Read Weh Taytus 2 Bible Online

Taytus 2 - Weh bible

Taytus 2

¹A kee bə wɔ a Taytus, wə khə ni teeli dii ndow kə dzûmə tə Klisto tə n ghəə ghey a bəghəm dzəŋi kɔʼnə ghi ghəə a Kəzə̀ ghə.

²I dii ndow nyim tə agheynun tə nə̀ ghə keeli tsu fə̀ŋ tə dzuŋu tə, ghəŋŋə ndow aghəə n jìi zey ghə̂ ghə i fuunə ghə n ngɔɔmə zə, kwɔɔ tsu soʼo wû i ghə. Ghə khə ni tɔʼɔ taw n bəghəm i fə̀ŋ i ghə, khə iləghə n wû i ghə, kow tsu soʼo təfə̀ŋ n bəghəm i fə̀ŋ zey ghə khənə n kow Klisto abə a tsəmə shiə kə ghə i ghaa zə.

³N jìi i mɔʼɔ zə, dii ndow nyim tə agheyzən tə nə̀ ghə i muu muu zey i khə way bwu i loʼ zə n sə K-a-zə̀. Kə ghə nə khəənə fəghəm tə, kə ghə nə doʼlə soʼonə kɔd wə nlə wə. Ghə khə ni teeli dii kə ghəə ghey a dzɔbənə.

⁴Abə ghə khənə ndzoʼo mwam wən ghə i loʼ ni tsə̀ waa a fəghaŋ a zən ghə nə̀ ghə i ləghə num a ghə ghə nsə waa a ghə ghə.

⁵Ghə i loʼ ni tsə̀ waa a zən ghən nə̀ ghə i kwɔɔ tsu wû i ghə zə, khə soʼo way bwu i loʼ zə. Ghə i loʼ soʼo ni dii tə waa a zən ghən nə̀ ghə khə ni fwaʼa dzɔbə n ndaw tə ghə, zow soʼo tə num a ghə ghə, sey nə̀, kə wù loʼ nə dza ghə i bəbə i loʼ zə bòʼ ghɔɔmə i Kəzə̀.

⁶N jìi i mɔʼɔ zə, wə khə ni kuu ndow soʼo fə̀ŋ tə waa a fəghaŋ a num ghə nə̀ ghə i kwɔɔ tsu wû zə nə aghəə adzəm.

⁷Wɔ n wû wə wə̀ a Taytus, wə khə ni ghəŋŋə ghəə ghey a dzɔbənə nəŋə tədzəm sey nə̀ ghə loʼ ni koʼ ney kɔʼ mwam u dzuŋu wey wə khənə. Ghəə ghey wə diinə khə ni loʼ isəŋə, kə wə nə səə soʼonə.

⁸I dii kə ghəə ghey a kpiinə nə̀ wù loʼ way ni khə̂mə wɔ, sey nə̀ tow kə i dəd ghə̂ a təngəmə ghə abə ghə i laalə kii tsunə ghə i bəbə zey ghə loʼ ni dza tow u saa.

⁹Abə ghə̂ ghey ghə loʼnə kɔd wə, wə khə ni ghəŋə nə̀ ghə i zow tə ghə mûkəbii a ghə ghə, ghə ghəŋə soʼo nə̀ ghə mûkəbii a tii ghə i duʼlə nə aghəə adzəm. Kə ghə nə ghɔɔmə dzəŋŋə soʼonə n dzə̀ tə bəbə tə tə̀ ghə.

¹⁰Kə ghə nə tsɔŋɔnə n wɔ ghə mûkəbii a ghə ghə. Ghə fəd khə ni dii ndow tə̀ ghə mûkəbii a ghə ghə nə̀ ghə khə mwam u dzuŋu wə nəŋə tədzəm n jìi zey ghə loʼ ni gaʼ fə̀ŋ n kow ghə. Ghə keeli tsu ndzoʼo mwam wən ni ghəŋə nə̀ ghə̂ ghə i koʼo bə nə̀ ghəə ghey adzəm ghə zoʼlənə bòʼ Zə̀ kən kə loʼnə bəghəshi ə saa, a ndzəmə dzɔbənu.

¹¹Zə̀ kə n dii bə tə saa ndzoʼo fə̀ŋ i dzuŋu zey tə khənə nghee tə bənə ni bə bəghəshi aghə̂ adzəm.

¹²À loʼ n bam i fə̀ŋ i dzuŋu zən Zə̀ kə dza bənə tə̀ saa nə̀, saa tuu maʼa muu zey Zə̀ kə ləghə way, saa ka gaʼ soʼo fə̀ŋ tə n fə u mbi. Tə ləghə nə̀ saa i loʼ ni kwu keeli muu i saa, ghəŋŋə ghəə ghey a kpiinə, ghəŋŋə soʼo ghəə ghey tə ləghənə nghee saa muunə fa n mbi zən.

¹³Nghee tə saa ndzəmə ləmmənə tsuʼ fə nii fey saa khənə nə̀ fə i bə ghəŋŋə nə̀ saa ngii duʼlə, saa keyyə tənə nə̀ Zə̀ kə saa kə səŋi kə nsə bəghəshi ə saa tɔŋŋə Yeso Klisto, bə n wû u kədə̀ŋ.

¹⁴À loʼ wi tə â fuu ndownə wû u wi wə ni kpu n tow u saa ni bəghəshi saa n ghəə a saa a bəbə ghə adzəm nsə ni sow maʼa ghəə a saa a bəbə ghə, sey nə̀, saa doʼo bə ghə̂ a wi, khə tən soʼo zày ni ghəŋŋə ghəə ghey a dzɔbənə.

¹⁵Sey, a wən loʼ ghəə ghən wə khə ni dii ndow tə dzûmə tə Klisto tə. I kuu ndow fə̀ŋ tə ghə tə, kpaa tənə ndow soʼo ghə abə ghə ghəŋə bəəbə tsunə ghəə zə tə a loʼ wù wey tə khənə daʼa kə tii kə. Ka tsəm bəghəm nə wù loʼ koʼ kìi wɔ.