Read Weh Filipi 2 Bible Online

Filipi 2 - Weh bible

Filipi 2

¹Nghee ghaa loʼnə nə kəfə kəmɔʼ ghi Klisto, i kuunu fə̀ŋ tə̀ ghaa tə ə? Ləghə zən tə khənə n kow ghaa tsəmmənu ghaa a? Zay kə Zow kə naŋŋənu ghaa nə kəfə kəmɔʼ ə? Ləghə zən Klisto khənə n kow ghaa ghəŋŋənu nə ghaa i khə ləghə zə n wû i ghaa, khə soʼo sî i kwɔɔlə zə ə?

²Ghaa sey ghəŋŋə nə̀ mə î ngii khə duʼlə zə n muu i ghaa. Ghaa i loʼ n fə̂ kəmɔʼ n moʼlə tə ghaa, khə ləghə zə iwû, khə fə̀ŋ imɔʼ, ghəŋŋə ndow aghəə n dzə̀ imɔʼ.

³Kə̂ ghaa nə̂ ghəŋənə ghəə ghə nə̀ ghaa moʼlə tsu kə wû i ghaa, nkee ni maŋ dii iwû. I fəd khə na ngɔɔmə zə, koʼo ndow na ghə̂ a loʼ ghə tə a loʼ ghə̂ ghey ghə tsəghəshinə ghaa.

⁴Kə̂ ghaa nə̂ laalə tsu kənə ghəə ghey a dzɔbənə tə ghaa, i laalə ndow na ghəə ghey a dzɔbənə tə ghaa, dzɔbə soʼo nə tə ghə̂ a loʼ ghə.

⁵Ghaa khə ni bɔɔmə khə ndzoʼo mwam wey Klisto â khənə n wû i ghaa.

⁶Nghee tə â buʼ loʼ kə tə à loʼ Kəzə̀, Tə n ka tsəm moʼlə koʼ ni wû u wi nə̀ i loʼ ighələ tə a loʼ Kəzə̀.

⁷Tə n fəd tsuulə tsu wû u wi, naŋa ndòw daʼa wey tə â khə idəŋ tə a loʼ Kəzə̀, Doʼo bə tə̀ a loʼ wù kəfwaʼ, ghə n ji bə wi tə̀ a loʼ wù sɔŋtsuʼ, Tə n keeli tsu soʼo wû u wù sɔŋtsuʼ.

⁸Nghee tə doʼo bə n wû u wù sɔŋtsuʼ, Tə n tsuulə tsu wû u wi, naŋŋə laŋ u Kəzə̀, Bùʼ bəghəm daŋŋə ni kpu, Tə n kpu tsu nə̀ ghə wi baa n zat kə fəkaʼ.

⁹Sey, Zə̀ kə n ney kɔʼlə naŋa nay kɔʼ ndow wi idəŋ idəŋ, N luʼu key kə tsəghəshi luʼu tə tədzəm. Tə n fu wi n zəd i nii zə, Zəd zey i tsəghəshinə zəd ghə adzəm.

¹⁰Sey nə̀, n zəd i Yeso, Aghə̂ adzəm idəŋ nsə fa a ghəlitsə, Nsə n tənə kəghəlitsə, ghə i təmə tənguʼ, ghə ngɔɔmə zəd Yeso.

¹¹Nsə nə̀, aghə̂ adzəm ghə i dza shiə bə mgbaŋ nə̀ Yeso Klisto loʼ Mûkəbii, Ni fuu ndow nkɔʼlə tə̀ Zə̀ kə tə loʼnə Bày saa.

¹²Waazə ghuŋ a dzuŋu ghə, nghee tə̀ ghaa naŋŋə tsənə laŋ u Kəzə̀ wən mə â diinə ghaa tii n nəŋə zey saa â nam dzəŋi loʼ tsənə. Sey nya, abə n loʼ ghi ghaa nkee n way, dzɔb loʼ nə̀, ghaa ndow kə n sə kə ni naŋŋə laŋ u tii wə. Ghaa khə ni fwaʼa kɔʼɔ ndow n tsəŋ i Kəzə̀ n jìi zey ghaa loʼ ni keeli ibəghəshi tii.

¹³Ghaa keeli tsu nə̀ a loʼ Kəzə̀ kə fwaʼanə n kow ghaa, ghəŋə ghaa nə̀ ghaa i khə zay ni fwaʼ tə wi, fuu soʼo ghaa n daʼa kə nə̀ ghaa ghəŋə ghəə ghey a kpiilənə tə wi.

