Read Weh 1 Timoti 6 Bible Online

1 Timoti 6 - Weh bible

1 Timoti 6

¹Dzûmə tə Klisto tey tədzəm tə loʼnə kɔd wə, khə ni keeli tsu nə̀ ghə khə ni fuu ndow ngɔɔmə zey kɔd udzəm u fuunə tə ghə mûkəbii a ghə ghə, sey nə̀, wù loʼ i way ni tsayyə zəd i Kəzə̀ nsə ghəə ghən saa diinə.

²Kɔd wey ghə mûkəbii a ghə a loʼ nə̀ ghə n bəghəm fuu tə Klisto, khə way ni tsayyə ghə mûkəbii a ghə ghə a dza ghə bəghəm fuu tə Klisto tə a loʼ ghə. Ghə fəd khə ni ngii fwaʼa dzɔbə n təŋkey, ghə fwaʼa n tənə ghə̂ ghey ghə bəghəm fuunə tə Zə̀ kə tə a loʼ ghə, ghə a khə soʼo ləghə zə n kow ghə mûkəbii a ghə ghə. Wə khə ni teeli fuu ndow laŋ wən udzəm n dii kɔʼ bənə tə wɔ tə dzûmə tə Klisto tə, wə ghəŋə soʼo nə̀ ghə i dzûmə kɔʼɔ bə laŋ u tii wə.

³Abə wù loʼ diinə ghəə a nuu ghə, nə̀ a bəghəm dzəŋi way ghi tûm i dzuŋu zən bòʼ Mûkəbii Yeso Klisto, nə̀ a bəghəm dzəŋi soʼo way ghi muu i dzûmə tə Klisto tə,

⁴ndzoʼo wù tii maŋa ghaŋŋə uwû nə kənunu loʼ sey nə̀ tə zowkeeli way ghə i loʼ zə. Chɔt u wù tii u loʼ kə ni soʼo kaabə tsə ghɔɔmə zə, ghəŋŋə soʼo nə̀ ghə̂ ghə i fəə kaabə dzuu ghə. Ghəə ghən ghəŋŋənu ghə n kpaalə iwû n jìi zey ghə zèy daŋŋə ndow ni ghoʼo wû zə, ghəə a kəndəm, bii iwû nə təghɔɔmə nsə moʼlə tə bəbə tə.

⁵Ghə̂ ghən loʼ tən tsə kə ni zuulə n təŋkey, ghə moʼlə tənə kə ghəə a bəbə ghə, kəm ləghə soʼo way isəŋə. Ghə moʼlə kə nə̀ fwaʼ K-a-zə̀ kə loʼ luʼu key ghə loʼ ni keeli ikum tii.

⁶Fwaʼ K-a-zə̀ kə tsəmə fuunu kùm zə abə wə duʼlə dzənə ghi nyaŋi fey wə khənə.

⁷I loʼ sey n təŋkey, saa â ka ney nyi bə dzə n fə kə loʼ kə fa n mbi, fə kə loʼ kə way soʼo saa i ney shiənə n ghii kə fa n mbi.

⁸Sey abə sa khənə fə kə zəə kə nsə ndzə̂ tə ni dzəŋə, sa sey loʼ kədzuŋ.

⁹Wù wən tə kee ləghənə ni kùm, à loʼ kə nyaŋi fə ighəə ni chimmə wù tii nə̀ tə ghəŋə ibəb, tə bwu soʼo nə fətsaʼ. Tsaʼ fən loʼ moʼlə tə laʼlə tən nsə moʼlə bəbə tən ghə khənə tə i ghəŋŋə nə̀ ghə nyi nə uchɔd tə ləŋi maʼa soʼo ghə.

¹⁰I loʼ sey n təŋkey, ləghə zə ukhəə, i ney bə ghəə a bəbə ghə adzəm. Ghə̂ ghey ghə ngii shiə ndownə n sə̂ zə n ghəə ghə ukhəə n nyəŋ laʼ n bəghəm i fə̀ŋ i ghə. Fə̀ŋ tə nya fəmmə ghə bòʼ chɔd mən ghə keeli kaabənə.

