Read Weh Efesus 6 Bible Online

Efesus 6 - Weh bible

Efesus 6

¹Ghinətəghə ghə, ghaa khə ni zow tə̀ ghə bày a ghaa ghə tə̀ a loʼ ghə̂ ghey ghə bəghəmnə tə̀ Mûkəbii, n təŋkey, à wən loʼ ghəə zey i kpiinə tə̀ ghaa ni ghəŋə.

²Laŋ K-a-zə̀ kə dza nə̀, “I ngɔɔmə bày wə ghi nay wə.” À wən loʼ laŋ kə sə̂ isə kə Zə̀ kə fuunə, təb naŋa tsu ighəə tii.

³Tə təb naŋa nə̀, “Abə ghaa ghəŋŋənə sey, ghəə a ghaa ghə bwey dzɔbə, ghaa ndzəm i muu kow tsu fa n mbi.”

⁴Ghaa ghə bày a waa, kə ghaa nə̂ ghəŋŋə nə̀ waa a ghaa ghə i fəələ nəghə wə. Ghaa fəd khə ni ney kɔʼ bə ghə n tsə̀ i dzuŋu zə, dəŋə ghə n mwam wən Mûkəbii ləghənə.

⁵Abə ghaa ghə̂ a kəfwaʼ ghə, ghaa khə ni zow ndow tə̀ ghə mûkəbii a ghaa ghey ghaa khənə fa mbi. Ghaa khə ni tsəŋə ghə, fuu ghə n ngɔɔmə zə, fwaʼa ndow tə̀ ghə n fə̀ŋ i dzuŋu zə tə̀ ghaa fwaʼa tə̀ Klisto.

⁶Kə ghaa nə̂ fwaʼa kənə n nəŋə zey wù tii laalə bənə ghaa. Ghaa i fədlə fwaʼa ndow tə̀ a loʼ ghə̂ a kəfwaʼ a Klisto, ghəŋŋə ndow ghəə zey Zə̀ kə ləghənə n fə̀ŋ tə dzuŋu tə.

⁷Ghaa khə ni fwaʼa ndow fwaʼ kə ghaa kə nə iduʼlə, fwaʼa ndow tə̀ ghaa fwaʼa tə̀ Mûkəbii, a way dzə tə̀ wù sɔŋtsuʼ.

⁸Keeli tsu na nə̀ Mûkəbii i fuu kənaamə tə̀ kay wù n fwaʼ kə dzuŋu key tə fwaʼanə, nə̂ wə loʼ wù kəfwaʼ nkee wə way wù kəfwaʼ.

⁹Ghaa ghən ghaa khənə ghə̂ a kəfwaʼ ghə, ghaa khə ni bɔɔmə muu soʼo sey ghi ghə̂ a kəfwaʼ a ghaa ghə. Kə̂ ghaa nə̂ biinə ghə. Keeli tsu na nə̀ ghaa ghi ghə̂ a kəfwaʼ a ghaa ghə, ghaa dzəŋi loʼ ghə̂ a kəfwaʼ n tənə Mûkəbii wən tə loʼnə idəŋ. Tə saʼa aghə̂ adzəm ighələ, badla way kpey wə.

¹⁰Ni guŋ kɔʼ, ghaa khə ni taw n doʼo i ghaa ghi Mûkəbii nsə n daʼa kə nii key tə fuunə.

¹¹Dzəŋə kɔʼ na fə u tsam wən udzəm Zə̀ kə fuunə, sey nə̀, ghaa i loʼ ni təm zə̂ abə vəətsəə a bənə n ghəə a tsɔŋɔ a wi ghə ni bə kɔɔbə ghaa.

¹²N təŋkey, saa zùulə baalə dzə way ghi wù sɔŋtsuʼ. Saa zùulə baalə ghi zay u bəbə wən u loʼnə tə̀ a loʼ udə̀ŋ fa mbi, zay u bəbə wən u loʼnə tow kə n ghəə ghən a tsəghənə nə kələm, daʼa u bəbə wən u saʼanə ghəə a mbi ghə, nsə sə̀ghə̀ n bəbə mən n loʼnə idəŋ.

