Read Weh Hibru 13 Bible Online

Hibru 13 - Weh bible

Hibru 13

¹Ghaa ndow kə na n sə kə ni ləghə wû i ghaa zə tə̀ a loʼ awaazə.

²I kə ghaa i neyzəə ni kpii ney ghə̂ ghən ghə bwey bəghənə n ndaw tə ghaa. Ghə̂ a loʼ a mâ ghəŋə sey, ghə n kpii ney kɔʼ tsətəndəghə tə Kəzə̀ nə̀ ghə khə way.

³Ghaa i moʼlə tsu ghə̂ ghən ghə fìi naŋanə ghə n ndaw tsaʼ tə̀ a i dza ghaa dzəŋi loʼ n ndaw tsaʼ a tii ghi ghə. I moʼlə tsuu n na ghə̂ ghən ghə chɔdlɔnə ghə tə̀ a i dza ghaa zow soʼo fɔɔbə zey ghə zownə n gow uwû.

⁴Tɔʼɔ kwu keeli n na ney zə iwû zə. Kə wù loʼ n ghə̂ ghey ghə ney dzənə wû zə nə shiə nyəŋinə ghi wù nuu a bii n təŋkey, Zə̀ kə i chɔdlɔnu ghə̂ ghey ghə shiə nyəŋinə ghi ghə̂ ghə a bii nsə ghə̂ ghey adzəm ghə ghəŋŋənə ghəə a laŋŋə ghə.

⁵Kə ghaa nə ləghənə ghəə ghə ukhəə ghə n muu i ghaa, ghaa i duʼlə n fə key ghaa khənə, n təŋkey Zə̀ kə dza nə̀, “Mə i bwuulə maʼa koʼ way ghaa, Mə i tûmmə naŋa koʼ soʼo way ghaa.”

⁶Sey, saa loʼ ni tsɔbə fə̀ŋ tə nə̀ saa tsəŋə way nə̀, “Mûkəbii loʼ wù wey tə gaamənə mə, Mə i tsəŋ way ghə i loʼ zə. Wù sɔŋtsuʼ loʼ ni ji ngee ghi mə ə?”

⁷Kə ghaa nə neyzəənə ghə̂ ghey ghə â diinə ghaa n jìi, tɔŋŋə ghə̂ ghən ghə a khəənə ghəə a Kəzə̀ ghə tə̀ ghaa. Moʼlə tsuu n na jìi zey ghə â muunə tii, ghaa dzûmə ndow ghow kə ibwey kə ghə n bəghəm i fə̀ŋ zey ghə â khənə n kow Zə̀ kə.

⁸Yeso Klisto loʼ wù wey tə loʼnə ighələ azɔy, na, nsə nə tənəŋə tədzəm.

⁹Kə ghaa i nyəŋ laʼ n bàa ndəmə tə aghəə tə loʼ tən ghə diinə nə̀ a way ghəə a Kəzə̀. I dzɔbə nə̀ fə̀ŋ tə saa tə i taw dzɔbə n ndzuŋ ə Kəzə̀, nə̀ a way dzə n ghəə a naŋŋə a laŋ u ghəə ghə ufəzəə. Laŋ u ghəə ghə ufəzəə ghən ka kam gaamə koʼ tsə ghə̂ ghey ghə naŋŋənə laŋ u tii wə n ghə i loʼ zə.

¹⁰Saa khə tsə zey ghə fəələnə maʼlə wə tii nə̀ ghə fɔɔngili ghən ghə fwaʼanə n fəə fey ghə̂ a Təjuu a ndow ngɔɔmənə Zə̀ kə tii, khə way daʼa kə ni zə̂ fə key ghə fəələ ndownə fu.

¹¹Fɔɔngili u nii nii u ghə̂ a Təjuu u bəghə tə n ney nyi ndow n kaŋ tə tənyam tey ghə̂ a bə fuunə tə̀ a loʼ umaʼlə ni sow maʼa ghəə a ghə a bəbə ghə n Luʼu kən kə Zow tsəghəshinə luʼu tə tədzəm. Ghə n kee kpəghə maʼa kɔʼ vən a tii ghə a bii.

¹²À loʼ soʼo sey Yeso â fəghənə a bii n fuʼu mbàa wə inaʼ ni sow maʼa tsu ghəə a ghə̂ a bəbə ghə n kaŋ tə wi.

