Read Weh Hibru 7 Bible Online

Hibru 7 - Weh bible

Hibru 7

¹Mekisedek â loʼ kədə̀ŋ n naʼ i Salem, tə n loʼ soʼo fɔɔngili tə Zə̀ kən kə tsəghəshinə fə wə udzəm. Nghee Abraham dzəŋŋə bənə nə̀ tə n təm zə̂ də̀ŋ wə ukaykə n tsam, Mekisedek n kpiilə bə ghi wi n jìi, buulə tsu wi.

²Abraham n dzawwə tsu fə wən tə a təm zə kɔʼ n tsam nə tə badla ighəm tə loʼnə ighələ. Tə n ney fu ndow wi n bad kə kəmɔʼ. Zəd i Mekisedek n ghɔɔmə i Təjuu zə â dii nə̀ a loʼ, “Də̀ŋ kə tsətsəghə kə.” Ghə â tɔŋŋə soʼo wi nə̀ a loʼ, “Də̀ŋ kə Salem.” I dii tsu nə̀, “Də̀ŋ kən kə ney bənə buulə zə.”

³Luʼu kə loʼ kə way dzə ghə tɔ̀ɔ naŋanə wù wey tə̀ loʼnə bày Mekisedek, này wi nkee sali ndaw zey tə â shinə tii. Wù loʼ way dzə tə khənə tsuʼ fey ghə â jinə wi tii nkee tsuʼ fey tə â kpunə tii. Tə bɔɔmə fiilə kə waa Kəzə̀, loʼ soʼo fɔɔngili nə tənəŋə tədzəm.

⁴Ghaa n koʼ ndzoʼo wù səŋi wey Mekisedek â loʼnə ghii wə ə? Bày bày saa Abraham n ney idzaw imɔʼ nə tədzawwə ighəm tə loʼnə ighələ n fə wən tə â təm zə̂ kɔʼnə n tsam, fuu ndow tə̀ wi.

⁵Â loʼ kəlaŋ nə̀ waa a waa a Levi ghən ghə loʼnə ghə fɔɔngili, khə ni ney kɔʼɔ dzaw zə imɔʼ nə tədzawwə ighəm tə loʼnə ighələ n fə wən ghə keeli kɔʼnə wɔ ghə̂ ghə Izree ghə, nə̀ ghə mgbaŋ loʼ soʼo waa a waa ghə Abraham.

⁶Mekisedek â way dzə waa waa Levi, tə n kee nam ney idzaw imɔʼ nə tədzawwə ighəm tə loʼnə ighələ n wɔ Abraham, buulə tsu Abraham wən Zə̀ kə â fuunə wi n təb kə.

⁷Wù loʼ way dzə tə məghənə nə̀ wù wey tə fuunə buulə zə, tsəghəshinu wù wey tə neynə buulə i tii zə.

⁸Ghə fɔɔngili ghey ghə â neynə dzaw zə imɔʼ nə tədzawwə ighəm tə loʼnə ighələ, â kpuunu. I loʼ n màʼlə K-a-zə̀ nə̀, Mekisedek wən tə â ney soʼonə dzaw zə imɔʼ nə tədzawwə ighəm tə loʼnə ighələ, â loʼ wù nə̀ tə kpuu way.

⁹Wù loʼ ni dza nə̀ nghee Abraham â fuunə dzaw zə imɔʼ nə tədzawwə ighəm, Levi wən waa a waa a wi ghə â neynə dzawwə tə tii tə, mâ fuu soʼo.

¹⁰Wù loʼ ni dza sey n təŋkey, ghə â ka kam jii dzə Levi n nəŋə zey Mekisedek â kpiilə ghi bày bày Levi tɔŋŋə Abraham.

¹¹Fɔɔngili tən tə â shinə n sali i kəbii i Levi, â loʼ ni luulə laŋ kən Zə̀ kə â fuunə tə̀ ghə̂ ghə Izree ghə. Abə fɔɔngili tən â fwaʼanə n jìi zey Zə̀ kə ləghənə, Zə̀ kə mə way dzə ni kəm ghəŋə nə̀ ndzoʼo fɔɔngili u nuu u bə tə̀ a loʼ Mekisedek. Mekisedek â way dzə fɔɔngili tə shinə n sali i kəbii i Erɔn.

¹²I loʼ sey n təŋkey, abə ghə kweyyə kɔʼnə sali i kəbii zey fɔɔngili tə shiənə tii, ghə khə ni teeli kweyyə soʼo kəlaŋ.

¹³Sey, fɔɔngili wən saa ghɔɔmənə fa bòʼ wi kee shi n naʼ i nuu zə. Wù loʼ ka kam fwaʼ koʼ tsə tə̀ a loʼ fɔɔngili nə̀ tə shi dzəŋinə nə inaʼ ghi wi.