¹¹A kee bə wɔ a Timoti, wə loʼ wù wən wə bəghəm fuunə tə Zə̀ kə, kə wə nə bəghəm naŋŋə ndzoʼo ghəə a bəbə ghən. I fədlə dzûmə ndow muu zən i loʼnə tsətsəghə, fwaʼa ndow fwaʼ key Zə̀ kə ləghənə, fə̀ŋ zə i loʼ tən kə n kow Zə̀ kə, wə i ləghə ghə̂ ghə adzəm, kow fə̀ŋ nə aghəə adzəm, wə keeli tsu soʼo zuŋ kə umwam.

¹²Kwu keeli taw tsu bəghəm i fə̀ŋ zə zə̀. Abə wə ghəŋənə sey, wə i keeli muu zə itsali tə a loʼ naamə kə. Zə̀ kə â sày wɔ nə wə keeli ndzoʼo muu i tii zə n nəŋə zey wə â dzanə nə wə bəghəm tə Klisto n sə kə ndəmə aghə̂.

¹³N dza bə tə wɔ n sə kə Zə̀ kən kə fuunə muu zə tə fə wə udzəm, nsə n sə kə Yeso Klisto wən tə â tɔʼ dzanə isəŋə n nəŋə zey Pontus Pilato â saʼanə wi,

¹⁴nə̀ wə naŋa kɔʼ bə laŋ wən n fuu bənə tə wɔ n fə̀ŋ zə idzəm, ni ndow kuum n nəŋə zey Mûkəbii saa Yeso Klisto i bəghənə tii. Abə wə tɔʼ dzûmə kɔʼ bənə laŋ wən nə̀ wə nɔʼɔ way, wù loʼ i way dzə ni dza ghə i bəbə zə bòʼ wɔ.

¹⁵Abə nəŋə i Kəzə̀ zə i kpii tsunə, tə i ney dzəŋŋə bə Yeso. Zə̀ kən ghə̂ a fuunə kɔʼləmə tə wi, tə ndzəm loʼnə zaamə mbi, loʼ Mûkəbii tə ghə mûkəbii adzəm, loʼ soʼo kədəŋ tə dəŋ wə udzəm.

¹⁶À may kə wi tə nə kpu koʼ way. Tə muu n luʼu key daa kə baŋanə fuu n jìi zey wù sɔŋtsuʼ way ni koʼ wi. Wù loʼ way tə koʼ koʼ tsənə wi nkee tə nə koʼonə wi. Nkɔʼlə ndzəm nsə daʼa kə i loʼ tə wi tə mbi nə bə may. A may kə sey.

¹⁷Dza ndow tə ghə̂ ghey ghə kuumnə n mbi zən nya nə̀ kə ghə nə ghaŋŋə wû wə, kə ghə nə gaʼa soʼonə fə̀ŋ tə ghə tə n fə u mbi nə u doʼlə tsuŋŋə way, ghə fəd gaʼ ndow fə̀ŋ tə ghə n kow Zə̀ kə, tə fuunə saa n fə wə udzəm nə saa i muu muu i dzuŋu zə naʼ idzəm.

¹⁸Dza tə ghə nə̀ ghə i ghəŋŋə ghəə a dzuŋu ghə, ghə i dii kùm i ghə zə n ghəə a dzuŋu ghən ghə ghəŋŋənə. Ghə i buu n wɔɔ kə ni gaamə ghə̂ ghey ghə laʼanə fə wə, ghə i khə soʼo zày ni fuu dzaw fə wey ghə khənə tə ghə̂ ghə.

¹⁹Abə ghə ghəŋŋənə ghəə a dzuŋu ghən, ghə sey bayyə naŋŋə bənə u ghə u dzuŋu n mbi zən i bəghənə, sey ghə i loʼ ni keeli muu zən i ndzəm loʼnə muu zə.

²⁰Timoti, tɔʼɔ kwu keeli fə key Zə̀ kə fuu naŋanə tə wɔ nə̀ wə i keyyə. Kə wə nə zəllənə ghɔɔmə tən tə fuu way ngɔɔmə zə tə Zə̀ kə nsə ghɔɔmə tə laʼlə tən ghə̂ a loʼ a dza nə̀ a loʼ utɔb loʼ sey nə̀ à way dzə utɔb.

²¹N dza sey n təŋkey ghə̂ ghey ghə moʼlə nə̀ ghə khə tɔb wən, ghə n nyəŋ laʼ n tûm i dzuŋu zən dzûmə tə Klisto tə bəghəmnə tii. N gɔŋŋə nə̀ ndzuŋ ə Kəzə̀ i loʼ ghi ghaa adzəm.