Read Weh 2 Timoti 2 Bible Online

2 Timoti 2 - Weh bible

2 Timoti 2

¹Abə wɔ a Timoti, wə loʼ waa wuŋ u dzuŋu wə, n gɔŋŋə nə̀ wə i taw bòʼ ndzuŋ zən Zə̀ kə fuunə tə wɔ nghee saa loʼnə nə kəfə kəmɔʼ ghi Yeso Klisto.

²Ney kɔʼ ghəə ghən wə â zownə mə n diinə n sə kə ndəmə aghə̂, wə fuu naŋa tsu ghəə a tii ghə n wɔ ghə̂ ghən ghə loʼ nə wə loʼ ni gaʼ fə̀ŋ zə n kow ghə, sey nə̀, ghə i loʼ ni dii nduŋŋə ndow tə ghə̂ ghə.

³Wə khə ni fəʼlə soʼo ghi mə tə a loʼ sawgoʼ u dzuŋu wə tə Yeso Klisto.

⁴Sawgoʼ i loʼ i way dzə nə̀ i nam fwaʼanu, i fuu may ndownə wû u wi wə n muu i ghə̂ ghən ghə way sawgoʼ tə. I wi i loʼ kə ni ghəŋə ghəə zey i kpiilənə tə wù nii wi.

⁵Wù wən tə nyəŋə ballənə, way dzə ni nyəŋ zə̂ kəfə abə tə nyəŋə way tə laŋ u nyəŋə u tii u diinə.

⁶Wù wey tə ndzəmə ndəminə səŋ zə ni fwaʼ nə usum, à kpii wi ni ney tuʼ zə ufəzəə i wi isə abə ghə kpey fən bənə.

⁷I tɔʼɔ moʼlə tsu ghəə ghən n dza kɔʼɔ bənə fa tə wɔ, n təŋkey, Mûkəbii i ghəŋənu nə̀ wə tɔʼ zowkeeli ghəə a tii ghə adzəm.

⁸Keeli tsu nə̀ Zə̀ kə â zhəm dzəŋŋə bə Yeso Klisto wən tə loʼnə waa waa fɔ̀ɔ Devid nə ivə. À wən loʼ tûm i dzuŋu zən n naʼlənə.

⁹N fa fəʼlənu, ghə u kùm naŋa daŋŋə mə nə tətsaʼ tə a loʼ wù tsɔŋɔ n təŋkey n naʼlə tûm i dzuŋu zən. Ghə i dzuŋu i loʼ kə nə̀ ghə way ni kùm naŋa dzə ghɔɔmə i Kəzə̀ nə tətsaʼ.

¹⁰À wey loʼ i ghii n kownə fə̀ŋ nə aghəə adzəm n tow u ghə̂ ghən Zə̀ kə sàynə ghə, sey nə̀, ghə loʼ ni keeli soʼo ibəghəshi n bam i Yeso Klisto, ghə keeli soʼo kɔʼlə mən n nə may way.

¹¹Ghɔɔmə zən loʼ isəŋə nə̀, “Abə saa kpu nə̀ saa loʼ nə kəfə kəmɔʼ ghi wi Saa i muulə soʼonu nə kəfə kəmɔʼ ghi wi.

¹²Abə saa tɔʼ kow tsunə fə̀ŋ tə, Saa i dzəŋi saʼa soʼo mbi ghi wi. Abə saa tuu maʼanə wi, Tə i tuu maʼa soʼo saa.

¹³Abə saa khə way bəghəm i fə̀ŋ zə n kow wi, Tə i nam loʼ kə wù wey tə loʼnə ghii wə, Tə way dzə ni tuu maʼa wû u wi.”

¹⁴I zəŋŋə zeeli ndow ghə̂ a Kəzə̀ ghə n ghəə ghən n dza bənə tə wɔ. Wə khə ni teeli kii naŋa ndow ghə n sə K-a-zə̀ nə̀ kə ghə nə ngii baŋŋənə fəghəm tə n ghɔɔmə i laʼlə zə. Ndzoʼo ghɔɔmə tə tii tə buʼ khə way gaamə i loʼ zə, tə fədlə sàʼà maʼa tɔb u ghə̂ ghey ghə zəllə bənə.

¹⁵Ndəmi tsu wû wə ni doʼo tə a loʼ wù kəfwaʼ wən Zə̀ kə bəghəm naŋanə, ndzoʼo wù kəfwaʼ wey tə dədlə way n tow kə, wù kəfwaʼ wey tə loʼ soʼonə ni tɔʼ tiilə dza tûm zən i loʼnə isəŋə.

