Read Weh 2 Tesalonika 2 Bible Online

2 Tesalonika 2 - Weh bible

2 Tesalonika 2

¹Waazə ghə, ghey dza ghɔɔmə bə tə̀ ghaa nya kuum bə i Mûkəbii saa Yeso Klisto nsə nghee saa i zɔŋə bəghənə tii ni doʼo ghi wi. Ghey buʼu bə kəwɔɔ tə̀ ghaa waazə ghə nə̀

²kə̂ ghaa nə̂ keelinə fəmmə kə loʼ kə n fə̀ŋ tə ghaa, abə ghə̂ a loʼ ghə bə dza bənə tə̀ ghaa nə̀ tsu fey Mûkəbii khə ni bə tii n kpii. Kə̂ ghaa nə̂ bəghəmnə ghɔɔmə i tii zə, abə ghə tsəm dza bə kənə tə̀ ghaa nə̀ a dza bə Zay K-a-zə̀, nkee nə̀ a dza tûm tə Kəzə̀ nkee nə̀ a tɔ̀ɔ bə ghey.

³Kə̂ wù loʼ nə̂ nəbənə ghaa, n təŋkey tsuʼ fə tii fə i bə way nə̀ ghə̂ a ka kam tuu maʼa laŋ u Kəzə̀ wə. Tsu fə tii fə i bə soʼo way nə̀ wu wey tə sìi ndzəŋŋənə ghə̂ ghə ka kam dii dzə wû wə. Tə loʼ wù wən tə loʼnə n jii ni ndow n luʼu kə uvələ kən kə may way.

⁴Abə wù wən i dii bənə wû wə, tə i tsayyə Kəzə̀, tə tsayyə fə̂ wey udzəm ghə̂ a ngɔɔmənə tə̀ a loʼ Kəzə̀, tə kɔʼlə naŋa kɔʼ wû u wi idəŋ n kow fə̂ wən udzəm. Tə buʼ nyi daŋŋə n Ndaw Kəzə̀, tə ney naŋa kɔʼ wû u wi nə̀ tə loʼ Kəzə̀.

⁵Moʼlə tsu na nə̀ n ma ghəə ghən tə̀ ghaa dza n nəŋə zey mə â loʼnə ghi ghaa.

⁶Nya, ghaa khənu fə̂ key kə kwɔɔ naŋanə wi nə̀ tə ka bə. A sey loʼ ni ghəŋə tsu nə̀ tə i bə kə abə nəŋə i kpii tsunə.

⁷N dza sey n təŋkey ghəə nyiə doʼo ghey wù tii î ghəŋənə n kaʼ ni shi. A kee loʼ nə̀ ghəə ghən a dza tsunə fa î ney dzə way bənə kə a may kə nə̀ ghə n ney nuu wù wən tə kwɔɔ naŋanə ghəə a tii ghə nə̀ a ka shi.

⁸Abə ghə i ney nuu tsunə wù wey tə kwɔɔ ghəə ghən, wù wən tə sii ndzəŋŋənə ghə̂ ghə i dii bə uwû. A kee loʼ nə̀, Mûkəbii Yeso i bəghə wey maʼa daʼa kə wi n zuʼ tə idzuu tə wi, tə ləŋi maʼa wi n nyiələ i wi.

⁹Wù wən tə sii ndzəŋŋənə ghə̂ ghə î bəghə n daʼa kə Satan. Tə i dii nfaalə, tə ghəŋə ghəə a zum ghə idzuu ghə ni nəb fu aghə̂.

¹⁰Tə i ghəŋə ndəmə ghəə a bəbə ghə ni sii ndzəŋ ghə̂ ghən ghə loʼnə tə̀ a loʼ ghə̂ a kpu ghə tə̀ Zə̀ kə n təŋkey ghə ləghə way ni gaʼ fəŋ n ghəə i loʼ isəŋə sey nə̀ ghə keeli ibəghəshi.

¹¹A wey loʼ ghəə i tii zə Zə̀ kə ghəŋənə nə̀ ghə dzəŋsə doʼo sey nə̀ ghə i bəghəm fuu kə tə̀ ghəə ghey a way isəŋə.

¹²Ghəə ghən a ghəŋə nə̀ ghə̂ ghən adzəm ghə ka bəghəm isəŋə ghə i ghəŋə ghəə a dzəə ghə dza ghə sey zəə i wû. A wey loʼ ghəə i tii zə Zə̀ kə khənə ni chɔd ghə.

¹³Waazə ghə, ghey khə ni fuu zɔŋŋə kə nəŋə tədzəm tə̀ Zə̀ kə bòʼ ghaa ghən Mûkəbii ləghənə n təŋkey Zə̀ kə â sày ghaa nə nzeyyə nə̀ ghaa keeli ibəghəshi n daʼa kə Zay kə Zow kə ni ghəŋə nə̀ ghaa doʼo ghə̂ wi a zow ghə. Ghəə ghən ghə a shi nghee tə̀ ghaa bəghəmnə tûm Kəzə̀ zən i loʼnə isəŋə.

¹⁴Zə̀ kə â tɔŋɔ naŋa ghaa n muu i zən n bam i tûm i dzuŋu zən ghey naʼanə tə ghaa. Tə tɔŋɔ ghaa nə ghaa i loʼ dzəŋi ghi Mûkəbii saa Yeso Klisto n ghaʼ i wi.

¹⁵Sey waazə ghə ghaa təmi taw tsu n bəghəm i fə̀ŋ i ghaa. Ghaa tɔʼ kwu keeli dzɔb tsu ghɔɔmə i səŋi zən ghey fuunə nə tə ghaa, nə̀ a loʼ kə n ghəə ghən ghey naʼlənə nkee n maʼlə wən ghey tɔ̀ɔ bənə tə̀ ghaa.

¹⁶Ghey gɔŋŋə ndow tə̀ Mûkəbii saa Yeso Klisto nsə tə̀ Zə̀ kə tə loʼnə Bày saa. Zə̂ kən kə ləghənə saa, tə tsəmmənə fəŋ tə saa nəŋə tədzəm, ghəŋə nə̀ saa i ləmə tənnə tə wi n bam i ndzuŋ ə wi.

¹⁷Ghey gɔŋŋə nə̀ tə kuu fə̀ŋ tə ghaa, tə ghəŋə soʼo nə ghaa i fwaʼa kə fwaʼ kə dzuŋu kə, ghɔɔmə i ghaa zə i loʼ kə ghɔɔmə i dzuŋu zə.