Read Weh Filemun 1 Bible Online

Filemun 1 - Weh bible

Filemun 1

¹À màʼlə kən tɔ̀ɔ bə mə Pɔl. N loʼ wù ndaw tsaʼ bòʼ fwaʼ kən n fwaʼa nə tə Yeso Klisto. N maʼlə kən tɔ̀ɔ bə ghi waazə ə saa Timoti. Ghey tɔ̀ɔ bə tə wɔ a Filemun, wə loʼ fə̂ ə ghey u dzuŋu wə, wə fwaʼa dzəŋinə ghi ghey.

²Ghey tɔ̀ɔ bə soʼo màʼlə kən tə Afia waazə ə ghey, Achipus wən tə fwaʼa dzəŋi ghi ghey nsə tə ghə̂ a ndaw Kəzə̀ ghən ghə nyiənə n ndaw zə a Filemun.

³N gɔŋŋə nə̀, Zə̀ kə, tə loʼnə Bày saa nsə Mûkəbii ə saa Yeso Klisto, mə fuu ghaa ndzuŋ nsə buulə zə.

⁴N fuu kəzɔŋŋə nəŋə tədzəm bòʼ wɔ a Filemun abə n gɔŋŋənə tə Zə̀ kə.

⁵N fuu kəzɔŋŋə n təŋkey mə n zow ndzoʼo ləghə zey wə khənə n kow ghə̂ a Kəzə̀ ghə adzəm nsə bəghəm i fə̀ŋ zey wə khənə n kow Mûkəbii Yeso.

⁶N gɔŋŋə nə̀ wə i loʼ ni tɔʼ zowkeeli ghəə a dzuŋu ghən adzəm saa keeli abə saa loʼnə nə kəfə kəmɔʼ ghi Klisto nghee saa bweynə nə kəghow kəmɔʼ n bəghəm i fə̀ŋ i saa tə a loʼ waa a Kəzə̀.

⁷N waazə, n ngii duʼlənu, fə̀ŋ zuŋ u zow soʼo n ndzoʼo ləghə zey wə diinə tə ghə̂ a Kəzə̀ ghə. Ləghə zey wə diinə n kuu fə̀ŋ tə ghə̂ a Kəzə̀ ghə adzəm.

⁸Nghee tə n loʼnə nə kəfə kəmɔʼ ghi Klisto, n mə loʼnu ni dəb dza bə tə wɔ nə wə ghəŋə ghəə zey i kpiilənə ni ghəŋə.

⁹Nghee n sə ləghənə wɔ, a wey loʼ i ghii n buʼu bənə wɔ n wɔɔ kə. N tsəmə ney dzə way n taŋ nə̀ mə Pɔl, n loʼ nyim kə wù, loʼ soʼo n ndaw tsaʼ bòʼ Klisto.

¹⁰N buʼu bə kəwɔɔ tə wɔ n tow kə Onesimus tə loʼnə waa wuŋ n ndaw Kəzə̀. Mə â doʼo bə bày wi nə n loʼ fa n ndaw tsaʼ.

¹¹Tə â buʼ khə tsə way gaamə zə tə wɔ, a kee bə nya, tə ndzəm khənu gaamə tə wɔ ghi mə.

¹²N tûm dzəŋŋə bə wi ibam tə wɔ, keeli tsu nə̀ tə loʼ tə a loʼ fə̀ŋ zuŋ.

¹³Abə à mə loʼ kə tə mə, n mə dza nə̀ tə doʼo səə tsu fa ghi mə, tə i gaamə kɔʼɔ mə n tow kə nghee tə n loʼnə n ndaw tsaʼ boʼnə n naʼlə tûm i dzuŋu zə.

¹⁴À kee loʼnə n ləghə way ni kwu naŋa wi nə kədaʼa nə n ka bəb zow kɔʼ dzə tə wɔ. N ləghə nə̀ i doʼo tsu nə à tsə̀m wɔ nə tə doʼo fa ghi mə, à way dzə nə a loʼ mə n tənnə nə wɔ.

¹⁵N nəŋə i loʼ zə, zuŋ key Onesimus â zəghə tsunə wɔ n tɔŋɔ fə inəŋə, â loʼ nə, tə i kəm bə doʼo tən bə ibam ghi wɔ.

¹⁶Tə kəm bəghə dzəŋŋə dzə way tə wɔ tə a loʼ kəkɔd, tə nya bəghə dzəŋŋə tə a loʼ wù kəfwaʼ wey tə tsəghəshinə kɔd kə. Tə nya baa loʼ waazə ə saa n ndaw Kəzə̀. N ngii ləghənu wi, n khənu nə abə wə i kəm koʼnə wi wə i buʼu ləghə wi, u tsəghəshi daŋŋə mə. Wə i ləghə wi tə a loʼ wù sɔŋtsuʼ nsə tə a loʼ waazə wə n ndaw Kəzə̀.

¹⁷Abə wə khə nə̀ ghi wɔ dzəŋi fwaʼa kəfwaʼ kəmɔʼ, kpiney wi tə wə loʼ ni kpiney mə.

¹⁸Abə a loʼ nə tə mâ kpaʼi ghəŋə bəəbə wɔ n ghə i loʼ zə, nkee tə kpaʼi khənə wɔ n ndaŋ kə, tɔ̀ɔ naŋa tsu n zəd zuŋ.

¹⁹À tɔ̀ɔ tsu mə Pɔl n wɔ kuŋ kə nə̀ mə i tsəə dzəŋŋənu wɔ. N khə dzə way ni zə̀ŋŋə wɔ nə a loʼ mə, mə â ghəŋənə wɔ nə wə doʼo dzûmə Klisto.

²⁰N waazə, n buʼu bə kəwɔɔ tə wɔ n zəd i Mûkəbii nə̀ wə fuu mə n gaamə zən. Wɔ, tə a loʼ wù wən tə loʼnə nə kəfə kəmɔʼ ghi Klisto, ghəŋə nə̀ fə̀ŋ zuŋ i zow dzɔbə.

²¹N khənu nə̀ wə i ghəŋŋənu ghəə ghən n bəbə bənə tə wɔ, wə i ndzəmə ghəŋŋənu. N tsəm khənu nə wə ghəŋŋənu, wə i buʼ ghəŋə tsəghəshi daŋŋə tə n moʼlənə.

²²Ghəə i loʼ i loʼ kpiʼinu, bayyə naŋa tsu mə n dzuu i ndaw zə, n təŋkey, n khə tənnu nə̀ Zə̀ kə i kuʼlə zownu gɔŋŋə tə ghaa tə, tə ney dzəŋŋə bə mə tə ghaa.

²³Epafras wən tə loʼ dzəŋinə fa n ndaw tsaʼ ghi mə bòʼ Yeso Klisto tɔŋŋə zow bə ghaa.

²⁴Ghə̂ ghən ghə fwaʼa dzəŋinə ghi mə tɔŋŋə Mak, Aristakus, Demas nsə Lukas, tɔŋŋə zow bə soʼo ghaa.

²⁵N gɔŋŋə nə̀ Mûkəbii Yeso Klisto fuu ghaa n ndzuŋ.