Read Weh Hibru 10 Bible Online

Hibru 10 - Weh bible

Hibru 10

¹Laŋ kə maŋa dii bə nyaŋi fə ghəə a dzuŋu ghey ghə i bəghənə, kə dii may bə dzə way nghee tə̀ ghəə a dzuŋu a tii a baa loʼnə tii. À wən loʼ ghə i tii zə maʼlə u mɔʼɔ wən ghə fəələnə num tənum, way ni ghəŋə nə̀ ghə̂ ghən ghə bəghənə n səə Kəzə̀, nə̀ ghə doʼo nə̀ ghə khə way bwù i loʼ zə.

²Abə i mə loʼ nə̀ ghə ndzəmə sow maʼa ghəə a bəbə ghə, ghə̂ ghən ghə ngɔɔmə Zə̀ kə, ghə mə kəm khə way moʼlə tə nə̀ ghə khə ghə i bəbə i loʼ zə. Sey, ghə mə kəm fəələ way maʼlə wə.

³À kee loʼnə maʼlə wən ghə fəələnə nùm tədzəm, à loʼ ni zəŋŋə aghə̂ nə̀ ghə ghəŋŋə ghəə a bəbə ghə.

⁴I loʼ sey n təŋkey, kaŋ tə mbɔŋ nsə kaŋ tə ji tey ghə fəələnə, way ni sow maʼa ghəə a bəbə ghə.

⁵À wən loʼ ghə i tii zə nghee wù wən Zə̀ kə â dza naŋa nə̀ i tûm bənu â dza i bə fa n mbi, tə n dza tə̀ Zə̀ kə nə̀, “Wə ləghə way maʼlə wə nsə naamə kə, Wə fədlə bayyə naŋŋə vən fə uwû fuŋ tə̀ a loʼ umaʼlə.

⁶Wə duʼlə way n maʼlə wən ghə kpəʼlənə n tsə zən ghə fəələnə maʼlə wə tii Nsə naamə kən ghə fuunə bòʼ ghəə a bəbə ghə.

⁷Sey, mə n daŋŋə dza tsu nə̀, ‘Zə̀ kə, koʼo mə wənə, Ni fwaʼ tə wə ləghənə, Tə i tɔ̀ɔ doʼo n màʼlə K-a-zə̀ bòʼ mə.’”

⁸Tə n kaʼ tsu ni dza nə̀, “Wə ləghə way maʼlə wən ghə fəələnə nə tənyam, maʼlə u ghəə a bəbə ghə, nyam tey ghə kpəʼlənə n tsə zey ghə fəələnə maʼlə wə tii nkee maʼlə u ghaa wə ghə fəələnə n ghəə a bəbə ghə. Wə tsəmə duʼlə way bòʼ maʼlə u tii wə.” Tə zə â tsəm loʼ kə nə̀ ghə n tɔ̀ɔ naŋa n laŋ kə Mushi.

⁹Tə n kəm dza nə̀, “N bə ni bə ghəŋə ghəə zey wə ləghənə.” Zə̀ kə n tuu maʼlə u wey wə, ney naŋa bə maʼlə wən Klisto â fuunə n bənə kə tii kə.

¹⁰I loʼ sey n təŋkey, Yeso Klisto a ghəŋə ghəə zey Zə̀ kə ləghənə, nghee tə â fuu ndownə wû u wi wə tə̀ a loʼ umaʼlə, ni sow maʼa tən ghəə a saa a bəbə ghə.

¹¹Tsuʼu n dzəm fɔɔngili u nii nii u ghə̂ a Təjuu ghə n fwaʼa fwaʼ kə wi tə̀ a loʼ fɔɔngili. Nəŋə tədzəm tə n fəələ kuulə kə maʼlə u mɔʼɔ wə nə̀ u way ni sow maʼa koʼ ghəə a ghə a bəbə ghə.

¹²A kee bə fɔɔngili u nii nii wən tɔŋŋə Klisto, â fuu wû u wi tə̀ a loʼ umaʼlə nəŋə imɔʼ ni sòw maʼa tən ghəə a bəbə ghə. Sey Zə̀ kə n kɔʼlə naŋa kɔʼ wi n kpii u wi u təmə wə.

