Read Weh 1 Jɔn 5 Bible Online

1 Jɔn 5 - Weh bible

1 Jɔn 5

¹Wù wey tə bəghəmnə nə̀ Yeso loʼ wù wən Zə̀ kə â dza naŋa nə̀ i tûm bənu, tə loʼ waa Kəzə̀. Wù wey tə ləghənə bày, ləghə soʼonu waa wi.

²Jìi zey saa keelinə tii nə saa ləghənu waa a Kəzə̀ ghə, loʼ ni ləghə Zə̀ kə, naŋŋə soʼo laŋ u wi.

³Ni ndzəmə ləghə Zə̀ kə, loʼ ni naŋŋə laŋ u wi wə. Laŋ u tii wə a loʼ nə u taw way ni naŋa.

⁴Wù ghaa wə tə loʼnə waa Zə̀ kə, tə təmə zəənu ghə̂ a mbi ghə. Jìi zey saa təmə zəənə ghə̂ a mbi ghən tii loʼ n bam i bəghəm i fə̀ŋ i saa.

⁵A kəm loʼ ndee tə loʼ ni təm zə ghə̂ a mbi ghən, nə̀ a way wù wey tə bəghəmnə nə̀ Yeso loʼ waa Kəzə̀ ə?

⁶Yeso Klisto wən tə â dii bənə wû u wi wə nə̀ tə loʼ waa Kəzə̀, tə â ney mmuu n Kəzə̀ nə mmuu, fəələ soʼo kaŋ tə wi n tow u saa. Â way dzə kə n mmuu n Kəzə̀ mən tə â neynə nə mmuu, tə â fəələ soʼo kaŋ tə wi n tow u saa. Zay kə Zow kə n tiilə dza bə nə̀ a loʼ isəŋə, n təŋkey, Zay kə Zow kə taw dza tsə isəŋə.

⁷Sey, ghəə a loʼ atəghə a gaamənə saa nə̀ saa keeli isəŋə kuum Yeso.

⁸Ghəə a tii ghə atəghə a loʼ, Zay kə Zow kə, mmuu n Kəzə̀ mən Yeso â neynə nə mmuu, nsə kaŋ tən tə â fəələnə n tow u saa. Ghəə a tii ghə atəghə, a loʼ kə nə kəfə kəmɔʼ.

⁹Saa bəghəmənu təmi tiilə i wù sɔŋtsuʼ zə loʼ sey nə̀ təmi tiilə i Kəzə̀ i kee tsəghəshinu i wù sɔŋtsuʼ zə. Ghəə ghey Zə̀ kə tiilə dza bənə bòʼ Waa wi loʼ isəŋə.

¹⁰Wù wey tə bəghəmnə nə̀ tə loʼ Waa Kəzə̀, sey khənu n fə̀ŋ ə wi nə̀ ghəə ghən Zə̀ kə tiilə dza bənə kuum waa wi loʼ isəŋə. Wù wey tə ka bəghəm tə Zə̀ kə, loʼ wù badla wə aghəə wə, bòʼ nə̀, tə ka bəghəm dzə ghəə ghən Zə̀ kə tiilə dza bənə kuum waa wi.

¹¹Təmi tiilə i tii i loʼ nə̀, Zə̀ kə n fuu saa n muu zə itsali zə, muu i tii zə a loʼ n bam i Waa wi.

¹²Sey, wù wey tə loʼnə nə kəfə kəmɔʼ ghi waa, sey khə muu zə itsali, wù wey tə khə way waa Kəzə̀, sey khə way muu zə itsali zə.

¹³N tɔ̀ɔ bə ghəə ghən tə ghaa ghən ghaa bəghəmnə zəd i waa Kəzə̀ nə̀ ghaa keeli tsu nə̀ ghaa i keelinu muu zə itsali zə.

¹⁴Ghey tsəŋə way abə ghey gɔŋŋənə tə Zə̀ kə, n təŋkey ghey khənu nə̀ tə i zownu ghey abə ghey nɔɔnə fə kə ghaa kə tə wi, kə loʼnə n ji zey tə ləghənə.

¹⁵Nghee saa khənə nə̀ tə i zownu saa abə saa nɔɔ kə kee kə n wɔ wi, saa khə tən n fə̀ŋ tə saa nə̀ tə i fuunu fə key saa nɔɔnə n wɔ wi.

¹⁶Abə wə koʼ waazu ghəŋŋə bəəbənə ghəə zə n jìi zey zə i sìi ndow way wi nə ivə, wə n gɔŋŋə nə̀ Zə̀ kə fuu wi n muu zə, bòʼ bəb i wi zey i way ni wey wù. Ghɔɔmə zən loʼ tə̀ ghə̂ ghey ghə ghəŋŋənə bəb zey i way ni ghəŋə nə̀ wù kpu. Bəb i loʼ i loʼnu ni ghəŋə nə̀ wù kpu, n kee dza dzə way nə̀ ghaa khə ni gɔŋŋə n ndzoʼo bəb i tii zə.

¹⁷Ghəə ghey wù ghəŋŋə bəəbənə adzəm loʼ ibəb tə̀ Zə̀ kə, à kee loʼ nə̀ bəb i loʼ i loʼnu i ney ndow way wù nə ivə.

¹⁸Ghey khənu nə̀ waa Kəzə̀ u loʼ u way dzə ni tsəghə ndow n sə kə ni ghəŋŋə ghəə a bəbə ghə, n təŋkey, waa Kəzə̀ keyyə wi, vəətsəə ghə way soʼo ni mɔm wi.

¹⁹Ghey khənu nə̀ ghey loʼ waa a Kəzə̀, ghey khə soʼonu nə̀ mbi idzəm loʼ n tənə wù təngəmə ə Klisto tɔŋɔ Satan.

²⁰Ghey khənu nə̀ waa Kəzə̀ n bə, tə u fuunə ghey n zowkeeli zə, nə̀ ghey keeli Zə̀ kən kə loʼ nə isəŋə. Saa loʼ nə kəfə kəmɔʼ ghi Zə̀ kən kə loʼnə isəŋə nghee saa loʼnə nə kəfə kəmɔʼ ghi waa wi Yeso Klisto. À wən loʼ Zə̀ kən kə loʼnə isəŋə kə fuu soʼonə saa n muu zə itsali zə.

²¹Waa ghuŋ a dzuŋu ghə, kə ghaa nə keelinə ghə i loʼ zə ni ghəŋə ghi muʼu mə.