-zə̀ kə n ghəə ghey tə ghəŋənə tə̀ ghaa.

⁵Keeli tsu na nə̀ wù wey tə laŋŋənə nsə wù wey tə khənə mwam u dzəə wə, i zə̂ dzə way fɔɔ u Klisto wə nsə u Kəzə̀ wə, ghi wù wey tə shiənə n sə̂ zə n fə u ghə, n təŋkey, wù wey tə shiənə n sə̂ zə sey ney naŋa bə fə̂ u mbi tə̀ a loʼ Zə̀ kə wi.

⁶Kə wù i nəb ghaa n ghɔɔmə i zum zə nə̀ Zə̀ kə i chɔd way ghə̂ ghey ghə ghəŋŋənə ndzoʼo ghəə ghən, n təŋkey, Zə̀ kə î chɔdlɔnu ghə̂ ghey ghə naŋŋə way laŋ u wi wə.

⁷Sey, i kə ghaa nə̂ dzûmənə ghow kə ibwey kə ndzoʼo ghə̂ ghən.

⁸Keeli tsu na nə̀ ghaa â buʼ loʼ tsə nə kələm, ghaa nya loʼ nə utsə̀ n təŋkey, ghaa loʼ nə kəfə kəmɔʼ ghi Mûkəbii. Sey, i ghəŋŋə ndow na ghəə ghey a kpiilənə tə̀ a loʼ ghə̂ ghey ghə muunə nə̀ utsə̀,

⁹kuum nə̀, abə wù muunə nə ustə̀, tə n ghəŋŋə ndzuŋ, loʼ tsətsəghə, fwaʼa nə isəŋə.

¹⁰Sey, ghaa ndəmi tsu iwû ni kəŋ shi kɔʼ ghəə ghey a dzɔbənə tə̀ Mûkəbii, ghəŋŋə ndow ghəə a tii ghə.

¹¹Kə ghaa nə̂ dzəələnə wɔɔ a ghaa ghə n ghəə a bəbə ghey a tsəghənə nə kələm, n təŋkey, ghəə a tii a khə way gaamə i loʼ zə. Ghaa fəd khə ni chi dii ghəə a tii ghə n mgbaŋ.

¹²Kuum nə̀, à loʼ tow kə dədlə kə ni bùʼ khəə ghəə ghən ghə̂ a ghəŋŋənə nə kələm.

¹³Abə ghaa naŋa bənə ghəə ghən adzəm nə utsə̀, ghə̂ ghə i tɔʼ koʼ tsu ghəə a tii ghə, n təŋkey, tsə u baŋa bə tii.

¹⁴Kuum nə̀, a loʼ utsə u ghəŋŋənə nə̀ ghəə a doʼo bə n mgbaŋ. À wən loʼ ghə i tii zə ghə dzanə nə̀, “Nuu kɔʼ idəŋ, wɔ wən wə bweelinə, Zhəm nuu dzəŋŋə bə nə ivə. Tsə u Klisto wə i baŋa n kow wɔ.”

¹⁵Sey, ney na ghə̂mə zə n jìi zey ghaa muunə tii. Kə ghaa nə̂ muulənə tə̀ a loʼ ghə̂ a laʼlə ghə, ghaa khə ni muu tə̀ a loʼ ghə̂ ghən ghə khənə tɔb wə.

¹⁶Ghaa khə ni ghəŋŋə ndow ghəə a səŋi ghə n nəŋə zey ghaa khənə, n təŋkey ghəə a bəbə a kəmənu nya.

¹⁷Sey, Kə ghaa nə̂ muulənə tə̀ a loʼ ghə̂ a laʼlə ghə, ghaa fəd khə ni zowkeeli tsu ghəə ghey Mûkəbii ləghənə nə̀ ghaa i ghəŋŋə, ghaa n ghəŋə ndow ghəə a tii ghə.

¹⁸Kə ghaa nə məə khəənə lə mə, n təŋkey, lə n ghəŋŋə wù tə n dzəŋsə ghəŋŋə aghəə. Ghaa fəd khə ni ghəŋə nə̀ Zay kə Zow kə i tali ghow kə ibwey kə ghaa kə.

