Read Weh Taytus 3 Bible Online

Taytus 3 - Weh bible

Taytus 3

¹Zəŋŋə ndow ghə̂ ghə ghə̀ a Taytus nə ghə i zow tə̀ ghə̂ ghey ghə saʼanə naʼ zə nsə ghə̂ ghən ghə loʼnə tow wə, naŋŋə soʼo laŋ u ghə. Ghə i ləmmə tənə kə ni ghəŋə ghəə zey i dzɔbənə nəŋə tədzəm.

²Dza tə̀ ghə nə̀ kə ghə i ghɔɔmə ghə i bəbə zə bòʼ wù loʼ. Kə ghə nə kəŋənə chɔd wə, ghə i maʼlə tsu wû wə n ghəə a ghə a ghəŋŋə ghə, dii ndow soʼo mwam u dzuŋu wə tə̀ ghə̂ ghə adzəm.

³N dza sey n təŋkey, saa soʼo, saa â bùʼ loʼ tsə ghə̂ a laʼlə ghə tə a loʼ ghə. Saa â zow way tə̀ Zə̀ kə, ghəŋŋə soʼo ghəə a bəbə ghə. Ghə n məŋŋə naŋa saa, saa n fəd doʼo ndow ukɔd n baa fə u mbi. Saa n muu tən kə ni ghəŋŋə ghəə a bəbə ghə nsə ni mbuŋŋə fə wey ghə̂ a khənə. Saa n ghəŋə nə̀ ghə̂ ghə i baa saa, saa n baa soʼo wû i saa.

⁴Zə̀ kən kə loʼnə bəghəshi ə saa n kee dii bə fə̀ŋ ə wi i dzuŋu zə nsə ləghə i wi zə tə̀ saa,

⁵tə n bəghəshi tsu saa. Tə â ka bəghəshi dzə saa a dza saa ghəŋə ghə i dzuŋu i loʼ zə, tə â fəd bəghəshi saa bòʼ sî i kwɔɔlə zey tə khənə n kow saa. Tə â bəghəshi saa n bam i Zay kə Zow key tə â tûm bənə nə̀ kə bə sow maʼa saa n ghəə a saa a bəbə ghə, tə ghəŋə soʼo nə̀ saa kweyyə kɔʼ mwam u saa, saa keeli bə muu i fəghə zə.

⁶Zə̀ kə â fuu bə saa n Zay kə Zow kə naʼ idzəm n bam i Yeso Klisto tə loʼ bəghəshi saa,

⁷sey nə̀, n bam i fə̀ŋ i dzuŋu zən tə khənə, tə i ghəŋə nə̀ saa i loʼ ni doʼo bə tsətsəghə n sə K-a-zə̀, saa i loʼ soʼo ni bə keeli fə wey tə ləghənə ni fuu tə̀ saa nghee saa ləmmə tənə ni keeli muu zə itsali.

⁸Ghəə ghən n dza bənə fa tə̀ wɔ ndzəm loʼ isəŋə. N ləghə nə̀ wə i tɔʼɔ dza kuulə ndow ghəə ghən tə̀ ghə, sey nə̀ ghə̂ ghən ghə bəghəmnə tə̀ Zə̀ kə, loʼ ni khə zày ni ghəŋŋə ghəə ghey a dzɔbənə. Ghəə a tii a dzɔbənu, loʼ soʼo ni gaamə aghə̂ adzəm.

⁹Kə wə nə bweynə fə wə ghi ghə̂ ghey ghə ləghənə ni fəə dzuu ghə n laʼlə tə aghəə, a ghey ghə ləghə ni taŋŋə wey tə n zəd a ghə̂ nə̀ ghə mâ kpu tsəghə. Kə wə nə bəghəm naŋŋə soʼonə ghəə ghey ghə zuulə zeelinə bòʼ laŋ kə ghə̂ a Təjuu n təŋkey, ghəə a tii a tsəə way, gaamə soʼo way n ghə i loʼ zə.

¹⁰Abə wù loʼnə n fəŋŋə kə ghaa nə̀ tə ləghə ni ghəŋə nə̀ ghaa dzawwə doʼo, wə n kii naŋa ndow wi ni kɔʼ shi tənəŋə təbəghə, nə̀ wù tii ka zow, ghaa n nyoʼo dzəm tə wi.

¹¹Sey, ghaa n daŋŋə keeli nə̀ ndzoʼo ghə̂ ghən loʼ ghə̂ a tsɔŋɔ ghə, n təŋkey ghəə a bəbə ghey tə ghəŋŋənə dii tənə bənu nə̀ muu i wi i dzɔbə way.

¹²Abə mə i tûm bənə Atemas nkee Taychikus n səə wɔ, wə i dəm tən tsu ni kwɔɔlə bə mə n naʼ i Nikopolis, n təŋkey, mə n bayyə naŋa n fə̀ŋ zuŋ ni doʼo kəŋə ndow fu n nəŋə zey fəb u ngii loʼnə.

¹³Dəmə tən tsu ni fuu tsu igaamə tə̀ Zenas wən tə loʼnə wù dii kəlaŋ ghi Apolos ni koʼ n nghee ghə i bweynə tii. Wə tɔʼ koʼ tsu soʼo nə̀ ghə khə maynu fə wey ghə ləghənə n bwey i ghə.

¹⁴Ghəŋə tsu soʼo nə̀ ghə̂ a saa a zoʼlə tsu ni ghəŋŋə ghəə ghey a dzɔbənə, sey nə̀, ghə i loʼ ni gaamə ghə̂ ghey ghə khə way n fə wey ghə ləghənə, ni ghəŋə nə̀ kə waazə a saa n muulənə muu zey i tsəə way.

¹⁵Ghə̂ ghey adzəm ghə loʼnə fa ghi mə, tɔŋŋə zow bə wɔ. Tɔŋɔ zow tsu soʼo fə a saa ghey ghə loʼ nə̀ ghə bəghəm soʼo tə̀ Yeso Klisto. Zə̀ kə dii fə̀ŋ ə wi i dzuŋu zə tə̀ ghaa adzəm.