Read Weh 2 Tesalonika 1 Bible Online

2 Tesalonika 1 - Weh bible

2 Tesalonika 1

¹À màʼlə kən tɔ̀ɔ bə Pɔl, Silas nsə Timoti tə dzəŋi u dzûmə tə Klisto tə n naʼ i Tesalonika ghən ghə bəghəm nə tə Zə̀ kə tə loʼ Bày saa nsə Mûkəbii Yeso Klisto.

²N gɔŋŋə nə̀ Zə̀ kə, tə loʼnə Bày saa nsə Mûkəbii Yeso klisto dii ghaa n fə̀ŋ ə wi i dzuŋu zə, tə ghəŋə soʼo nə̀ fə̀ŋ tə ghaa tə i loʼ nə ibuulə.

³Waazə ghə, ghey fuu kəzɔŋŋə nəŋə tədzəm tə Zə̀ kə bòʼ ghaa. I ndzəmə dzɔbənu ni ghəŋə sey təŋkey, bəghəm i fə̀ŋ i ghaa i ndəŋə nyîmmənu, ləghə zey ghaa khənə n wû i ghaa, zə a nyîmmə soʼo naʼ idzəm.

⁴À wən loʼ ghə i tii zə ghey tsɔbənə fə̀ŋ bòʼ ghaa n dzəŋi u dzûmə tə Klisto udzəm. Ghey tsɔbə fə̀ŋ n təŋkey ghaa fəʼlənu, ghə̂ ghə a baa soʼo ghaa bòʼ Kəzə̀, ghaa a kee nam kow kə fə̀ŋ, ndow soʼo n sə kə ni bəghəm tə̀ Zə̀ kə.

⁵Ghəə ghən adzəm dii bənu nə̀ saʼ i Kəzə̀ i loʼ tsətsəghə. Ghaa fəʼlə nya n jii i zən tə̀ Zə̀ kə n təŋkey Zə̀ kə ləghə nə̀ ghaa i loʼ n jìi zey ghaa kpiinə ni nyi n fɔɔ u wi.

⁶Isəŋə loʼ nə̀ Zə̀ kə i ghəŋə ghə zey i loʼnə tsətsəghə. Tə i ney bə ngoʼ tə ghə̂ ghey ghə ghəŋənə nə̀ ghaa i fəʼlə.

⁷Tə i ghəŋŋə nə̀ ghaa ghən ghaa fəʼlənə nya nə̀ ghaa keeli izayyə, tə ghəŋə soʼo nə̀ ghey zayyə. Zə̀ kə i ghəŋŋə ghəə ghən abə Mûkəbii Yeso i tsu bənə idəŋ ghi tsətəndəghə tə wi tə nii tə.

⁸Tə i bəghə ghi vələ u bəʼlə wə ni bə chɔd ghə̂ ghən ghə tuu maʼanə Zə̀ kə nsə ghə̂ ghən ghə ka bəghəm tûm i dzuŋu zə bòʼ Mûkəbii saa Yeso Klisto.

⁹Tə i ney nuulə kɔʼɔ ghə n səə Mûkəbii, ghə i ka keeli soʼo kɔʼlə n wi, tə fuu ghə n ngoʼ zən i may way n vələ wən u nəmmə way.

¹⁰Abə tə i bənə n tsuʼ fə tii fə n ghaʼ i wi, ghə̂ ghey adzəm ghə bəghəmnə tə wi i duʼlə, dzuu zə i zum soʼo ghə, ghə i fuu wi n kɔʼləmə. Ghaa i duʼlə soʼonu tə a loʼ ghə n təŋkey, ghaa â bəghəm fuu tûm zey ghey â naʼanə tə̀ ghaa.

¹¹À wən loʼ ghə i tii zə ghey gɔŋŋənə tə̀ ghaa nəŋə tədzəm. Ghey gɔŋŋə nə̀ muu i ghaa zə i loʼ n jìi zey Zə̀ kə tɔŋɔnə ghaa nə̀ ghaa muu tii. Ghey gɔŋŋə soʼo nə̀ tə fuu ghaa n daʼa kə sey nə̀, ghaa loʼ ni ghəŋə ghəə a dzuŋu ghey tə ləghənə nə̀ ghaa ghəŋə, ni ndow soʼo n sə kə ni fwaʼa fwaʼ key kə kpiilənə nghee i loʼ nə̀ ghaa khə bəghəm i fə̀ŋ n kow Klisto.

¹²Ghey gɔŋŋə nə̀ ghə̂ ghə i fuu kɔʼləmə tə̀ Mûkəbii saa Yeso bòʼ ghaa, Mûkəbii i fuu soʼo ghaa n kɔʼləmə, bòʼ fə̀ŋ i dzuŋu zey Zə̀ kə saa ghi Mûkəbii saa Yeso Klisto i diinə tə̀ ghaa.