Read Weh 1 Tesalonika 3 Bible Online

1 Tesalonika 3 - Weh bible

1 Tesalonika 3

¹Nghee ghey â dəm kii tsunə ni doʼo nə̀ ghey koʼo way ghaa, ghey n koʼ tsu nə̀ i baa dzɔbə nə̀ ghey doʼo khə̂mə tsu n naʼ i Atens n nəŋ ə ghey.

²Ghey n tûm bə Timoti waazə ghey wən tə fwaʼanə tə̀ Zə̀ kə ghi ghey ni naʼa tûm i dzuŋu zən bòʼ Klisto nə̀ tə bə tɔm bə ghaa, tə təm tawwə bə soʼo bəghəm i fə̀ŋ i ghaa.

³Ghey ləghə nə̀ kə wù ghaa u loʼ u nə keelinə tsəŋ zə n chɔd mən ghaa koʼonə n təŋkey, ghaa khənu nə̀ saa adzəm khə ni keeli ndzoʼo chɔd mən boʼo Kəzə̀.

⁴N dza sey n təŋkey, nghee ghey â loʼnə fey ghi ghaa, ghey mâ dza tə̀ ghaa nə̀ ghə i chɔdlɔnu ghey. Zə n bɔɔmə bə doʼo bə kə tə̀ ghey â dzanə tə̀ ghaa.

⁵À wey loʼ ghə i tii zə mə â koʼ tsunə nə̀ i dzɔbənu tə mə ni tûm bə Timoti n təŋkey, mə â kəm way ni kow fə̀ŋ. Sey, mə n tûm bə Timoti nə̀ tə bə koʼ tsu nə̀ ghaa loʼ ngee n bəghəm i fə̀ŋ i ghaa. Mə â tsəŋənu nə̀ n nəŋə i loʼ i, vəətsəə ghə n ghaa nəb fuu nə̀ ghaa bwu n ghəə a bəbə ghə ni ghəŋə nə̀ fwaʼ kə ghey kədzəm kə maŋ doʼo kɔʼ kənunu.

⁶Nyisa Timoti n dzəŋŋə bə n səə ghey n ghəə a dzuŋu ghə, ghey ngii duʼlə nghee tə tiilə dza bənə jìi zey ghaa bəghəmnə tii tə̀ Klisto nsə ləghə zey ghaa khənə n wû i ghaa. Tə n dza bə soʼo tə̀ ghey nə̀ ghaa moʼlənu ghey nəŋə tədzəm, ndzəmə mbuŋŋə ni koʼ ghey ighələ tə ghey mbuŋŋə soʼonə ni koʼ ghaa.

⁷Sey waazə ghə n fəghə i zən nsə chɔd mən ghey koʼonə, ghey duʼlənu ghi ghaa bòʼ bəghəm i fə̀ŋ zən ghaa khənə.

⁸N dza sey n təŋkey, ghey loʼ ni ndzəm muu nya n fə̀ŋ tə kay tə nghee bəghəm i fə̀ŋ i ghaa i tɔʼ loʼ dzənə nə kəfə kəmɔʼ ghi Mûkəbii.

⁹Ghey loʼnu ni fuu kəzɔŋŋə tə̀ Zə̀ kə nya bòʼ ghaa. Ghaa n ghəŋə nə̀ ghey ngii keeli iduʼlə n sə K-a-zə̀.

¹⁰Ghey gɔŋŋə n fə̀ŋ tə ghey tə tədzəm n tsə̂ tə nsə n tsuʼu tə tə̀ Zə̀ kə nə̀ tə ghəŋə ghey kəm bə n səə ghaa, tə ghəŋə soʼo nə̀ ghey keeli jìi zey ghey loʼ ni ghəŋə nə̀ ghaa tɔʼ beyyə tsu n bəghəm i fə̀ŋ i ghaa.

¹¹Ghey gɔŋŋə nə̀ Zə̀ kə, tə loʼnə Bày, loʼ soʼo Bày tə Mûkəbii saa Yeso Klisto, dii ghey n jìi zey ghey loʼ ni bə taa fey n səə ghaa.

¹²N gɔŋŋə nə̀ ləghə zey ghaa khənə n wû i ghaa, nsə n kow ghə̂ a loʼ ghey adzəm, i ndəŋ kɔʼ ndow tə a loʼ ləghə zən ghey khənə n kow ghaa.

¹³Ghey gɔŋŋə nə̀ abə ghaa i ghəŋənə ghəə ghən Zə̀ kə təm tawwə fə̀ŋ tə ghaa, tə ghəŋə nə̀ ghaa i loʼ tsətsəghə. Tə i ghəŋə soʼo nə̀ ghaa i loʼ tsətsəghə sə kə wi tə loʼnə Bày saa n nəŋə zey Mûkəbii saa Yeso i bə dzəŋŋənə ghi ghə̂ a wi ghən ghə khə way bəb i loʼ zə.