Read Weh 1 Tesalonika 2 Bible Online

1 Tesalonika 2 - Weh bible

1 Tesalonika 2

¹Waazə ghə, ghaa khənu nə̀ nghee ghey â bweyyə bənə fey n səə ghaa, zə â ka maŋ tsəghə dzə̀ nə kənunu.

²Ghaa khə soʼonu nghee ghey fəghənə tii n naʼ i Filipi nsə nghee ghə â lənnənə ghey tii. Zə̀ kə n kee nam ghəŋə tsu nə̀ ghey keeli tsu fə̀ŋ i tii zə ni bə naʼa tûm i dzuŋu zə tə̀ ghaa nghee ghə̂ â tsəmə tuu kə ni zow ghɔɔmə i ghey.

³Ghey â ka nyəŋ laʼ dzə n ghəə ghey, ghey â dza bənə tə̀ ghaa, â way soʼo n moʼlə tə bəbə tə n kow ghaa, nkee ni tsìi ghaa.

⁴Ghey ghɔɔmə tə ghaa tə̀ a loʼ ghə̂ ghey ghə kɔʼ kpiinə tə̀ Zə̀ kə ni fuu naŋa tûm wi i dzuŋu zə n wɔɔ kə ghə. Ghey ghɔɔmə dzə way nə̀ ghə̂ ghə i duʼlə ghi ghey. Ghey ghɔɔmə nə̀ Zə̀ kə i duʼlə ghi ghey n tənkey à loʼ wi tə saʼanə fə̀ŋ tə ghey tə.

⁵Ghaa khənu nə̀ ghey â ka nəb dzə̀ ghaa nə ighɔɔmə, nkee ni nəəbə ney fə̂ kə ghaa kə loʼ kə. Zə̀ kə loʼ ni təmi tiilə n tow u ghey.

⁶Ghey â kəŋə dzə way nə̀ ghə̂ ghə i kali bə ghey, nə̀ ghaa i kali bə ghey nkee nə̀ wù loʼ kali bə ghey. Ghey tə a loʼ ngəd tə Klisto mə loʼnu ni fəmmə ghaa.

⁷Ghey â tsəm khənu daʼa kə tə̀ a loʼ ngəd tə Klisto ni bəb ghaa n fə̂ wə, ghey n fəd say kɔʼ ni laalə tə̀ ghaa tə̀ này waa nə buulə laalənə tə̀ waa wi.

⁸Ghey n ngii ləghə ghaa, à wey loʼ ghə i tii zə ghey â ka kad naʼa kə tûm i dzuŋu zən Zə̀ kə â fuu bənə tə̀ ghaa, ghey n fuu may ndow soʼo wû i ghey ni gaamə ghaa. Ghey ndzəm ngii khə ghaa n fəŋ tə ghey.

⁹Waazə ghə, ghaa moʼlənu nghee tə̀ ghey â zuʼlə fwaʼa nə tii? Ghey â fwaʼa n tsə̀ tə nsə n tsuʼu tə sey nə̀, kə̂ ghey nə doʼlənə tə̀ a loʼ kəfəmmə tə̀ wù ghaa u loʼ wə, nghee tə̀ ghey naʼlənə tə̀ ghaa tûm i dzuŋu zən i nuu bənə n wɔ Zə̀ kə.

¹⁰Ghaa loʼ ghə təmi tiilə n tow u ghey, tə̀ Zə̀ kə loʼ soʼonə ni tiilə dza jìi zey ghey muu n fəŋŋə kə ghaa ghən ghaa bəghəm tə Zə̀ kə. Ghey ka ghəŋə koʼ tsə wù n ghə i bəbə i loʼ zə. Muu i ghey zə â zownu, loʼ soʼo tsətsəghə.

¹¹Ghaa khənu nə̀ ghey muu ghi ghaa tə̀ bày waa nə̂ muunə ghi waa a wi ghə.

