Read Weh Jems 1 Bible Online

Jems 1 - Weh bible

Jems 1

¹A màʼlə kən tɔ̀ɔ bə mə Jems. N loʼ wù kəfwaʼ tə Zə̀ kə, loʼ soʼo wù kəfwaʼ tə Mûkəbii Yeso Klisto. N tɔ̀ɔ bə tə̀ ghə̂ a Təjuu ghən ghə saali doʼo kaabənə n badla tə mbi tədzəm. N tɔŋɔ zow bə ghaa.

²Waazə ghə, ghaa khə ni duʼlə nəŋə tədzəm abə ghaa buʼu keeli kənə lii tə nchɔd tə,

³n təŋkey chɔd mən mɔm koʼo bəghəm i fə̀ŋ i ghaa sey nə̀, ghaa loʼ ni təmi taw n bəghəm i fə̀ŋ zey ghaa khənə.

⁴Təmi taw tsu kə n na nə aghəə adzəm sey nə̀ ghaa loʼ ni tɔʼ beyyə n bəghəm i fə̀ŋ i ghaa, laʼa soʼ way fə kə loʼ kə n bəghəm i fə̀ŋ i ghaa.

⁵Abə wù ghaa u loʼ u khə way tɔb wə n ghəə zey Zə̀ kə ləghənə nə̀ tə ghəŋə, tə khə ni nɔɔ ndow tə Zə̀ kə, tə i fuu wi n fə key tə bəbənə, n təŋkey, Zə̀ kə buu n wɔɔ kə, tə fuu tə̀ ghə̂ ghə adzəm nə̀ tə kpaa way wù.

⁶À kee loʼ nə̀ abə wə dza i nɔɔ kəfə tə̀ Zə̀ kə, wə khə ni teeli khə bəghəm i fə̀ŋ zə, səmə way n ghə i loʼ zə n təŋkey, wù wey tə səmənə, loʼ tə a loʼ kətuŋutuŋu n nali Kədzuu, zəŋ maŋa tənnə kaabə tsənə.

⁷Kə ndzoʼo wù tii nə moʼlənə nə̀ Mûkəbii i fuunu wi n fə kə loʼ kə,

⁸n təŋkey, fə̀ŋ ə wi dzawwə doʼonu, way tsətsəghə n ghəə a wi a ghəŋŋə ghə.

⁹Dzûmə tə Klisto tən tə tsəm loʼ kə nə̀ tə laanu, khə ni duʼlə n təŋkey Zə̀ kə n ghə kɔʼlə naŋa.

¹⁰À kee bə tə tey tə kuum nə̀, khə ni duʼlə nə̀ Zə̀ kə n ghə tsuulə naŋa. I loʼ sey n təŋkey, ghə̂ a kûm a duʼlə tsuŋŋə way, ighələ tə bəllə wə ughìi u doʼlə tsuŋŋə way.

¹¹I loʼ nə̀, abə tsə shi kɔʼ bənə, zuʼ kə tsə kə tii kə ngii taw tsunə, kə n zuʼ maʼa kɔʼ ughìi. Bəllə wə ughìi u tii wə n gɔy zum nuu kɔʼ, wə n kəmə nyiəllə soʼo way. A loʼ soʼo ighələ ghi ghə̂ ghey ghə kuum nə̀, və i ney nuulə ghə nə̀ ghə zow kaabə kə ghəə ghə ukhəə a ghə.

¹²Zə̀ kə i buulə wù wey tə təmi tawnə n bəghəm i fə̀ŋ i wi n nəŋə zey vəətsəə a mɔm koʼonə wi, n təŋkey, abə tə təm zə kɔʼnə, Zə̀ kə i fuu wi n muu zə itsali zən tə â təb naŋanə. À loʼ naamə kən Zə̀ kə təb naŋanə tə ghə̂ ghey ghə ləghənə wi.

¹³Abə wù keelinə mɔm koʼ zə, kə tə nə dzanə nə̀, “À loʼ Kəzə̀ kə mɔm koʼonə mə.” N təŋkey ghə i bəbə i loʼ i way dzə ni mɔm koʼ Kəzə̀, Zə̀ kə mɔm koʼo soʼo way wù nə̀ tə ghəŋə ghə i bəbə zə.