¹⁶Ka i nyiə n ghɔɔmə tən tə fuu way ngɔɔmə zə tə Zə̀ kə nsə n ghɔɔmə tə laʼlə tə n təŋkey, ghə̂ ghey ghə nyiənə n ndzoʼo ghɔɔmə tən, ghə n nyəŋə laʼa nay ndow n ghəə a Kəzə̀.

¹⁷Ndzoʼo ghɔɔmə i laʼlə i ghə i tii zə, loʼ tə a loʼ kədzə̀ kə kɔmnə wù. Hemenus ghi Filetus loʼ ndzoʼo ghə̂ a ghən.

¹⁸Ghə̂ ghən dii ghəə ghey a way isəŋə. Ghə dii nə̀ ghə̂ a mâ nə kpu, zhəm dzəŋŋə tsəghə nə ivə. Laʼlə kə ighɔɔmə kə ghə kə tii kə fwɔdlɔ maʼa ghə̂ a loʼ ghey ghə bəghəmnə tə Klisto.

¹⁹Ghə i dzuŋu i loʼ nə tsə kə ndaw key à səd kɔʼ bənə Zə̀ kə, fə kə loʼ kə way ni soʼlə, ghə a tɔ̀ɔ naŋa tsu tii nə̀, “Mûkəbii khənu ghə̂ ghey ghə loʼnə a wi ghə”, Nsə nə̀, “Ghə̂ ghey adzəm ghə dzanə nə̀ ghə loʼ n tənə zəd i Mûkəbii, Ghə khə ni tyi zəghə maʼa ghəə a bəbə ghə.”

²⁰N ndaw wù nii, lii tə ufə tə loʼ fu. À kad way kə fə wən ghə faalə nə itsàa nsə n tsâa zə ishɔ̀lɔ̀, fə u loʼ soʼonu fu ghə faalənə nə nkaʼ nsə nə itsaʼ. U loʼ u loʼnu nə̀ a loʼ fə u kuum ighəə, u loʼ wə a loʼ nə̀ à maŋ loʼ soʼo u wən ghə fwaʼa kaabənə tii nəŋə tədzəm.

²¹Wù wey tə sòw nuu tsu wû u wi wə n ghəə a bəbə ghə, tə i doʼo bə tə a loʼ fə kə kuum ighəə, n təŋkey tə zownu n sə kə mûkəbii wi, tə n bayyə naŋa wû u wi wə, ləmmə tənə soʼo ni fwa fwaʼ kə dzuŋu kə.

²²Kə wə nə dzûmənə ghəə ghən waa a fəghaŋ a ləghənə ni ghəŋŋə, i fədlə dəmə ndow kə ni ghəŋŋə ghəə ghən a loʼnə tsətsəghə, khə bəghəm i fə̀ŋ n kow Klisto, ləghə aghə̂, muu soʼo nə ibuulə. I ghəŋŋə ndow ghəə ghən ghi ghə̂ ghey ghə ndzəm dey dza ndow ghəə a ghə ghə tə Mûkəbii n fə̀ŋ tə zow tə.

²³Kə wə nə dzûmə soʼonə ghɔɔmə tə laʼlə tə nsə ghə̂ ghən ghə maŋa fəənə dzuu ghə kənunu n təŋkey, ghəə a tii a ghəŋŋənu ghə̂ ghən n baŋŋə zeeli təfəghəm.

²⁴Wù wey tə loʼnə wù kəfwaʼ a Mûkəbii, khə way ni kəŋə ghɔɔmə zə, tə fəd khə ni khə fə̀ŋ i dzuŋu zə n kow ghə̂ ghə adzəm. Tə khə soʼo ni loʼ wù wey tə khə ni dii dzɔb aghə̂, khə soʼo ni kow fə̀ŋ abə tə diinə ghə̂ ghə.

²⁵Tə khə ni dii ndow ghə̂ ghey ghə zuulə baalənə wi nyaŋi fənyaŋi, n nəŋə i loʼ zə Zə̀ kə loʼnu ni ghəŋə nə̀ ghə kweyyə nuu bə fə̀ŋ tə ghə n ghəə a bəbə ghə, ghə zowkeeli soʼo isəŋə.

²⁶Sey, tɔb u ghə u loʼ ni fən nyi dzəŋŋə bə, tə̀ ghə tyi nuu shi n tsaʼ fə Satan fən ghə ney doʼonə tii nə̀ ghə i zow bə kə tə wi.