Read Weh Hibru 12 Bible Online

Hibru 12 - Weh bible

Hibru 12

¹Nghee i loʼ nə̀ saa khənu nɔɔ kə aghə̂ kə nii kə, ghə taʼanə ghi saa, saa zəghə maʼa ghəə ghey adzəm a təʼlənə saa n bəghəm i fə̀ŋ i saa nsə ghəə a bəbə ghey a taw doʼo bə n kow saa. Saa nyəŋ n fə̀ŋ tə saa tə tədzəm ni keeli fə key Zə̀ kə təb naŋanə tə̀ saa.

²Saa bɔɔmə naŋa ndow kə sə a saa n kow Yeso wən tə â ghəŋə nə̀ saa bəghəm tə̀ Zə̀ kə, gaamə soʼo saa nə̀ bəghəm i fə̀ŋ i saa zə i taw. Tə n kow tsu kə fə̀ŋ ni fəghə, tə bə kpu n zat kə fəkaʼ. Tə n ka dədlə kətow n ghə i tii zə n təŋkey, tə â khənu duʼlə zey tə i keelinə isə. Tə nya doʼ n kpii kə təmə kə n kuu kə fɔɔ K-a-zə̀.

³Moʼlə tsu nghee tə â kownə fə̀ŋ tii ni fəghə n wɔɔ kə ghə̂ a bəbə ghə, sey nə̀ kə ghaa nə buu khə̂mənə, ghaa tuu maʼa soʼo Kəzə̀.

⁴Nghee ghaa tsəmə dəmə kə ghi ghəə a bəbə ghə, ghaa ka kam dəm kuum dzə n jìi zey ghaa loʼ ni kpu daŋŋə tii.

⁵À loʼ nə̀ ghaa n neyzəə ghɔɔmə i dzuŋu zey Zə̀ kə â fuunə tə̀ ghaa tə̀ a loʼ waa a wi ə? Ghaa neyzəənu nghee tə â dzanə tə̀ ghaa nə̀, “N waa, i naŋŋə tsu tuŋŋə kə abə Mûkəbii fɔɔlənə wɔ, Kə wə nə fəələ soʼonə n fə̀ŋ abə tə kpaa bənə wɔ,

⁶N təŋkey, Mûkəbii fɔɔlə kə wù wey tə ləghənə, Kpaa tənə tsu soʼo ghə̂ ghey adzəm tə neynə nə̀ a loʼ waa a wi.”

⁷Sey, kow tsu n na fə̀ŋ tə n fɔɔbə zey ghaa zownə, ghaa ney ndow nə̀ à loʼ bày ghaa tə fɔɔlənə ghaa. Zə̀ kə sey laalə tə̀ ghaa tə̀ a loʼ waa a wi n təŋkey, waa u loʼ u way dzə nə̀ bày wi fɔɔlə tənə tsu way wi abə tə ghəŋə bəəbə tsunə ghəə zə.

⁸Abə tə ka fɔɔlə soʼo ghaa tə̀ tə fɔɔlənə waa a wi ghə adzəm, i sey dii nə̀ ghaa ndzəm way dzə waa a wi a jiə ghə, ghaa loʼ waa a kəmbay.

⁹Abə saa loʼ ni zow tə̀ ghə bày a saa ghə fa n mbi nə̀ a maŋ loʼ wù sɔŋtsuʼ a dza ghə fɔɔlə tsu saa abə saa ghəŋə bəəbə tsunə, i sey dii nə̀ saa khə ni zaŋŋə mbad zow tə̀ Bày saa wey tə loʼnə idəŋ abə tə fɔɔlənə saa, sey nə̀ saa i keeli muu zə itsali.

¹⁰Ghə bày a saa a jiə ghə â fɔɔlə tsu saa n kəmə fə inəŋə nghee tə̀ i kpiinə tə̀ ghə, Zə̀ kə kee fɔɔlə saa n ndzuŋ ə saa, sey nə̀ saa loʼ ni doʼo bə soʼo ghə̂ a zow ghə tə̀ a loʼ wi.

¹¹Abə ghə fɔɔlənə saa, n nəŋə i tii zə, à n loʼ tə̀ ghə bàa saa, ləghə nə̀ saa i zow fɔɔbə zə. Ni tsuŋŋə kəŋə ndow, ghə̂ ghən ghə fɔɔlənə ghə n bə zoʼlə keeli kɔʼ nghee ghə khə ni muu tii nə ibuulə nsə ni muu muu zey i loʼnə tsətsəghə.

¹²Sey, ghaa khə ni ghəŋə tsu nə̀ kpii i ghaa zən i buu tsuu bənə nsə fuu i ghaa zən i buu khə̂mmə bənə, nə̀ zə i taw.

¹³Ghaa ghəŋə nə̀ jìi zey ghaa bweynə tii i loʼ tsətsəghə, sey nə̀, ghə̂ ghey ghə bəghənə n baa ghaa, nghee ghə buʼ loʼ kə nə̀ ghə ngɔdlɔ bweynu, ghə i way ni nii bwu, ghə i fədlə taw dzɔbə.

¹⁴Ndəmi n na wû zə nə̀ ghaa i muu nə ibuulə ghi ghə̂ ghə adzəm, ghaa i muu soʼo muu i zow zə, n təŋkey, wù way ni koʼ Mûkəbii abə tə muu way muu i zow zə.

¹⁵Dəmə tsu n na nə̀ kə wù ghaa u loʼ u nə doʼlə nə̀ Zə̀ kə ka dii wi n fə̀ŋ ə wi i dzuŋu zə. Kə wù ghaa u loʼ u nə doʼlə naŋ kə bəbə kə n fəŋŋə kə ghaa, kə loʼ ni ghəŋə nə̀ unaŋ udzəm u fway.