¹⁴I fwaʼa ndow na ghəə ghə adzəm nə̀ ghaa nyuŋŋə ghɔɔmə way, zuulə soʼo way tii.

¹⁵Sey nə̀ ghaa i zow, khə way bwu i loʼ zə. Ghaa i loʼ waa a Kəzə̀ ghey ghə khə way dzə̂wə n fəŋŋə kə mbi i bəbə zən doʼo i ghə i gaŋa doʼonə, way tsətsəghə. Ghaa khə ni teeli baŋa tə a loʼ nsəghəbələ n fəŋŋə kə ghə̂ a bəbə ghən fa n mbi.

¹⁶Kwu keeli taw tsu na ghɔɔmə i Kəzə̀ zən i fuunə muu zə itsali zə, sey nə̀ n tsuʼ fey Klisto î bəghənə tii, mə̀ i ghaŋŋə wû wə nə̀ fwaʼ kən mə fwaʼ ngəə tsəghə bənə, mə â ka fwaʼ maʼa dzə nə kənunu.

¹⁷Sey, abə n tsəm ney fə̀ələ tsu kə nə kaŋ tuŋ tə tə̀ a loʼ umaʼlə n fwaʼ kən ghaa fwaʼanə bòʼ bəghəm i fə̀ŋ i ghaa tə Zə̀ kə, mə i nam duʼlənu, mə î saŋŋə ghi ghaa adzəm.

¹⁸À loʼ soʼo ighələ ghaa khə ni duʼlə, saŋŋə dzəŋi ghi mə.

¹⁹N moʼlə nə̀ n daʼa kə Mûkəbii Yeso, mə î kuʼlə tûm bənu Timoti n səə ghaa, fə̀ŋ zuŋ i nyaʼi kay tsu abə mə i zownə nghee ghaa loʼ nə tii.

²⁰N kəm khə way wù loʼ tə̀ a loʼ wi, tə ndzəm khənu fə̀ŋ n kow ghaa.

²¹Ghə̂ a loʼ ghey adzəm, kay wù laalə tsu kə ghəə a wi, laalə way ghəə a Yeso Klisto ghə.

²²A kee bə Timoti, ghaa khənu nə̀ tə n dii fwaʼ kə wi kə, tə n fwaʼ ghi mə tə̀ waa nə̂ fwaʼanə ghi bày ni naʼa tûm i dzuŋu zən.

²³Sey, n moʼlə nə̀ mə î tûm bənu wi n səə ghaa abə n koʼ tsunə nghee ghəə ghə î bweynə tii ghi mə.

²⁴N khə bəghəm i fə̀ŋ nə̀ abə Mûkəbii bəghənə, mə î kuʼlə bəghə koʼonu ghaa n wû wuŋ wə.

²⁵N kee moʼlə nə̀ i dzɔbənu nə̀ n tûm bə dzə Epafroditus n səə ghaa, tə loʼ waazə wuŋ n dzəŋi kə dzûmə tə Klisto, tə loʼ wù wey tə fwaʼa dzəŋinə ghi mə, kəm loʼ dzəŋi soʼo sawgoʼ ghi mə ni naʼa tûm i dzuŋu zə. À loʼ wi ghaa â tûm bənə n səə mə̀ nə̀ tə bə fu mə n gaamə zə.

²⁶Tə n ngii mbuŋŋə ni bə koʼ ghaa, fə̀ŋ n ngii fəmmə soʼo wi, n təŋkey, ghaa mâ zow nə̀ tə â dzaŋanu.

²⁷Tə mâ ndzəm dzaŋ, nɔb sa tə̀ tə â kpu. Zə̀ kə n kee kwɔɔlə isî n kow wi, nsə n kow mə̀, nə̀ kə̂ ghəə ghuŋ a nə̂ dow kpiʼinə. Zə̀ kə â ghəŋə sey nə̀ kə mə̀ î ngii mow.

²⁸N ndzəmə ləghənu ni tûm nuu bə wi n səə ghaa, sey nə̀ abə ghaa koʼnə wi, ghaa i ngii keeli iduʼlə, mə̀ i khə soʼo way fəmmə kə n fə̀ŋ zuŋ.

²⁹Abə tə i bənə, kpii ney na wi nə iduʼlə tə̀ a loʼ waa Kəzə̀. Ghaa khə ni ngɔɔmə ndzoʼo ghə̂ ghey.

³⁰Tə â kay n fə̀ŋ n muu i wi, nɔb tə i kpu daŋŋə bòʼ fwaʼ kə Klisto kən tə fwaʼanə ni fu gaamə zey ghaa a way ni fuu n mgbaŋ.