¹⁴Wù fədlə keeli kəmɔm koʼ abə moʼlə tə bəbə tən tə loʼnə n fə̀ŋ ə wi nəəbənə wi nə̀ tə ghəŋə ghə i bəbə zə.

¹⁵Ambə moʼlə tə bəbə tən nyi bəghə taw tsunə n fə̀ŋ zə, wə n zey ndow ni ghəŋə ghəə a bəbə ghə. Ambə wə ghəŋə tsəghə tsunə ghəə a bəbə ghə, və zə n bə ney nuu kɔʼ wɔ.

¹⁶Waazə ghuŋ a dzuŋu ghə, kə wù loʼ nə nəbənə ghaa.

¹⁷Keeli tsu na nə a loʼ Zə̀ kə idəŋ kə, kə fuunə ghəə a dzuŋu ghə nsə fə u dzuŋu wən a keelinə fa n mbi udzəm. À loʼ wi tə khənə daa wən u loʼ idəŋ udzəm. Tə kweyyə koʼo tsə way n doʼo i wi tə a loʼ daa u wi wən u kweyyənə n jìi zey u baŋanə tii.

¹⁸Â tsəm kɔʼ Kəzə̀ nə saa doʼo bə waa a wi n bam i ghɔɔmə i wi zən i loʼnə isəŋə, sey nə̀, saa loʼ ni doʼo ghə̂ ghey ghə tsəghəshinə fə wən tə bɔmnə fa n mbi udzəm.

¹⁹Waazə ghuŋ a dzuŋu ghə, n ləghə nə̀ ghaa keeli tsu nə̀ ghaa adzəm ghaa khə ni maʼa tsu iwû ni tɔʼɔ zəllə ghəə ghə. Kə ghaa nə tsɔɔ beelinə ghəə ghə, kə ghaa nə mbadla fəələ soʼonə n nəghə wə.

²⁰I loʼ sey n təŋkey, nəghə u fəələ u ghəŋŋənu, wù n way ni ghəŋə ghəə ghey a loʼnə tsətsəghə sə K-a-zə̀.

²¹Sey, ghaa khə ni maʼa mwam u dzəə wə nsə ghəə a bəbə ghən a loʼnə n fəŋŋə kə ghaa. Ghaa bɔɔmə ney naŋa ghɔɔmə i Kəzə̀ zey tə kuu naŋanə n fə̀ŋ tə ghaa, a loʼ i ghii zə i bəghəshiənə ghaa.

²²Kə ghaa nə maŋa zəllə kənə ghɔɔmə i Kəzə̀ zə, ghaa khə ni ghəŋŋə ndow ghəə zey i dzanə. Nə à way sey, ghaa sey maŋa nəbə wû i ghaa.

²³Wù wey tə maŋa zəllənə ghɔɔmə i Kəzə̀ nə̀ tə ghəŋŋə ndow way ghəə zey tə zownə, tə loʼ tə a loʼ wù tə nyaŋŋənə tûm usə u wi wə nə kəlungali ni koʼ nghee tə loʼnə tii.

²⁴Ambə tə fwɔ̀t may tsunə tûm usə̂ u wi wə, tə̀ tə nuulə ndownə, tə n daŋŋə neyzəə tsu nghee u loʼnə tii.

²⁵Wù wey tə kee tɔʼ laalə nyi tsunə ghəə ghə tə̀ laŋ kən kə bəghəshiənə ghə̂ ghə diinə, təmi taw tsu kə tii ni ghəŋŋə ndow ghəə ghey tə zownə nə̀ tə neyzəə way, Zə̀ kə i buulə wi n ghəə ghey tə ghəə ghey tə ghəŋŋənə.

²⁶Wù wey tə moʼlənə nə̀ i ghəŋŋə ghəə ghey a kpiilənə n sə K-a-zə̀ nə̀ tə way ni kəmə naŋa dzuu i wi, tə maŋa nəbə wû u wi, ghəə a Kəzə̀ a wi a tii ghə u maŋ loʼnə kənunu.

²⁷Ghəə a Kəzə̀ ghən a zow dzɔbənə loʼ soʼo tsətsəghə n sə kə Bày saa wən tə loʼnə Zə̀ kə, loʼ ni laalə tə waa a chi ghə nsə ghey a kpusə ghə n chɔd mən ghə khənə. À loʼ soʼo ni ghəŋə nə̀ kə ghəə a mbi a nə dzəələnə muu i ghaa zə.