¹⁶Kə wù ghaa u loʼ u nə ghəŋŋə ghəə a laŋŋə ghə, kə wù ghaa u loʼ u doʼlə nə̀ tə khə way Zə̀ kə tə a loʼ Isaw wən tə â fìinə daʼa wey tə â shi bə n ghii wə tə̀ a loʼ waa u sə isə wə n nəŋə i zəə zə imɔʼ.

¹⁷Ghaa khənu nə̀ nghee tə â ləghə ni kəm ney buulə zey bày wi â ləghənə ni fuu tə̀ wi, bày wi n tuu ni fuu wi n buulə i tii zə n təŋkey, tə a kəm khə way jìi i loʼ zə ni kweyyə kɔʼ ghəə zey tə â ghəŋənə nghee tə â buʼu ləghə kə buulə i tii zə n sə̂ mə idey mə.

¹⁸Ghaa ka bə dzə nə ukaʼ nə̀ ghaa way ni mɔm, ghaa ka bə dzə n kaʼ wey vəllə u bəʼlənə fu, ghaa ka bə dzə n kaʼ wey ləm kə loʼnə fu, ghaa ka bə dzə n kaʼ wey tsəŋ i loʼnə fu, nkee n kaʼ wey faalə kə zəŋ kə tsəghənə fu tə̀ ghə̂ ghə Izree ghə â ndownə n kaʼ u Sinay.

¹⁹Ghaa ka bə dzə n kaʼ wey sɔŋ i fuŋunə fu, ghaa ka bə dzə n kaʼ wey dzə̀ ə wù n khəə shiə bənə ghəə fu tii soʼo n jìi zey ghə̂ ghey ghə â zownə dzə̀ ə tii, ghə n buʼ kəwɔɔ nə̀ ghə kəm ləghə way ni zow kpiʼi dzə̀ ə tii.

²⁰Nghee tə̀ dzə̀ ə tii â tsəʼlənə laŋ kə tə̀ ghə nə̀, “Abə nyam i loʼ i buʼ bə tsəghə mɔm daŋ tsənə kaʼ u tii, ghə khə ni təmmə wey nyam tə tii tə nə atay.” Laŋ kə tii kə n tsəghəshi ghə.

²¹Luʼu kə tii kə n ngii faalə n sə kə Mushi, tə n dza nə̀, “Wû u tsəŋŋə mə n wɔ tsəŋ zə.”

²²Luʼu key ghaa kee bənə tii nya loʼ n Kaʼ u Zayɔn, naʼ i Zə̀ kən kə loʼnə utaw n Yerosalem zey i loʼnə idəŋ. Ghaa n bə n luʼu key ndəmə kam tə tsətəndəghə tə Kəzə̀ tə muunə fu nə̀ wù way ni taŋ may.

²³Ghaa n bə n dzəŋi kə ghə̂ ghey ghə loʼ tə a loʼ waa a Kəzə̀ a sə isə ghən zəd a ghə a tɔ̀ɔ doʼonə idəŋ. Ghaa n bə n səə Zə̀ key kə saʼanə ghə̂ ghə adzəm. Ghaa n bə n luʼu key zay u ghə̂ a Kəzə̀ ghən muu i ghə zə â loʼnə tsətsəghə, Zə̀ kə n ghəŋə nə̀ ghə kpii tsu ghə̂ ghey tə ləghənə nə̀ ghə i loʼ ghii kə.

²⁴Ghaa n bə n səə Yeso wən tə bayyənə nkaa n fəghə mə nsə n səə kaŋ tə wi tən tə â fəələnə ni sow maʼa ibəb i dzɔb tsəghəshi kaŋ tə Ebel tey tə loʼnə ni dey təngəmə.

²⁵Sey, ghaa ney ighə̂mə nə̀ kə ghaa i tuu ni zəllə tə̀ Zə̀ kə nghee tə ghɔɔmə bənə tə̀ ghaa. Abə ghə̂ ghə Izree ghə â ka nɔb shi nghee ghə â tuu ni zow tə̀ Mushi wey tə â fuunə ghə n tsə̀ zə fa a ghəlitsə, i sey dii nə̀ zə i bəbə tsəghəshiənu n kow saa, abə saa tuunə ni zow tə̀ wù wey tə ghɔɔmə tsuu bənə tə̀ saa idəŋ.

²⁶N nəŋə zey Zə̀ kə â ghɔɔmə tsu bənə ghəə ghə n kaʼ u Sinay, dzə̀ ə wi n noʼlə tsu ghəlikətsə, tə u kee təb naŋa bənə nya nə̀, “Mə i noʼlə kpiʼi kə way ghəlikətsə kə, mə i noʼlə daŋŋə n bikighow kə a tii.”

²⁷Ghɔɔmə zən nə̀, “Kpiʼi.” Sey dii nə̀ ghə nə noʼlə maʼa kɔʼɔnu fə wey udzəm Zə̀ kə â bɔmnə fa a ghəlitsə, sey nə̀ u wey u loʼnə idəŋ nə̀ ghə way ni noʼlə i loʼ ni doʼo tən.

²⁸Sey, saa fuu kəzɔŋŋə tə̀ Zə̀ kə nghee saa təmə dzəŋi ndownə ghə̂ ghey ghə loʼnə n fɔɔ u Kəzə̀ wən ghə i way ni noʼlə. Saa fuu kəzɔŋŋə tə̀ Zə̀ kə, saa ngii ngɔɔmə soʼo wi n jìi zey zə i ghəŋŋə nə̀ tə duʼlə,

²⁹n təŋkey, Zə̀ kə saa kə loʼ tə̀ a loʼ vəllə wən u kpəʼlə maʼa bənə luʼu tə.