¹²Ghey n kuu fə̀ŋ tə ghaa tə, tsəmmə ghaa, buʼu ghaa n wɔɔ kə nəŋə tədzəm nə̀ ghaa i muu muu zey i kpiilənə tə̀ Zə̀ kə, n təŋkey a loʼ wi tə tɔŋɔ naŋa bənə ghaa nə̀ ghaa zə̂ fɔɔ u wi nsə n ghaʼ i wi.

¹³À wey loʼ ghə i tii zə ghey fuu zeelinə zɔŋŋə kə tə̀ Zə̀ kə n təŋkey ghɔɔmə i wi zən ghaa â zownə n wɔ̂ ghey, ghaa n bəghəm kɔʼ, ghaa â bəghəm naŋa koʼ nə̀ a loʼ ghɔɔmə i Kəzə̀, a way dzə ghɔɔmə i wù sɔŋtsuʼ. À ndzəm loʼ ghɔɔmə i Kəzə̀ n tənkey, ghɔɔmə i tii i fwaʼa n fə̀ŋ tə ghaa ghəŋŋə nə̀ bəghəm i fə̀ŋ i ghaa zə nyîmmə.

¹⁴Waazə ghə, ghaa â bɔɔmə bwey kə n ghow kə ibwey kə ghə̂ ghey ghə loʼnə n ndaw tə Kəzə̀ tey n naʼ i Judeya, ghə loʼ nə̀ ghə n bəghəm tə̀ Yeso Klisto. Ghaa â bɔɔmə fəghə kɔʼ bə n wɔɔ kə ghə̂ ghə inaʼ a ghaa, ighələ tə̀ ghə â fəghənə n wɔɔ kə ghə̂ a Təjuu ghən ghə â ka bəghəm tə̀ Klisto.

¹⁵À loʼ ghə̂ a təjuu ghən ghə â weynə Mûkəbii Yeso nsə tûm tə Kəzə̀ tə, dzùm nuu shi soʼo ghey n ndəmə tə tənaʼa. Ghə ghəŋŋə dzə way ghəə ghey a dzɔbənə n sə K-a-zə̀, ghə u baa soʼo ghə̂ ghə adzəm fa mbi.

¹⁶Ghə ndeemi iwû ni buu naŋa ghey nə̀ kə̂ ghey nə̂ naʼlənə ghɔɔmə i Kəzə̀ zə tə̀ ghə̂ ghən ghə way ghə̂ a Təjuu ghə, nə̀ ghə mbɔŋ keeli ibəghəshi. Ghə n sey zuŋŋə naŋa kɔʼ bə ghəə a bəbə ghə, sey, ngoʼ ə Kəzə̀ n bə n kow ghə.

¹⁷Waazə ghə, n tɔŋɔ fə inəŋə fən ghey â sali nuu tsunə ghi ghaa, ghaa loʼnu n fə̀ŋ tə ghey nəŋə tədzəm, â loʼ kə nə̀ jii way tə̀ ghey ni koʼ ghaa. Ghey n dəm kii ni bə koʼ ghaa n ndəmə tənəŋə, ghey ndzəmə ngii mbuŋŋənu ni bə koʼ ghaa.

¹⁸Ghey â ndzəm ləghənu ni bə koʼ ghaa. Wû wuŋ Pɔl, n mâ ndzəm n ndəmə tənəŋə ni bə koʼ ghaa, à kee Satan tə̀ʼlə̀ maʼanu.

¹⁹À loʼ ghaa, ghaa i ghəŋŋənə nə̀ ghey i ndzəmə ləmmə, ghey i duʼlə, à loʼ soʼo ghaa naamə kə ghey kə. À loʼ ghaa, ghaa i ghəŋŋənə nə̀ ghey i ghaŋŋə wû zə sə kə Mûkəbii saa Yeso abə tə i bə dzəŋŋənə. Abə à way ghaa, à kəm loʼ kee ghey loʼ ni ghaŋŋə iwû tii ə?

²⁰À ndzəm loʼ ghaa, ghaa i ghəŋŋənə nə̀ ghey i tsɔbə fə̀ŋ, loʼ soʼo nə iduʼlə.