Read Weh Hibru 5 Bible Online

Hibru 5 - Weh bible

Hibru 5

¹Zə̀ kə sày shiə bə tsə kə fɔɔngili u nii nii wə n fəŋŋə kə waazə a wi. Ghə n tsuʼ naŋa kɔʼ nə̀ tə i ghɔɔmə tə Zə̀ kə n tow u ghə, fuu kənaamə tə̀ Zə̀ kə n tow u ghə, fəələ soʼo umaʼlə tə̀ Zə̀ kə nə̀ tə neyzəə ghəə a ghə a bəbə ghə.

²Nghee fɔɔngili u nii nii wən loʼ nə̀ à loʼ wù sɔŋtsuʼ, tə loʼnu ni bwu khə̂mə, à kee loʼ nə̀ tə loʼnu ni maʼa uwû ghi ghə̂ ghey ghə ghəŋŋənə bəb zə nə̀ ghə khə way nsə ghə̂ ghey ghə nyəŋə laʼa ndownə.

³À wən loʼ ghə i tii zə tə khənə ni fəələ maʼlə wə tə̀ Zə̀ kə n ghəə a wi a bəbə ghə nsə n ghəə a ghə a bəbə ghə.

⁴Wù loʼ way dzə tə sàynə wû u wi wə ni doʼo fɔɔngili u nii nii wə sey nə̀ ghə fuu bə wi n kɔʼlə mə, à wi teeli sày kə Kəzə̀ nghee tə̀ tə â sàynə Erɔn.

⁵N jìi i mɔʼɔ zə, à way dzə Klisto tə â sàynə wû u wi wə ni doʼo fɔɔngili u nii nii wə nə̀ ghə̂ ghə i fuu bə wi n kɔʼlə mə. Â fəd loʼ Kəzə̀ kə â dza ndownə tə̀ wi nə̀, “Wə loʼ waa wuŋ, Ni ney nuu tsu na, n loʼ bày wə.”

⁶Zə̀ kə n dza soʼo n dəŋə kə loʼ kə n màʼlə K-a-zə̀ nə̀, “Wə i doʼlə fɔɔngili nə tənəŋə tədzəm, N jìi zey Mekisedek â loʼnə tii.”

⁷Nghee Yeso â muunə fa n mbi, tə n gɔŋŋə, buʼ soʼo kəwɔɔ nə idey nsə sə̂ mə tə̀ Zə̀ kə, tə loʼnə ni bəghəshi vən fə uwû fə wi n wɔɔ kə ivə. Sey, Zə̀ kə n zow gɔŋŋə i wi n təŋkey, tə â zow tə̀ Zə̀ kə ngɔɔmə soʼo wi.

⁸Nghee tə̀ Yeso a loʼ kənə waa Kəzə̀, tə â zoʼlə ni zow tə̀ Zə̀ kə n bam i chɔd mən tə â keelinə.

⁹Ambə Zə̀ kə ghəŋə tsunə nə̀ tə kɔʼ kpii, tə n ghəŋə soʼo wi nə̀ tə doʼo wù wey tə fuunə bəghəshi zən i may way tə̀ ghə̂ ghən ghə zownə tə̀ wi.

¹⁰Zə̀ kə mâ wi tsuʼ naŋa nə̀ tə doʼo fɔɔngili u nii nii wə tə̀ a loʼ Mekisedek.

¹¹Ghey khənu ndəmə aghəə ni dza bòʼ ghəə zən, à kee loʼ nə̀ i tawnu ni tiilə dza bə tə̀ ghaa n təŋkey, ghaa way ni mbad zow tɔb ighəə.

¹²Ghaa mə khə ni loʼ ghə̂ a dii ghə nya. À fa kee loʼ nə̀ wù loʼ khə ni bə faalə dii kpiʼi bə ghaa n ghəə a sə isə ghə n ghɔɔmə i Kəzə̀. Ghaa fa nam loʼ kə tə̀ a loʼ waa a buu ghə, ghə nam nyɔŋɔnə ghii zə, loʼ sey nə̀ ghaa mə khə ni zə̂ə fəzəə u taw wə.

¹³Wù wən tə nam nyɔŋɔnə ghii zə, tə sey nam loʼ tə̀ a loʼ waa, tə ka kam tɔʼ keeli dzə ghəə zey i ghəŋŋənə nə̀ tə doʼo tsətsəghə n sə̂ K-a-zə̀.

¹⁴Fəzəə u taw u loʼ tə̀ gheynyim ghən ghə beyyə dzənə, zoʼlə keeli kɔʼ aghəə n jìi zey ghə loʼ ni keeli ghəə zey i dzɔbənə zə nsə ghəə zey i bəbənə.