Read Weh Kolose 1 Bible Online

Kolose 1 - Weh bible

Kolose 1

¹À màʼlə kən tɔ̀ɔ bə mə Pɔl, ngəd ə Yeso Klisto wən Zə̀ kə â say kɔʼnə. N màlə kən tɔ̀ɔ bə nə n loʼ dzəŋi ghi waazə ə saa Timoti.

²N màʼlə kən tɔ̀ɔ bə tə ghə̂ a Kəzə̀ ghən ghə bəghəm nə tə Klisto n naʼ i Kolose. N gɔŋŋə nə̀, Zə̀ kə, tə loʼnə Bày saa, tə fuu ghaa n ndzuŋ nsə buulə zə.

³Nəŋə tədzəm abə ghey gɔŋŋənə, ghey buu way ni fuu kəzɔŋŋə tə Zə̀ kə tə loʼnə Bày Mûkəbii saa Yeso Klisto.

⁴Ghey fuu kəzɔŋŋə tə Zə̀ kə n təŋkey, ghey n zow bəghəm i fə̀ŋ i ghaa zə n kow Yeso Klisto nsə nə ghaa khə iləghə tə ghə̂ a Kəzə̀ ghə adzəm.

⁵Bəghəm i fə̀ŋ zən nsə ləghə zən ghaa khənə loʼ n təŋkey ghaa ləmmə tənə ni keeli naamə kən Zə̀ kə naŋanə tə ghaa n fɔ̀ɔ wə idəŋ wə. Ghaa â keeli ndzoʼo moʼlə zən n nəŋə zey ghaa â bəghəmnə tûm i dzuŋu zən kuum Yeso Klisto i loʼnə isəŋə.

⁶Tûm i dzuŋu zən zaamə n fəŋŋə kə ghaa tə i zaamə nə n mbi idzəm, ni ney nuu bə n tsuʼ fey ghə â naʼa tûm i dzuŋu zə tə ghaa, ghaa n zow, ndzəm zowkeeli tsu ndzuŋ zən Zə̀ kə khənə n kow ghaa.

⁷Â loʼ Epafras tə â tiillə dza bənə ndzuŋ ə Kəzə̀ zən tə ghaa. Tə loʼ wù kəfwaʼ wən ghi wi dzəŋi fwaʼanə. Epafras wən ghey ngii ləghənə, fwaʼa tə Klisto n fə̀ŋ ə wi idzəm bòʼ saa.[1]

⁸À loʼ soʼo wi tə â tiilə dza bə nə tə ghey nghee Zay kə Zow kə ghəŋənə nə̀ ghaa i khə ləghə zə n wû i ghaa.

⁹À wey loʼ i ghi ni ney nuu bə n tsuʼ fey ghey â zow tsu zɔŋ u ghaa wə, ghey ka kam buu naŋa koʼ ni gɔŋŋə n tow u ghaa nə Zə̀ kə gaamə nə̀ ghaa i loʼ ni keeli ghəə zey tə ləghənə. Tə fuu ghaa n tɔb wə, nsə daʼa kə Zay kə Zow kə nə ghaa i loʼ ni zowkeeli dzɔb ghəə a tii ghə.

¹⁰Abə i loʼnə sey, saa i loʼ ni muu ndzoʼo muu zey Mûkəbii ləghənə, ghəŋŋə ndow ghəə ghey a dzɔbənə n sə kə wi nəŋə tədzəm. Ghaa i nyîmmə n ghəə a dzuŋu ghən ghaa ghəŋŋə, nyîmmə soʼo n jìi zey ghaa zowkeelinə Zə̀ kə a tii.

¹¹N gɔŋŋə soʼo nə̀, Zə̀ kə, tə khənə daʼa wə udzəm, tə fuu ghaa n daʼa kə wi kə, sey nə̀ ghaa loʼ ni təmi taw n bəghəm i fə̀ŋ, kow fə̀ŋ nə aghəə adzəm.

¹²Ghey gɔŋŋə nə̀ ghaa i khə duʼlə zə[2] n fə̀ŋ tə ghaa naʼ idzəm, fuu kəzɔŋŋə tə Zə̀ kə nəŋə tədzəm, n təŋkey tə n ghəŋə nə̀ ghaa doʼo n taŋ a ghə̂ ghən ghə i zə̂ənə fə wən tə təb naŋanə tə̀ ghə̂ ghən ghə loʼnə n fɔ̀ɔ u kədaa.

¹³Tə u bəghəshinə saa n daʼa k-a-ləm, ney nyi bə saa n fɔɔ u Waa wi wən tə ngii ləghənə.

¹⁴Tə u kùmshinə saa, neyzəə soʼo bəb i saa n bam i Waa wi.

¹⁵Klisto loʼ fiilə K-a-zə̀ nə aghəə adzəm, tɔŋŋə Zə̀ kən a koʼo way. Tə Zə̀ kə ni bɔm mbi, à n loʼ nə waa wi loʼ zeynu, tə u loʼ nə tow kə n fə u mbi udzəm.