¹⁹Ghaa khə ni ghɔɔmə tiilə n wû i ghaa nə təndzaŋa, zhim ndzaŋa tən tə fuunə kɔʼləmə tə̀ Zə̀ kə, nsə ndzaŋa tey Zay kə Zow kə fuunə tə̀ ghaa. Ghaa khə ni zhim dzaŋa tən tə fuunə kɔʼlə mə tə̀ Mûkəbii n fə̀ŋ tə ghaa tə tədzəm,

²⁰fuu kəzɔŋŋə tə̀ Zə̀ kə, tə loʼnə Bày saa nəŋə tədzəm, n fə wən udzəm tə fuunə tə̀ saa n zəd i Mûkəbii Yeso Klisto.

²¹Ghaa khə ni zow tə̀ waazə a ghaa ghə ni dii tsu nə̀ ghaa ndzəmə ngɔɔmənu Klisto.

²²Ghaa gheyzən ghən ghaa khənə num ghə, ghaa khə ni zow tə̀ num a ghaa ghə, ighələ tə̀ ghaa zownə tə̀ Mûkəbii.

²³Kuum nə̀ weynum wən tə khənə wey loʼ kətow tə̀ wey wi ighələ tə̀ Klisto loʼnə tow kə n dzəŋi kə dzûmə tə Klisto. Dzûmə tə Klisto tədzəm tə loʼ tə̀ a loʼ wû u Klisto. Klisto loʼ wù wey tə bəghəshiənə ghə̂ a Kəzə̀ ghə adzəm.

²⁴Sey, nghee tə̀ dzəŋi kə dzûmə tə Klisto kə zownə tə̀ Klisto, a loʼ ighələ gheyzən a khənə ni zow tə̀ num a ghə ghə nə aghəə adzəm.

²⁵Abə ghaa gheynum ghən ghaa khənə ghey ghə, ghaa khə ni ləghə ghey a ghaa ghə, ighələ tə̀ Klisto â ləghənə ghə̂ a ndaw Kəzə̀ ghə a tii, tə n fuu ndow wû u wi ni kpu n tow u ghə.

²⁶Tə â ghəŋə ghə i zən ni ghəŋə nə̀ ghə̂ a ndaw Kəzə̀ ghə i zow n sə̂ kə wi. Tə n sow maʼa tsu bəb i ghə n ghɔɔmə i Kəzə̀ tə̀ tə nə sownə nə mmuu.

²⁷Sey nə, ndaw Kəzə̀ i loʼ n sə kə wi nə̀ i nyiələ dzɔbə, khə way dzə u loʼ wə, njuʼlə way soʼo. Zə i loʼ nə̀ zow dzɔbənu khə soʼo way bəb i loʼ zə.

²⁸Gheynum a khə ni ləghə ghey a ghə ghə ighələ tə̀ ghə ləghənə wû i ghə zə. Wu wey tə ləghənə wey wi sey ləghə soʼonu wû u wi.

²⁹Wu loʼ way dzə tə baanə wû u wi. Wù fədlə laalə dzɔbə tə̀ wû u wi, chiə dzɔbə tsu wû u wi. A wey loʼ nghee tə̀ Klisto laalənə tə̀ ghə̂ a ndaw Kəzə̀ ghə.

³⁰Saa u loʼnə tə̀ a loʼ ubad u zuŋŋə doʼonə n wû u wi.

³¹I loʼ tə̀ i tɔɔ doʼonə n màʼlə K-a-zə̀ nə̀, “À wən loʼ ghə i tii zə weynum khənə ni zəghə tsu bày wi ghi nay wi, tə təmdzəŋi kɔʼ ghi wey wi, tow ghə ubəghə, ghə doʼo bə wù umɔʼ.”

³²Ndəmə aghəə a nyì doʼonu n ghɔɔmə zən, n kee dza bə ni dii bə nghee tə doʼo i Klisto ghi ghə̂ a ndaw Kəzə̀ i loʼnə tii.

³³I kee loʼ nə̀, wù khə ni ləghə wey wi tə̀ tə ləghənə wû u wi, wey khə ni zow tə num wi.