Read Weh Taytus 1 Bible Online

Taytus 1 - Weh bible

Taytus 1

¹À màʼlə kən tɔ̀ɔ bə mə Pɔl. N loʼ wù kəfwaʼ ə Kəzə̀, lòʼ soʼo ngəd ə Yeso Klisto. Zə̀ kə â say kɔʼ mə, tûm bə nə̀ n bə gaamə ni ghəŋə nə̀ bəghəm i fə̀ŋ i ghə̂ ghən Zə̀ kə sày naŋa nə̀ ghə doʼo ghə̂ a wi, zə i nyîmmə, n ghəŋə soʼo nə̀ ghə keeli isəŋə zey i loʼ ni gaamə ghə nə̀ ghə i muu n jìi zey Zə̀ kə ləghənə.

²Isəŋə zən i ghəŋŋənu, ghə i loʼ ni muu, ləmmə tənə nə̀ Zə̀ kə i fuunu ghə n muu zən i may way. Zə̀ kə kən kə badla way ghəə ghə, â təb naŋa saa n muu zə itsali zən tə̀ wi ni bɔm mbi.

³Ambə nəŋə i kpi tsunə, Zə̀ kə n ghəŋə nə̀ ghə̂ a keeli ghəə a tii ghə n bam i tûm ə wi i dzuŋu zən n naʼlənə. À loʼ Zə̀ kən kə bəghəshiənə saa, kə fuu naŋanə mə n fwaʼ kən nə̀ n fwaʼ.

⁴N tɔ̀ɔ bə màʼlə kən tə̀ wɔ a Taytus, wə ndzəm loʼnə tə̀ a loʼ waa wuŋ u səŋi wə n təŋkey saa dzəŋi bəghəm tə̀ Klisto. N gɔŋŋə nə̀ Zə̀ kə, tə loʼ Bày nsə Yeso Klisto, tə loʼ Bəghəshi saa, dii wɔ n fə̀ŋ i dzuŋu zə, ghə fuu soʼo wɔ n buulə zə.

⁵Zuŋ key mə â naŋa taʼa tsunə wɔ n Krit â loʼ nə̀ wə bayyə naŋa may kaabə bə ghəə ghey ghə â doʼo səənə, nsə nə̀ wə sày naŋa kɔʼ təngəd n dzəŋi u dzûmə tə Klisto n naʼa mey ndzəm n dəŋə kə tii kə. Bɔɔmə ghəŋə ndow tə̀ mə â dzanə tə̀ wɔ.

⁶Wù wey tə loʼnə Ngəd n dzəŋi kə dzûmə tə Klisto khə ni loʼ wù wey tə loʼnə tsətsəghə nə̀ tə khə way bwu i loʼ zə. Tə khə ni khə kə wey umɔʼ. Waa a wi a khə ni loʼ dzûmə tə Klisto tə, nyey way, taw soʼo way n tow kə.

⁷Nghee i loʼ nə̀ wù wey tə loʼnə tow kə n dzəŋi kə dzûmə tə Klisto kə, à laalə wi fwaʼ K-a-zə̀ kə, tə khə ni loʼ nə̀ tə khə way bwu i loʼ zə n ghəə a wi a ghəŋŋə ghə. Tə khə way ni kaŋŋə ghɔɔmə, khə way mbow fə, məə khəə way nlə mə, kəŋə way chɔd wə, shiə soʼo way n sə ghə nə ukhəə.

⁸Tə fəd khə ni loʼ wù wey tə kpiney dzɔbənə ghə̂ ghə, ləghə kə ghəə zey i dzɔbənə. Tə khə ni loʼ wù wey tə loʼ ni kwu keeli wû u wi, loʼ tsətsəghə, zow, khə soʼo nghee tə teyyənə ghow kə ibwey kə wi kə a tii.

⁹Tə khə ni loʼ wù tə ndzəm bəghəmnə naŋanə tûm i dzuŋu zə bòʼ Yeso Klisto ighələ tə̀ tə â zoʼlə neynə, sey nə̀, tə i loʼ ni kuu nduŋŋə ndow fə̀ŋ tə ghə̂ a loʼ ghə nə̀ isəŋə i tii zə, tə i loʼ soʼo ni faalə tiilə ndow aghəə tə̀ ghə̂ ghey ghə tuu maʼanə tûm i dzuŋu i tii zə.

¹⁰N dza sey n təŋkey ndzoʼo ghə̂ ghey ghə tuu maʼanə tûm i tii zə ndəŋ loʼnu, a ka ndɔm dza ghə̂ a Təjuu ghən ghə təmi taw kɔʼnə nə̀ ghə khə ni teeli səghə tyi kə wù tə̀ wi ni keeli ibəghəshi. Ghə tuu ni zow tə̀ ghə̂ ghey ghə loʼnə tow wə, nəbə kaabə tsə soʼo aghə̂ nə təghɔɔmə nə̀ tə way ni gaamə wù n ghə i loʼ zə.

¹¹Wə khə ni ghəŋə nə̀ ghə buu naŋa ghɔɔmə i ghə i tii zə, n təŋkey ghə fwɔdlɔ maʼa kaabə təndaw tədzəm nghee ghə diinə ghə n ghəə ghey ghə khə way daʼa kə ni dii. Ghə ghəə a badla ghən dii kaabə n təŋkey ghə ləghə nə̀ ghə̂ ghə i fuu bə ghə n khəə wə.

¹²Wù tûm Kəzə̀ u loʼ wə nə̀ à loʼ wù Krit mâ dza isəŋə nə̀, “Ghə̂ a Krit a badla aghəə nəŋə tədzəm, tsɔb u tənyam, loʼ soʼo fə u lay wə nə̀ ghə mey zəənu”

¹³Ghəə ghən wù tûm Kəzə̀ wən â dzanə bòʼ ghə̂ a Krit loʼ isəŋə. À wey loʼ ghə i tii zə wə khə ni kpaa tənə tsu ghə n sə kə ghə, sey nə̀ ghə loʼ ni təmi taw tsu n bəghəm i fə̀ŋ i ghə.

¹⁴Ghəŋə nə̀ kə ghə nə kəm naŋŋə tuŋŋə wə n zəzəə n ghə̂ a Təjuu mey ghə bə̀ghə̀ shiə kɔʼɔnə, kə ghə nə bwey soʼonə n laŋ u ghə̂ ghən ghə tuu maʼanə isəŋə.

¹⁵Fə udzəm u zownu tə̀ ghə̂ ghən ghə zownə. A kee bə ghə̂ ghey ghə fwɔdlɔnə luʼu tə, bəghəm soʼo way tə̀ Zə̀ kə, aghəə adzəm tə̀ ghə loʼ ghəə a dzəə ghə n təŋkey, moʼlə tə ghə nsə fə̀ŋ tə ghə tə fwɔd doʼo soʼonu.

¹⁶Ghə maŋa dza nə̀ idzuu nə̀ ghə khənu Zə̀ kə, loʼ sey nə̀ ghəə a ghə a ghəŋŋə a dii bənu nə̀ ghə tuu maʼanu wi. Ghə khə mwam n bəbə mə, zow way tə̀ Zə̀ kə, way soʼo ni ghəŋə ghə i loʼ zə i dzɔbənə.