Read Weh Hibru 1 Bible Online

Hibru 1 - Weh bible

Hibru 1

¹Sə̂ isə, Zə̀ kə â ghɔɔmə tə̀ ghə bày bày a saa ghə n ndəmə tə tənəŋə nsə n ndəmə tə təjìi n bam i tûm tə Kəzə̀.

²Abə nya n num tə tən, Zə̀ kə ghɔɔmə bə aghəə tə̀ saa n bam i waa wi. À loʼ waa wi wən Zə̀ kə â bɔmnə fə wə udzəm n bam i wi, à loʼ soʼo wi Zə̀ kə â sày naŋanə nə̀ à i zə̂ wi fə wə udzəm fa n mbi.

³À loʼ wi tə dii bənə nghee tə kɔʼlə mən Zə̀ kə khənə nyiəllənə tii. Tə bɔɔmə fiilə kə Kəzə̀ nghee tə kwu keelinə mbi n daʼa kə ghɔɔmə i wi. Ambə tə sow maʼa tsunə ghəə ghə aghə̂ a bəbə ghə, tə n nuu kɔʼ ndow idəŋ, ndow doʼo tsu n kpii u Kəzə̀ u təmə wə, tə khənə daʼa kə tsəghəshi ufə udzəm.

⁴À loʼ ghəə zən Klisto â ghəŋənə, i dii bənə nə̀ tə tsəghəshi tsətəndəghə tə Kəzə̀ tədzəm, ighələ tə̀ zəd zən Zə̀ kə fuunə tə̀ wi, i tsəghəshinə zəd i tsətəndəghə tə Kəzə̀ tə tədzəm.

⁵I loʼ sey n təŋkey, Zə̀ kə ka kam dza koʼ tsə tə̀ tsəndəghə u Kəzə̀ u loʼ wə nə̀, “Wə̀ loʼ waa wuŋ, Ni ney nuu tsu n tsuʼ fə na fən, n loʼ Bày wə.” Nkee nə̀, “Mə i doʼlə Bày wi, Tə i loʼ waa wuŋ.”

⁶I loʼ soʼo n màʼlə K-a-zə̀ nə̀ nghee Zə̀ kə â tûm bənə Waa wi u sə isə wə fa n mbi, tə n dza tsu nə̀, “Tsətəndəghə tə Kəzə̀ tədzəm tə khə ni teeli ngɔɔmə wi.”

⁷Zə̀ kə dza soʼo kuum tsətəndəghə tə wi nə̀, “Tə ghəŋə naŋa tsətəndəghə tə wi nə̀ kə tə nə kweyyənə, nə̀ tə i bɔɔmə loʼ kə tə̀ a loʼ kəkɔŋŋə, Ghə̂ a kəfwaʼ a wi nə̀ ghə i bəʼlə tə̀ a loʼ nyim wə uvəllə.”

⁸Zə a tɔ̀ɔ doʼo kuum Waa wi nə̀ Zə̀ kə dza nə̀, “Zə̀ kə! Fɔɔ wə u nə̂ may koʼ way. Wə i kwɔɔ keeli ghə̂ ghə n jìi zey i loʼnə tsətsəghə.

⁹Wə ləghə kə ghəə ghey ghə̂ a ghəŋŋə nə̀ a kpiinu, bàa ghəə a bəbə ghey ghə̂ a ghəŋŋənə. À wey loʼ ghə i tii zə, Zə̀ kən kə loʼnə Zə̀ kə kə̀ sày naŋa kɔʼnə wɔ Ghəŋə nə̀ wə tsəghəshi ghə̂ ghey ghə dzəŋi loʼnə ghi wi adzəm, nghee tə tsoʼlənə wɔ n mbvə mey n ghəŋŋənə nə̀ wə i ngii khə duʼlə zə.”

¹⁰I tɔ̀ɔ doʼo soʼonu nə̀ Zə̀ kə dza nə̀, “Mûkəbii, à loʼ wɔ wə â bɔmnə fə wə udzəm n ghəlikətsə tə̀ mbi a nə kaʼnə, Fə wən udzəm u loʼ idəŋ, â loʼ soʼonə wɔɔ a kəfwaʼ ghə ghə.

¹¹Fə u tii wə udzəm u nə tsəghə nuulənu, wə nə kee ndow koʼ way luʼu kə, Fə u tii wə udzəm, u nə fəd tə a loʼ təndzə̂.

¹²Wə i gɔy nuu kɔʼɔ fə u tii wə tə̀ wù nə gɔy nuulənə ndzə̂ tə wey tə, Fə u tii wə i kwey nuu kɔʼ tə̀ wù nə kwey nuulə kɔʼɔ ndzə̂ tə wey tə ghi tə fəghə tə. A kee bə wɔ, wə nə loʼ tsə kə nə kətə̀ŋ, Muu zə i nə may koʼ way.”

¹³Zə̀ kə ka kam dza koʼ tsə tə̀ tsəndəghə u loʼ wə nə̀, “Doʼo bə fa n kpi wuŋ u təmə wə, Ni ndow kuum n nəŋə zey mə i ney naŋŋə bənə ghə̂ a təngəmə ghə ghə̀ n tənə wɔ, Tə a loʼ fə kə kə̀ gaʼa kə aghow kə.”

¹⁴Tsətəndəghə tə Kəzə̀ tə baa loʼ ghə ndee? Ghə loʼ zay wən Zə̀ kə â tûm bənə nə̀ ghə bə fwaʼ tə̀ ghə̂ ghey tə i bəghəshiənə ghə.