¹³Ni ney nuu bə n nəŋə i tii zə, tə nya ləmmə kənu ni ndow kuum n nəŋə zey Zə̀ kə i ghəŋŋə tsu nə̀ ghə̂ a təngəmə a wi a doʼo bə fə kə wi kə gaʼa kə ifuu kə.

¹⁴I loʼ sey n təŋkey, tə â fəələ kə umaʼlə nəŋə imɔʼ, wə n ghəŋə nə̀ ghə̂ ghən ghə sow maʼa dzənə ghəə a ghə a bəbə ghə, ghə zow may tsu n sə K-a-zə̀.

¹⁵Zay kə Zow kə tiilə dza bə soʼonu ghə i mɔʼɔ zə tə̀ saa nghee kə dzanə nə̀,

¹⁶“Mə Mûkəbii n dza nə̀ à wən loʼ kaa mən mə i zə̂ə kɔʼɔnə ghi ghə N tsuʼu n mən n bəghənə. Mə i kuu naŋŋə ndow laŋ wuŋ n fə̀ŋ tə ghə, N tɔ̀ɔ naŋa ndow soʼo n tow u ghə.”

¹⁷Zay kə Zow kə n dza kpiʼi tsu nə̀, “Mə i kəm moʼlə way ghəə a ghə a bəbə ghə Nsə ghəə ghən ghə ghəŋŋənə nə̀ a kpiilə way tə̀ laŋ kə diinə.”

¹⁸Abə Zə̀ kə neyzəə dzənə ghəə a bəbə a ghə̂ ghən, à sey loʼ nə̀ saa khə way ni kəm fəələ maʼlə wə tə̀ Zə̀ kə ni sow maʼa ghəə a bəbə ghə.

¹⁹Sey, waazə ghuŋ ghə, saa khə tənnu nə̀ saa i nyiənu n Luʼu kən kə Zow tsəghənə Luʼu tə tədzəm n bam i kaŋ tən Yeso â fəələnə.

²⁰Saa i tsəghə nyiə fu n jìi i fəghə zən i ghəŋŋənə nə̀ saa keeli muu zən i may way. Yeso n chi fuu jìi zən i nyiə ndownə fu n baa kə̀ŋ kən n bam i və zən tə â kpunə.

²¹Nghee saa khənə fɔɔngili u səŋi wə tə loʼnə tow kə n ndaw Kəzə̀,

²²sey, saa khə ni ndow n səə Kəzə̀ n fə̀ŋ tə saa tə tədzəm, saa ndzəm bəghəm fuu soʼo tə̀ wi. Saa khə ni bə n səə wi nə̀ saa n sow maʼa moʼlə tə bəbə tən tə loʼnə n fə̀ŋ tə saa nə̀ tə i zow, sow maʼa soʼo wû i saa n mmuu n zow mə.

²³Saa khə ni ndow kə n sə kə ni tɔʼ kwu keeli taw tsu ghəə ghən saa bəghəmnə tii, n təŋkey, saa khə ni gaʼ fə̀ŋ n kow Zə̀ kə nə̀ tə i ghəŋŋənu ghəə zən tə â təb naŋanə.

²⁴Saa kəŋ tsu soʼo jìi ni gaamə waazə a saa ghə, nə̀ saa i khə zay ni ləghə wû i saa zə, nsə ni ghəŋŋə ghəə a dzuŋu ghə n wû i saa.

²⁵Mwam wən saa khənə ni təmə dzəŋi nəŋə tədzəm, kə saa nə buu naŋŋənə tə̀ ghə̂ a loʼ ghey ghəŋŋənə. Saa khə ni fəd ghəŋə nə̀ saa i ndəŋə təmə dzəŋi zeeli ni kuu fə̀ŋ tə saa tə, n təŋkey, ghaa n koʼ nə̀ tsuʼ fey Mûkəbii i bəghənə tii, nya kuʼlə bənu.

²⁶Abə saa ndzəm tsəghə ndow kə n sə kə ni ghəŋŋə ghəə bəbə ghə, loʼ sey nə̀ saa n keeli isəŋə, maʼlə u loʼ u kəm way dzə ni fəələ tə̀ Zə̀ kə, u loʼnə ni sow maʼa ghəə a bəbə a tii ghə.