¹³À wən loʼ ghə i tii zə ghaa khə ni dzəŋə kɔʼ fə u tsam wən udzəm Zə̀ kə fuunə, sey nə̀, abə tsuʼ fə bəbə fə i bənə, ghaa i loʼ ni təm zə̂ ghə̂ a təngəmə a ghaa, nsə nə̀ abə ghaa təm zə̂ kɔʼnə ghə, ghaa i nam khə daʼa kə ni təmi taw tsu n bəghəm i ghaa.

¹⁴Sey, təmi taw tsu na n bəghəm i fə̀ŋ i ghaa. Kow keeli tsu na isəŋə tə̀ a loʼ fəkwɔɔ nə isad, muu i ghaa i tsətsəghə zə i loʼ tən ni kə̀ŋ naŋa kəmmə kə ghaa.

¹⁵Təmi kɔʼ na ni naʼa tûm i dzuŋu zən i ney bənə buulə zə ighələ tə̀ sawgoʼ tə tey tən n gow tə nə ifuu ni soʼ tsam.

¹⁶Ghaa khə ni khə tən bəghəm i fə̀ŋ i ghaa tə a loʼ baʼa kə tsam, sey nə̀ ghaa i loʼ ni baʼ maʼa ghɔŋ ghən vəətsəə a təmə bənə ghaa tii.

¹⁷Dzəŋə keeli kɔʼ na bəghəshi i ghaa zə nə kətow tə̀ a loʼ kətaŋŋə ni kə̀ŋ naŋa tow kə ghaa. Ghaa ney kɔʼ ghɔɔmə i Kəzə̀ tə̀ a loʼ kɔb zən Zay kə Zow kə fuunə tə̀ ghaa.

¹⁸Ghaa khə ni ghəŋŋə ghəə ghən, gɔŋŋə nəŋə tədzəm, nə təjìi tədzəm, nɔɔ ndow igaamə tə̀ Zə̀ kə, gɔŋŋə nəŋə tədzəm tə̀ Zay kə Zow kə fuunə ghaa n daʼa kə. Sey, ghaa khə ni tey tən n fuu zə, kə̂ ghaa nə̂ buu doʼlənə ni gɔŋŋə, gɔŋŋə tə̀ ghə̂ a Kəzə̀ adzəm.

¹⁹Ghaa i gɔŋŋə soʼo tə̀ mə, nə̀ Zə̀ kə fuu mə n ghəə zey n khə ni dza, abə buʼ kə shinə tə̀ mə ni ghɔɔmə, sey nə̀ mə i loʼ ni chi dii ghəə ghən a nyi doʼonə n tûm i dzuŋu zə n fə̀ŋ idzəm nə̀ n khə way tsəŋ i loʼ zə.

²⁰Kuum nə̀ a loʼ bòʼ tûm i dzuŋu zən n loʼnə wù tûm ə klisto. N fa loʼ n ndaw tsaʼ bòʼ i ghii. Sey, gɔŋŋə na nə̀ mə i khə fə̀ŋ ni naʼlə tûm i tii zə tə̀ n khənə ni naʼa nə̀ n khə way tsəŋ i loʼ zə.

²¹Taychikus, tə loʼnə waazə ə saa wən saa ngii ləghənə, tə fwaʼanə tə̀ Mûkəbii n fə̀ŋ ə wi idzəm, î tɔʼɔ tiilə dza bənu ghəə ghə adzəm tə̀ ghaa. Sey nə̀, ghaa tɔʼ keeli tsu nghee tə̀ n loʼnə tii nsə fwaʼ key n fwaʼanə.

²²À wey loʼ zuŋ key n tûm bənə wi n səə ghaa nə̀ ghaa keeli tsu nghee ghey muunə tii nsə nə̀ tə kuu bə soʼo fə̀ŋ tə ghaa.

²³N gɔŋŋə nə̀ Zə̀ kən kə loʼnə bày saa nsə Mûkəbii ə saa Yeso Klisto, ghə fu ghaa n buulə zə, kə buulə soʼo ghə̂ a Kəzə̀ adzəm, kə ghəŋə nə̀ ghaa i ləghə wû i ghaa zə ghi bəghəm i fə̀ŋ zə.

²⁴N gɔŋŋə nə̀ ndzuŋ ə Kəzə̀ i loʼ ghi ghə̂ ghən adzəm ghə ləghənə Mûkəbii ə saa Yeso Klisto n fə̀ŋ tə ghə tə tədzəm.