Read Weh 1 Tesalonika 5 Bible Online

1 Tesalonika 5 - Weh bible

1 Tesalonika 5

¹Waazə ghə, ni ghɔɔmə nya kuum nəŋə zey Yeso i bəghənə nsə tsuʼ fə tii fə. Ghəə i loʼ i kəm way dzə ghey loʼ ni dza tə̀ ghaa.

²N sey dza n təŋkey, wû i ghaa, ghaa khənu nə̀ Mûkəbii nə̂ vuŋŋə bəghə tə̀ wû tsɔŋɔ nə̂ bəghənə tii n tsuʼu tə.

³I loʼ nə, abə ghə̂ ghə i dza tsu nə̀, “ghəə a bwey dzɔbənu, ghəə i tsəŋə i kəm way.” Nghee tə̀ ghə ghɔɔmənə sey, chɔd u nii wə i maŋ bə n kow ghə tə a loʼ weyzən tə zow fɔɔbə i waa zə. Jìi i loʼ zə i way tə ghə ni nɔb shi.

⁴Waazə ghə ghaa way dzə n ka ghaa naŋa dzə nə̀ kələm n ghəə i zən, sey kə̂ tsuʼ fə tii fə nə̂ kwɔɔlənə ghaa nə̀ ghaa ka wû u bayyə tə̀ wù tsɔŋɔ nə̂ tsɔŋɔnə wù nə̀ tə ka keeli.

⁵Ghaa dzəm, ghaa loʼ ghə̂ a kədaa ghə ghəŋŋə ghəə ghə n sə̂ a zow ghə. Saa way dzə ghə̂ a kələm ghə ghəŋənə ghəə ghə nə̀ kələm.

⁶Sey kə̂ saa nə̂ bweeli tə̀ a loʼ ghə̂ a loʼ ghə. Saa khə ni loʼ n sə̂ a zow ghə, saa i khə zuŋ kə umwam.

⁷Abə ləm kə bwunə a wey loʼ nəŋə zey ghə̂ ghə a bweelinə tii, a loʼ ghə n məə khəə nlə.

⁸Saa ghən saa loʼnə ghə̂ ghey ghə loʼnə nə kədaa fəd khə ni khə zuŋ kə umwam. Saa khə ni khə bəghəm i fə̀ŋ nsə ləghə zə tə a loʼ dzə̀ tə tsam kəŋ naŋa muu i saa. Saa khə ni khə tən moʼlə zey nə̀ Zə̀ kə i bəghəshiənu saa tə a loʼ taŋŋə kə tsam ni tsəd tow u ghey.

⁹Zə̀ kə ka saa sày dzə ni ghəŋə nə̀ saa keeli uchɔd. Tə say saa nə̀ saa i loʼ ni keeli ibəghəshi n bam i Mûkəbii Yeso Klisto.

¹⁰Yeso â kpu n tow u saa sey nə̀ abə saa loʼ kə utaw nkee saa kpunə, saa i loʼ dzəŋi ghi wi abə tə̀ i bənə.

¹¹Sey, ghaa khə ni kuu tiilə fəŋ tə̀ ghaa tə, gaamə tiillə soʼo i wû i ghaa zə ni ghəŋə nə̀ ghaa nyim n bəghəm i ghaa, ighələ tə̀ ghaa ghəŋənə.

¹²Ghey buʼu bə kəwɔɔ a waazə ghə nə̀ ghaa fuu ingɔɔmə tə ghə̂ ghey ghə fwaʼanə n fəŋŋə kə ghaa. Ghə tsə̀ə ghaa dii soʼo ghaa n jìi zey Zə̀ kə ləghənə nə̀ ghaa muu tii.

¹³Ghaa khə ni fuu ngɔɔmə ghə, ləghə soʼo ghə naʼ idzəm bòʼ fwaʼ key ghə fwaʼanə tə ghaa. Ghaa i muu nə ibuulə n wû i ghaa.

¹⁴Ghey buʼu kəwɔɔ a waazə ghə nə̀ ghaa i kpaa tsu ghə̂ ghey ghə ləghə way ni fwaʼ, tsəmmə ndow a ghey ghə tsəŋənə, gaamə ghə̂ ghey ghə ka kam tɔʼ beyyə n bəghəm i fə̀ŋ i ghə, kow fə̀ŋ ghi ghə̂ ghə adzəm.

¹⁵Kə ghaa i bəghəm nə̀ wù loʼ n fəŋŋə kə ghaa kûmmə dzəŋŋə ibəb nə ibəb. Ghaa fəd khə ni ghəŋŋə ghəə ghey a dzɔbənə n wû i ghaa nsə tə̀ ghə̂ ghə adzəm.

¹⁶Ghaa i duʼlə nəŋə tədzəm.

¹⁷Ghaa i gɔŋŋə nəŋə tədzəm.

¹⁸Ghaa i fuu zɔŋŋə kə nə aghəə adzəm, n təŋkey à wən loʼ ghəə zey Zə̀ kə ləghənə nə̀ ghə̂ ghey adzəm ghə loʼnə nə kəfə kəmɔʼ ghi Yeso Klisto i ghəŋŋə.

¹⁹Kə ghaa nə təʼlənə fwaʼ kə Zay kə Zow kən kə bəʼlənə n kow ghaa tə a loʼ uvələ.

²⁰I kə ghaa nə kii maʼanə ghɔɔmə zey i loʼ nə̀ a chi dii bə Kəzə̀ tə wù loʼ.

²¹Ghaa i tɔʼɔ laalə tsuu ghəə ghə adzəm, ghəŋŋə ndow a ghey a dzɔbənə.

²²Ghaa tuu maʼa ghəə a bəbə ghə adzəm.

²³Ghey gɔŋŋə nə̀ Zə̀ kən kə ghəŋŋənə nə̀ fə̀ŋ tə ghaa tə i loʼ nə ibuulə, n wû u wi kə bə ghəŋə nə̀ ghaa i zow n muu i ghaa. Ghey gɔŋŋə nə̀ ghəə adzəm ghaa ghəŋŋənə, ghəə ghey ghaa ləghənə nsə ghəə ghey ghaa moʼlənə i khə way bwu i loʼ zə abə Mûkəbii saa Yeso Klisto i bə dzəŋŋənə.

²⁴Zə̀ kən kə â tɔŋɔnə ghaa nə̀ ghaa bəghəm tə wi i gaamənu ghaa n təŋkey tə naŋŋənu ghɔɔmə i wi zə.

²⁵Waazə ghə ghaa i gɔŋŋə tə ghey.

²⁶Ghaa tɔŋɔ zow ndow dzûmə tə Klisto tədzəm n jìi zey dzûmə tə Klisto tə tɔŋɔ zownə tii.

²⁷N tsəʼlə bə kəlaŋ n zəd i Mûkəbii nə̀ ghaa i tɔŋɔ màʼlə kən n sə kə dzûmə tə Klisto tədzəm.

²⁸Ghey gɔŋŋə nə̀ Mûkəbii saa Yeso Klisto dii ghaa n fə̀ŋ ə wi i dzuŋu zə.