Read Weh Hibru 8 Bible Online

Hibru 8 - Weh bible

Hibru 8

¹Sey, ghəə zey i baa loʼnə n ghəə ghən a dzanə i loʼ nə̀, saa khə ndzoʼo fɔɔngili u nii nii wən tə loʼnə n kpi u Kəzə̀ u təmə wə idəŋ nə̀ udaʼa udzəm u loʼ n wɔɔ kə wi.

²Tə fwaʼa tə a loʼ fɔɔngili u nii nii wə n luʼu kən kə zow tsəghəshinə luʼu tə tədzəm. Luʼu kə tii kə, à ndzəm loʼ fəfəə à bəghənə Mûkəbii, à way dzə wù sɔŋtsuʼ tə bəghənə.

³Nghee ghə â bəghə ghə n sày kɔʼ fɔɔngili u nii nii wə nə tə i fuu naamə kə, fəələ soʼo umaʼlə tə̀ Zə̀ kə n tow u ghə̂ adzəm, fɔɔngili saa u nii nii wən teeli khə ni khə soʼo fə kə ni fuu tə̀ Zə̀ kə.

⁴Abə tə mə loʼ fa n mbi, tə mə way ni doʼo koʼ fɔɔngili nghee i loʼ nə̀ laŋ kən ghə̂ a Təjuu a dzûmənə, khənu fɔɔngili tey tə ney fuunə naamə wey ghə̂ a bə fuunə tə̀ Zə̀ kə.

⁵Fwaʼ key ghə fwaʼanə tə̀ a loʼ ghə fɔɔngili maŋa fiilə ghəə ghey a loʼnə idəŋ, a baa way dzə ghəə ghey a loʼ idəŋ. À wey loʼ ghə i tii zə nghee Mushi a dza i khəm kɔʼ fəə fə tii fə, Zə̀ kə n dza tə̀ wi nə̀, “Tɔʼɔ laalə nyi tsu ni koʼ nə̀ ufə udzəm u bɔɔmə loʼ tə̀ a loʼ u wey wə â koʼnə nə ukaʼ.”

⁶A kee bə nya, Zə̀ kə n fuu Yeso n fwaʼ kə fɔɔngili kən kə tsəghəshinə kə fɔɔngili tə wey tey, ighələ tə̀ kaa mey Klisto â bayyənə tə̀ Zə̀ kə ghi ghə̂ a wi ghə, dzɔb tsəghəshinə n sə isə mey n təŋkey, Zə̀ kə â dza n təb kə fəghə kən nə̀, ghə̂ ghə i keeli fə u dzuŋu wə a tii tsəghəshi u wey ghə â keelinə n laŋ kə Mushi.

⁷I loʼ sey n təŋkey, abə ghə i bəbə i loʼ i mə way n kaa n sə̂ isə mən, zuŋ kə mə way ni kəm zə̂ n loʼ mə.

⁸Zə̀ kə â kee koʼ tsu nə̀ ghə̂ a wi ghən ghəŋŋə bəəbənu, tə n dza tsu nə̀, “Mə Mûkəbii, n dza nə̀ Nəŋə i bəghənu, mə i zə̂ kɔʼ kaa n fəghə mə ghi ghə̂ ghə Izree ghə nsə ghə̂ a Juda ghə.

⁹Kaa n tii mə i way dzə tə̀ a loʼ n mey mə â zə̂nə ghi ghə bày bày a ghə ghə N tsuʼu mey mə â taali nuu shi bənə ghə n naʼ zə Ijip. Ghə̂ ghən â kəm bwey way n kaa mey mə â zə̂ naŋanə ghi ghə, À wey loʼ ghə i tii zə mə â kəm khə way nəŋə i ghə zə.

¹⁰Sey, Mə Mûkəbii, n dza nə̀, à wey loʼ kaa n fəghə mən mə i zə̂ənə ghi ghə̂ ghə Izree ghə N tsuʼu mən n bəghənə. Mə i kuu naŋa ndow laŋ wuŋ n tow u ghə N tɔ̀ɔ naŋa ndow soʼo n fə̀ŋ tə ghə. Mə i doʼlə Zə̀ kə ghə, Ghə i doʼo soʼo ghə̂ ghuŋ.

¹¹Wù ghə umɔʼ i way ni kəm dii aghəə tə̀ waazə a ghə ghə Nkee ni dza tə̀ waazə a ghə ghə nə̀, ‘Wə khə ni keeli Mûkəbii,’ N təŋkey aghə̂ adzəm i keelinu ndzoʼo wù wey n loʼnə, Ni zey nuu tsu n nyaŋi mə aghə̂ ndow kuum ndow n ghə̂ a səŋi ghə.

¹²Mə i neyzəə ghəə a ghə a bəbə ghən ghə ghəŋŋənə, Mə i kəm moʼlə koʼ soʼo way ghəə ghey ghə â buʼu ghəŋŋə tsənə nə̀ a kpiilə way.”

¹³Ambə Zə̀ kə dza tsu nə̀, “Kaa mən loʼ kaa n fəghə mə.” Tə â sey ghəŋə nə̀ kaa n sə isə mey doʼo tsu n wey mə. Abə fə kə doʼo dzə kə wey kə, kə n lə̀ghə̀, bəghə soʼo n ghəə a may ghə.