¹⁶Zə̀ kə â ney waa wi ni bɔm ufə̂ udzəm idəŋ nsə fa a ghəlitsə. À bɔm wi fə wən a loʼ ni koʼ nsə u wən a way ni koʼ. Â bɔm wi tsətəndəghə tə Kəzə̀ tə nsə zay wən u loʼnə n luʼu tə usəghə idəŋ nsə zày wən u saʼanə fa n ghəlikətsə. Zə̀ kə â ney wi ni mbi idzəm, tə n bɔm mbi ə tii tə̀ wi.

¹⁷Sey, Klisto â loʼ zeynu tə Zə̀ kə ni bɔm ufə udzəm fa n mbi, tə n ney wi ni sət naŋa ufə udzəm n luʼu tən u loʼ nə tii.

¹⁸Klisto loʼ tow kə dzəŋi kə dzûmə tə Klisto, i loʼnə wû u wi wə. À loʼ wi wù sə isə Zə̀ kə â zhəm dzəŋŋə bənə nə ivə ni ghəŋə nə̀ tə i loʼ tow kə nə aghəə adzəm.

¹⁹Â tsəm Kəzə̀ ni ghəŋə nə̀ Klisto waa wi, i bɔɔmə loʼ tə a loʼ wi nə aghəə adzəm.

²⁰Zə̀ kə â neynə waa wi ni ghəŋə nə̀ fə wən udzəm u loʼ nə fa n mbi, u doʼo dzəŋŋə bə n tənə wi. Â loʼ n bam i kàŋ tə waa wi wən ghə â baanə n zat kə fəkaʼ, Zə̀ kə â ghəŋənə nə buulə zə i loʼ fa n mbi, idəŋ nsə a ghəlitsə.

²¹Ghaa loʼ soʼo n taŋa tii, n təŋkey ghaa a buʼ way tsə ghi Zə̀ kə, ghaa n loʼ tsə ghə̂ a təngəmə a wi bòʼ ghəə a ghaa a bəbə ghən ghaa â ghəŋə tsənə ghi moʼlə tə ghaa tə bəbə tən ghaa â khə tsənə n fə̀ŋ tə ghaa.

²²A kee loʼ nə̀, Zə̀ kə n ghaa ghəŋə nə̀ ghaa doʼo fə a wi bòʼ və i waa wi wən tə a kpunə n zat kə fəkaʼ, sey nə̀ muu i ghaa zə i zow khə way bwu i loʼ zə, ghaa i loʼ tsətsəghə n sə kə wi.

²³A kee loʼ kə nə̀, ghaa təmi taw tsu n bəghəm i fə̀ŋ i ghaa n tûm i dzuŋu zən ghaa zownə. Kə ghaa nə bəghəmnə nə wù loʼ kəm soʼlə ghaa n tûm i dzuŋu zən ghaa â zownə, ghaa n gaʼ fə̀ŋ tii. À loʼ bòʼ tûm i dzuŋu zən, mə Pɔl, n loʼnə wù kəfwaʼ ə Klisto tɔŋŋə tûm i dzuŋu zən ghə naʼlənə tə mbi idzəm.

²⁴N duʼlənu n fəghə zən n fəʼlənə nya bòʼ ghaa, fəghə zən n fəʼlənə loʼ tə a loʼ tuʼ zuŋ n fəghə zən Klisto â fəghənə tə dzəŋi kə dzûmə tə Klisto, tɔŋɔ wû u wi.

²⁵À loʼ Kəzə̀ tə sàynə mə nə̀ n doʼo wù kəfwaʼ a wi n dzəŋi kə dzûmə tə Klisto. Fwaʼ kən tə funə tə mə loʼ ni tiilə dza ghɔɔmə i Kəzə̀ tə ghə̂ ghə.

²⁶À loʼ ighəə Zə̀ kə â nyi naŋanə nə̀ kə ghə̂ a nə keelinə n ndəmə tənum ibam, tə u kee chi dii bənə ghəə a tii ghə nya tə ghə̂ a wi ghə.

²⁷Zə̀ kə â ləghə ni dii bə ghaʼ i wi nsə ghəə a wi a dzuŋu ghə tə ghə̂ ghən ghə way ghə̂ a Təjuu ghə soʼo. Ghəə zey Zə̀ kə â nyi naŋanə loʼ nə̀, Klisto muu n kow ghaa, dii tsu nə̀ ghaa ləmmə soʼo ni keeli kɔʼlə mən n loʼnə tə̀ ghə̂ a Kəzə̀ ghə.

²⁸Sey, ghey naʼlə tûm i dzuŋu zə bòʼ Klisto tə ghə̂ ghə adzəm. Kii naŋŋə ndow ghə n ghəə ghən a kpiilə way, də̀ŋ ə kɔʼɔ bə ghə nə təjìi tədzəm, sey nə̀, ghey i loʼ ni ney bə ghə n sə K-a-zə̀, nə̀ ghə n beyyə dzɔb, loʼ nə kəfə kəmɔʼ ghi Klisto.

²⁹À wey loʼ zuŋ key n kuu nyiə ndownə səŋ zə ni fwaʼ n daʼa kə səŋi kən kə fwaʼanə n kow mə nə a fuu Klisto.