Read Weh Kolose 4 Bible Online

Kolose 4 - Weh bible

Kolose 4

¹Abə ghaa ghə mûkəbii ghən ghaa khənə ghə̂ a kəfwaʼ ghə, ghaa khə ni laalə ghə n jìi zey i kpiilənə, ghaa kwu keeli soʼo ghə n wɔ a dzuŋu ghə. Ghaa khə ni ghəŋŋə sey n təŋkey ghaa khənu nə̀ ghaa khə soʼonu Mûkəbii ə ghaa tə loʼ idəŋ.

²Kə ghaa nə buu doʼlə ni gɔŋŋə nəŋə tədzəm. Ghaa i ney ghə̂mə zə abə ghaa gɔŋŋənə, fuu ndow soʼo kəzɔŋŋə tə Zə̀ kə.

³Ghaa i gɔŋŋə soʼo n tow u ghey, nə Zə̀ kə ghəŋə nə̀ ghey keeli kəbuʼ ni naʼa ghəə ghən a nyì doʼonə bòʼ Klisto, n təŋkey, à wən loʼ zuŋ key n loʼnə tii n ndaw tsaʼ.

⁴Ghaa i gɔŋŋə n tow kuŋ nə̀ mə i loʼ ni tɔʼ naʼa ghəə a tii ghə, ghə i loʼ tsətsəghə tə n khə ni naʼa tii.

⁵I khə na jìi zey ghaa muunə tii ghi ghə̂ ghey ghə loʼ nə̀ ghə ka kam bəghəm tə Klisto, kə ghaa nə bəghəm nə bùʼ kə tsəghə ghaa nə ghaa ka ghəŋə ghə i səŋi zə tə ghə.

⁶Ghaa khə ni khə dzə̂ tə dzuŋu tə n jìi zey ghaa ghɔɔmənə tii ghi ghə̂ ghə, sey nə̀, ghaa i loʼ ni beeli aghə̂ adzəm n jìi zey i kpiilənə.

⁷Taychikus, waazə ə saa u dzuŋu wə, i tiilə dza bənu tə ghaa ghəə ghey a tsəghənə fa adzəm bòʼ mə. Tə fwaʼa dzəŋi ghi mə, fwaʼa soʼo tə Mûkəbii n fə̀ŋ ə wi idzəm.

⁸Zuŋ key n tûm bənə wi tə ghaa loʼ nə tə bə kuu bə fə̀ŋ tə ghaa n fwaʼ kə ghaa, tə tiilə dza bə soʼo tə ghaa nghee ghey loʼnə fa tii.

⁹Tə bəghə dzəŋi ghi Onesimus, waazə ə saa u dzuŋu wən tə fwaʼa soʼonə fwaʼ kən n fə̀ŋ ə wi idzəm, a loʼ wù inaʼ a ghaa. Ghə i tiilə dza bənu tə ghaa ghəə ghey a tsəghənə fa adzəm.

¹⁰Aristakus wən tə loʼnə fa n ndaw tsaʼ ghi mə, tɔŋɔ zow bə ghaa. Mak, waazə ə Banabas tɔŋɔ zow bə soʼo ghaa. Ghə mâ buʼ dza tə ghaa nə̀ abə Mak kpaʼi bənə fey, ghaa kpii ney wi.

¹¹Joshua wən ghə tɔŋɔ soʼo nə a loʼ Justus tɔŋɔ zow bə soʼo ghaa. À may kə ghə̂ ghən atəghə ghə loʼnə ghə̂ a Təjuu ghə, ghə bəghəmnə tə Klisto, ghə fwaʼa dzəŋinə fa ghi mə n ghəə a fɔɔ u Kəzə̀. Ghə n ngii fuu mə n gaamə zə.

¹²Epafras wən tə loʼnə wù naʼ i ghaa, loʼ soʼo wù kəfwaʼ a Yeso Klisto tɔŋɔ zow bə ghaa. Tə gɔŋŋə tə ghaa nəŋə tədzəm n fə̀ŋ ə wi idzəm. Gɔŋŋə nə̀ Zə̀ kə ghəŋŋə nə̀ ghaa i tɔʼɔ taw n bəghəm i fə̀ŋ i ghaa, sey nə̀, ghaa loʼ ni tɔʼ zowkeeli ghəə a səŋi ghey Zə̀ kə ləghə nə̀ ghaa ghəŋə.

¹³N loʼnu ni tɔʼ tiilə dza nə̀ tə ndzəmə kuu səŋ zə ni fwaʼ tə ghaa, tə fwaʼa soʼo tə ghə̂ ghey n naʼ i Lodishya nsə tə ghə̂ ghey n naʼ i Hirapolis.

¹⁴Lukas wən tə loʼnə wù ngaŋ a saa wən saa ngii ləghənə ghi Demas tɔŋŋə zow bə ghaa.

¹⁵Fuu nduŋŋə ndow na tɔŋɔ zow i ghey zə tə waazə a saa ghey ghə loʼnə n naʼ i Lodishya, tə Nimfa nsə tə ghə̂ a Kəzə̀ ghey ghə nyiənə n ndaw wi.

¹⁶Abə ghə tɔŋɔ kɔʼnə màʼlə kən tə ghaa, ghaa i fuu tsəʼlə ndow tə ghə̂ a dzəŋi kə dzûmə tə Klisto ghey n naʼ i Lodishya, tə ghə mbɔŋ tɔŋɔ soʼo. Ghaa i tɔŋɔ kɔʼ soʼo màʼlə kən mə â tɔɔnə tə dzəŋi kə dzûmə tə Klisto key n naʼ i Lodishya.

¹⁷Dza ndow na tə Achipus nə tə dəm tsu ni mayyə fwaʼ kən Mûkəbii fuu naŋanə tə wi nə tə fwaʼ.

¹⁸À loʼ mə Pɔl n wû wuŋ wə n tɔ̀ɔ bənə nya tə ghaa, mə n ghaa tɔŋɔ zow. I kə ghaa nə neyzəənə nə̀ n loʼ n ndaw tsaʼ. N gɔŋŋə nə̀ ndzuŋ ə Kəzə̀ zə i loʼ ghi ghaa.