Read Weh Hibru 2 Bible Online

Hibru 2 - Weh bible

Hibru 2

¹À wey loʼ ghə i tii zə saa khə ni tɔʼ ney ighə̂mə n ghəə ghən saa zownə. Sey nə̀, kə ghə i loʼ i nə sìi dzəŋŋənə saa.

²N dza sey n təŋkey, tûm Kəzə̀ zən tsətəndəghə tə Kəzə̀ tə a fuunə tə̀ ghə bày bày a saa ghə, loʼ isəŋə. Ghə̂ ghən adzəm ghə dzûmə way tûm tii nkee ghə naŋŋə way laŋ kə tii kə, ghə mâ keeli ngoʼ zən zə a kpiinə tə̀ ghə.

³Saa i nɔbə shiə ngee abə saa tsayyənə bəghəshi i nii zən ə? A loʼ Mûkəbii n wû u wi wə tə a naʼa bənə bəghəshi zən isə. Ghə̂ ghən ghə a zownə, ghə dii bə tə̀ saa nə̀ à loʼ isəŋə.

⁴Zə̀ kə â dii ndəmə tətsəə nsə faalə mə ni dii bə nə̀ ghəə ghey ghə â dzanə loʼ isəŋə. Sey, Zay kə Zow kə n fuu soʼo aghə̂ n naamə kə nghee tə̀ Zə̀ kə ləghənə.

⁵Zə̀ kə â ka fuu dzə daʼa kə tə tsətəndəghə tə Kəzə̀ tə nə̀ ghə i saʼa mbi zən i bəghənə, tɔŋŋə mbi zən a khəənə ghəə ghə tii nya.

⁶I loʼ n dəŋə kə loʼ kə n màʼlə K-a-zə̀ nə̀, “Wù sɔŋtsuʼ loʼ ndee tə̀ Zə̀ kə ni ney nə̀ tə loʼ kəfə ə, Nkee wù sɔŋtsuʼ loʼ ndee Zə̀ kə loʼ ni khə nəŋə i wi zə?

⁷Wə â bɔm wù nə̀ tsətəndəghə tə Kəzə̀ tə nyaŋ təd tsəghə kɔʼ wi n kəmə fə inəŋə, Wə n fuu tsu wù n daʼa wə nsə kɔʼlə mə.

⁸Wə n naŋa bə ufə udzəm n tənə wi.” Nghee wə â naŋa bənə fə wə udzəm n tənə wi, i dii tsuu nə̀ wə â ka naŋa shi kɔʼ dzə fə kə loʼ kə nə̀ a laalə way wi, à loʼ kə nə̀ nya, a kam koʼo ndow dzə way fə wə udzəm n tənə wi.

⁹Saa kee koʼo ndownu Yeso wey Zə̀ kə â ghəŋə tsu nə̀ tsətəndəghə tə Kəzə̀ tə nyaʼi tsəghəshi tsu wi n kəmə fə inəŋə. Nya, Zə̀ kə n tsuʼ naŋa kɔʼ wi nə̀ tə i khə kɔʼlə mə nsə ngɔɔmə zə nghee tə â fəghənə, bə kpu soʼo n tow u saa. À loʼ bòʼ fə̀ŋ i dzuŋu zən Zə̀ kə khənə n kow saa tə â ghəŋənə nə̀ Yeso bə kpu n tow wə aghə̂ adzəm.

¹⁰Ufə udzəm, à bɔm Kəzə̀, à loʼ soʼo wi tə ghəŋŋənə nə̀ fə u tii wə i loʼ n jìi zey u loʼnə tii. Zə̀ kə â ghəŋə nə̀ Yeso fəghə sey nə̀ tə i ndzəm loʼ wù sə isə wey tə kpiinə ni ghəŋə nə̀ ndəmə aghə̂ a keeli kɔʼlə n wi. À wən loʼ ghəə zey i ghəŋənə nə̀ Yeso i ndzəm loʼ wù wey tə kpiinə ni bəghəshi aghə̂.

¹¹Yeso ghi ghə̂ ghey tə â sow maʼa tsunə bəb i ghə zə, dzəŋi khə bày umɔʼ. À wey loʼ ghə i tii zə Yeso dədlə way n tow kə ni tɔŋɔ ghə nə̀ a loʼ waazə a wi.

¹²I loʼ sey n təŋkey, tə â dza tə̀ Zə̀ kə nə̀, “Mə i dza ndow fə key wə loʼ ghii kə tə̀ waazə ghuŋ ghə. Mə i kali wɔ n luʼu tey ghə zuŋŋə doʼonə tii ni fuu wɔ n kɔʼlə mə.”

¹³Tə a dza soʼo nə̀, “Mə i gaʼa fə̀ŋ zuŋ n kow Kəzə̀.” Tə a kəm dza kpiʼi tsu nə̀, “Mə wənə ghi waa ghən Zə̀ kə fuunə tə̀ mə.”

¹⁴Nghee waa a Kəzə̀ a loʼnə ghə̂ ghə, ghə khə gow uwû, khə soʼo təkaŋ. À wey loʼ ghə i tii zə Yeso n wû u wi wə â doʼo bə soʼonə wù sɔŋtsuʼ sey nə̀, abə tə i bə kpu tsunə, tə i wey maʼa daʼa key kə ghəŋŋənə nə̀ ghə̂ ghə i kpuulə tɔŋŋə daʼa kə avəətsəə.

¹⁵Â loʼ kə n jìi zən Yeso â loʼnə ni ghəŋə nə̀ ghə̂ ghən ghə â muunə muu i ghə zə tə a loʼ ukɔd ghə tsəŋənə və zə n sə K-a-zə̀, kə ghə nə kəm doʼlənə kɔd wə.

¹⁶À loʼnu isəŋə nə̀ Yeso â ka bə dzə ni bə gaamə tsətəndəghə tə Kəzə̀, tə â bə ni bə gaamə waa a waa ghə Abraham.

¹⁷À wən loʼ ghə i tii zə Zə̀ kə a khə ni ghəŋə tsu nə̀ tə doʼo bə tə̀ a loʼ saa waazə a wi nə təjìi tədzəm sey nə̀, tə loʼ ni doʼo bə fɔɔngili u nii nii wə. Tə wən ghə loʼ ni gaʼ fə̀ŋ n kow wi, tə khə soʼonə sî i kwɔɔlə zə. Sey nə̀ tə loʼ ni ney fuu ndow wû u wi tə̀ a loʼ umaʼlə ni sow maʼa ghəə a bəbə ghən ghə̂ a ghəŋŋənə.

¹⁸Nghee i loʼ nə̀ wû u wi, tə mâ fəghə, ghə n mɔm koʼ soʼo wi nə̀ tə bwù n ghəə a bəbə ghə, à wey loʼ ghə i tii zə tə loʼnə ni gaamə ghə̂ ghey ghə mɔm koʼo soʼonə ghə nə̀ ghə bwu n ghəə a bəbə ghə.