¹⁴I loʼ sey n təŋkey, saa tɔʼ khənu nə̀ Mûkəbii saa â shi n naʼ i Juda. À wən loʼ inaʼ nə̀ Mushi â ka dza koʼ tsə nə̀ fɔɔngili u loʼ u shi fu tii.

¹⁵Saa loʼ ni tɔʼ zowkeeli nya nə̀ fɔɔngili u nuu wə n bə shi nə̀ tə lo soʼo tə̀ a loʼ Mekisedek.

¹⁶Wù tii â ka doʼo dzə fɔɔngili tə̀ laŋ u wù sɔŋtsuʼ u diinə, tə â kee doʼo bə fɔɔngili nə̀ à ghəŋə Kəzə̀ n bam i daʼa kən kə loʼnə nə imuu nə̀ kə may way.

¹⁷I loʼ sey n təŋkey i loʼ n màʼlə K-a-zə̀ nə̀, “Wə i doʼlə fɔɔngili nə tənəŋə tədzəm, Tə̀ a loʼ Mekisedek.”

¹⁸Zə̀ kə â baʼ naŋa kɔʼ laŋ kə wey kə n təŋkey, kə â khə way daʼa kə, khə soʼo way fwaʼ kə loʼ kə.

¹⁹Tə â ghəŋə sey n təŋkey, laŋ kə â way ni ghəŋə ghə i loʼ zə i khə way chɔd wə. Abə nya ghə n dii saa n jii i dzuŋu zey saa khə ni ləmmə, nə̀ saa loʼ ni tsəghə tii ni ndow n səə Kəzə̀.

²⁰I loʼ soʼo nə̀, nghee Zə̀ kə â naŋanə Klisto tə̀ a loʼ fɔɔngili, tə n kaa tsu soʼo. Zə̀ kə â ka kee zə̂ dzə kaa mə nghee tə â buʼu naŋŋə tsənə fɔɔngili tə loʼ tey.

²¹Yeso â kee doʼo fɔɔngili nə̀ Zə̀ kə zə̂ kɔʼ nkaa. Zə̀ kə n təb naŋa tsu tə̀ wi nə̀, “Mə Mûkəbii n kaa, Mə i kweyyə soʼo way nə̀, ‘Wə i doʼlə fɔɔngili nə tənəŋə tədzəm.’”

²²N kaa mən nya, Yeso n bə ghəŋə nə̀ saa i khə tən nə̀ kaa mən à zə̂nə saa ghi Zə̀ kə nya, tsəghəshinu n wey mey.

²³Kweyyə kə loʼ kə nam loʼnu n fɔɔngili tə wey tey nsə fɔɔngili u fəghə wən. I loʼ nə̀, ghə fɔɔngili a wey ghey â loʼ n ndəm n təŋkey, və zə â ney nuulə zeeli ghə, ghə n kəm way ni ndow n sə kə ni fwaʼ tə̀ Zə̀ kə.

²⁴Yeso kee kpuu koʼo tsə way, wù loʼ way soʼo tə loʼ ni ney fwaʼ kə wi tə̀ a loʼ fɔɔngili.

²⁵À wey loʼ ghə i tii zə tə loʼ ni bəghəshiə ghə̂ ghey ghə bəghənə n səə Zə̀ kə nəŋə tədzəm nə̀ ghə tsəghə n baa wi n təŋkey, muu i wi i loʼ tən tsə kə ni buʼu wɔɔ kə tə̀ Zə̀ kə n tow u ghə.

²⁶Yeso sey loʼ fɔɔngili u nii nii wən tə kɔʼ kpiinə ni laalə ghəə a saa ghə. Tə u zow, khə way bwu zə nkee bəb i loʼ zə n kow wi. Zə̀ kə a ney nuu shi kɔʼ wi n fəŋŋə kə ghə̂ a bəbə ghə, kɔʼlə naŋa kɔʼ wi idəŋ.

²⁷Tə way dzə tə a loʼ ghə fɔɔngili a nii nii a loʼ ghey ni fəələ maʼlə wə tsuʼu ndzəm bòʼ ghəə a wi bəbə ghə isə nsə bòʼ bəb i ghə̂ a loʼ ghə. Tə mâ fəələ tən maʼlə wə nghee tə â fuunə wû u wi wə bòʼ bəb zə aghə̂.

²⁸Laŋ kə Mushi kə â say kɔʼɔ ghə fɔɔngili a nii nii ghə n fəŋŋə kə aghə̂, nə̀ aghə̂ adzəm loʼ ni ghəŋə bəəbə. À kee loʼ nə̀ kaa mən mə â bənə n bàa kəlaŋ â tsuʼ naŋa kɔʼ waa Kəzə̀ wən tə ghəŋŋə bəəbə koʼo tsə way.