¹³Sey, saa ndow n səə wi a bii n mbàa inaʼ, saa ndow boʼo soʼo tow kə dədlə kə tə̀ tə â boʼonə.

¹⁴Saa khə dzə way naʼ zən i doʼo tən nə tə̀ saa fa n ghəlikətsə, saa fədlə ləmmə ndow naʼ zey i nam khə ni bə.

¹⁵Sey, saa tsəghə ndow sə kə ni fuu nkɔʼlə tə̀ Zə̀ kə tə̀ a loʼ maʼlə u saa n bam i Yeso. Abə saa dza shi bənə n dzuu i saa nə̀ tə loʼ Mûkəbii, saa sey fəələ umaʼlə.

¹⁶Kə ghaa i neyzəə ni ghəŋŋə ndzuŋ nsə ni dzawwə fuu ndow ghə̂ ghey ghə khə way boʼnə Zə̀ kə duʼlənu n ndzoʼo maʼlə wən.

¹⁷Ghaa i zow tə̀ ghə̂ ghey ghə diinə ghaa n jìi, ghəŋŋə ndow ghəə ghey ghə dzanə. À loʼ ghə, ghə laalənə tow u ghaa wə, à i tiilə dza soʼo ghə tə̀ Zə̀ kə ghəə ghey adzəm ghə â fwaʼnə tə̀ ghaa. Abə ghaa zownə tə̀ ghə, ghə i fwaʼa fwaʼ kə ghə kə tə̀ ghaa nə iduʼlə. Abə ghaa zow way tə̀ ghə, ghə i fwaʼa fwaʼ kə ghə kə nə imow. Abə ghə fwaʼanə nə imow, zə i gaamə way ghaa n ghə i loʼ zə.

¹⁸Ghaa ndow kə n sə kə ni gɔŋŋə tə̀ ghey. Ghey khənu nə̀ fə̀ŋ tə ghey tə zownu, n təŋkey ghey ləghə ni ghəŋŋə ghəə zey i kpiinə nə tənəŋə tədzəm.

¹⁹Sey, n buʼu kəwɔɔ n fə̀ŋ zuŋ idzəm nə̀ ghaa gɔŋŋə nə̀ Zə̀ kə kuʼlə tûm dzəŋŋə bə mə n səə ghaa.

²⁰N gɔŋŋə nə̀ Zə̀ kən kə fuunə buulə zə, tə wən tə â zhəm dzəŋŋə bənə Mûkəbii saa Yeso nə ivə, wù baʼa u tənjì u səŋi wə, tə wən tə â ney kɔʼnə kaŋ tə wi tə, zə̂ kɔʼ kaa mən n nə may koʼ way,

²¹fuu ghaa n fə u dzuŋu wə udzəm tə̀ ghaa i bwey ndow n jìi zey tə ləghənə. Tə ghəŋə nə̀ saa i fwaʼa fwa key tə ləghənə n bam i Yeso Klisto, tə wən a fuunə wi n kɔʼlə mə nə tənəŋə tədzəm. Zə i loʼ sey.

²²Waazə ghuŋ ghə, n buʼu bə kəwɔɔ tə̀ ghaa nə̀ ghaa kow tsu fə̀ŋ ni zəllə tûm zən n tɔ̀ɔ bənə ni kuu bə fə̀ŋ tə ghaa. A wey loʼ ghə i tii zə n tɔ̀ɔ bənə sə fə aghəə fən tə̀ ghaa.

²³N ləghə nə̀ ghaa keeli tsu nə̀ waazə ə saa Timoti n shi n ndaw tsaʼ, abə i loʼ nə̀ tə kuʼlə bənu, mə i dzəŋi bə ghi wi ni bə koʼ ghaa.

²⁴Ghaa tɔŋɔ zow ghə̂ ghey ghə diinə jìi tə̀ ghaa nsə ghə̂ a Kəzə̀ ghə adzəm. Waazə a saa ghən n naʼ i Itali tûm bə itɔŋɔ zow tə̀ ghaa.

²⁵N gɔŋŋə nə̀ Zə̀ kə dii ghaa adzəm n fə̀ŋ ə wi i dzuŋu zə.