²⁷Abə saa ndzəm ghəŋə tsunə bəb zə sey, saa i bɔɔmə ləmmə tənə kə tsuʼ fey Zə̀ kə i saʼanə mbi tii nə itsəŋ, tsəŋə soʼo faalə kə uvəllə key kə i bə ləŋi maʼanə ghə̂ a təngəmə a wi ghə.

²⁸Abə ghə loʼ ni wey maʼa wù nə̀ ghə ka kwɔɔlə sî zə a dza aghə̂ abəghə nkee atəghə, təmi tiilə bə nə̀ tə zaʼ laŋ kə Mushi,

²⁹ghaa moʼlə nə̀ Zə̀ kə i boʼo chɔdlɔ ngee wù wey tə koʼo kiinə waa Kəzə̀, ngɔɔmə way kaŋ tən tə â fəələnə n kaa mən mə â sow maʼanə ghəə a wi a bəbə ghə, kpaalə soʼo Zay kə Zow kən kə ney bənə ndzuŋ ə?

³⁰Ngoʼ ə wi i tsəghəshiənu n təŋkey Zə̀ kə mâ dza nə̀, “À loʼ mə ni dey təngəmə, Mə i ghəŋə nə̀ ghə̂ a təngəmə ghuŋ a fəghə bòʼ bəb zey ghə ghəŋŋənə.” Tə n dza soʼo nə̀, “Mûkəbii i saʼanu ghə̂ a wi ghə.”

³¹À ngii loʼ faalə kə ighəə ni nyi n wɔɔ kə Zə̀ kən kə khənə muu zə nə̀ tə chɔd wɔ.

³²Moʼlə tsu n na nghee ghaa â buʼ loʼnə tii n nəŋə zey ghaa â bəghəm kɔʼnə tûm i dzuŋu zə bòʼ Klisto. Ghaa n fəghə kɔʼ bə n ndəmə ndəmə tə aghəə, ghəə a tii ghə n ka kee taw tsəghə dzə ghaa.

³³Nəŋə tə loʼ tə, ghə n kpaalə ghaa, chɔd daŋŋə soʼo ghaa n sə kə aghə̂. N nəŋə tə loʼ tə, ghaa n fəghə dzəŋi soʼo ghi ghə̂ ghey ghə chɔdlɔnə ghə.

³⁴Ghaa â kwɔɔlə isî n kow ghə̂ a ndaw tsaʼ ghə, ghaa n bəghəm ndow nə iduʼlə nə̀ ghə bəkeeli nuu fə u ghaa n təŋkey, ghaa khənu nə̀ ghaa i keelinu fə wə, u dzɔb tsəghəshinə u wən, nə̀ wə i doʼlə tsali soʼonu.

³⁵Sey, kə ghaa nə kəm ney nuulənə fə̀ŋ zey ghaa gaʼnə n kow Mûkəbii, n təŋkey, abə ghaa ndow kə n sə kə ni bəghəm tə̀ Zə̀ kə, zə i ney bənu ghaa n naamə kə səŋi kə.

³⁶Ghaa khə ni kow tsu kə təfə̀ŋ sey nə̀, abə ghaa ghəŋə tsunə ghəə ghey Zə̀ kə ləghənə, tə i fuu ghaa n fə key tə â təb naŋanə tə ghaa.

³⁷Ghaa khə ni ghəŋə sey n təŋkey, i tɔ̀ɔ doʼo n màʼlə K-a-zə̀ nə̀, “Fəkəmə kə sa, Wù wey tə khə ni bə, i bəghənu Tə i loʼlə way.

³⁸Ghə̂ ghuŋ ghən ghə loʼnə tsətsəghə i muulənu nghee ghə gaʼnə fə̀ŋ tə ghə tə n kow mə, Abə wù ghə kee bwu khə̂mmə tsunə n bəghəm i fə̀ŋ i wi Mə i duʼlə way ghi wi.”

³⁹I loʼ nə̀, saa way dzəŋi n ndzoʼo ghə̂ ghən ghə bwu khə̂mmə tsunə, Zə̀ kə u ləŋi maʼa tsunə ghə. Saa fəd loʼ ghə̂ ghey ghə khənə bəghəm i fə̀ŋ zə n kow Zə̀ kə, kə i bəghəshiənu saa.