Read Weh Chi dii 12 Bible Online

Chi dii 12 - Weh bible

Chi dii 12

¹Jim wə n bə kpiʼi mə. N jim u tii wə, mə n koʼ ndow tsəə i nii i loʼ zə i shi bənə idəŋ. Weyzən u loʼ wə n loʼ fu nə̀ tə dzəŋə keeli təndzə̂ nə uwû tə nyəllə tə a loʼ inyi, ndzɔŋ n loʼ n tənə fuu i wi, tə n dzəŋə keeli taŋŋə kə fɔɔ, kə khənə səghəbələ mə ighəm n ghii mə nbəghə n tow kə wi.

²Tə â suu loʼ kə n ghəə a jiə ghə. Tə n zow ifɔɔbə nghee tə soʼonə waa. Fɔɔbə i tii zə n ghəŋə wi, tə n dey shiə kɔʼɔ.

³Tsəə i faalə i loʼ zə n kəm shi kpiʼi bə n bikighow. Mə n koʼ ndow faŋkwu kə baŋabaŋa kə ngəm kə loʼ kə, kə khənə tow wə usəghəmbəghə nsə ndɔŋ tə ighəm nsə taŋŋə kə fɔɔ n tow u tii usəghəmbəghə.

⁴Zə n ney kɔʼ kuu u wi kàŋŋə bə nsəghəbələ n bikighow nə kəbad kəmɔʼ nə tədzawwə tətəghə tə loʼnə ighələ, maʼa tsu bə aghəlitsə. Ngəm zey n təmi tsu n sə kə weyzən wey, ləmmə nə̀ tə ji tsu, tə̀ tə ney fə waa wi.

⁵Sey, tə n ji tsu waa u num wə tə i saʼa naʼa tə tədzəm n wɔɔ a taw ghə. Ghə n daŋŋə bəkeeli nuu kɔʼ waa tii, ney ndow tə Zə̀ kə, doʼlə naŋa tsu wi n kuu kə fɔɔ kə wi.

⁶Weyzən wey n tyi nuu ndow n mbvən ə ntsaŋ, n luʼu kə loʼ kə Zə̀ kə â bayyə naŋanə tə wi, nə̀ ghə i laalə tə wi fu nə ntsuʼu kam nsə bɔm mə nbəghə nsə ghəm mə ntuubə (1,260).

⁷Tsam n daŋŋə bwu fəə tsu idəŋ. Tsəndəghə Kəzə̀ i nii zey ghə tɔŋŋə nə̀ à loʼ Maykel ghi tsətəndəghə tə wi tə təm tsam ghi ngəm zey, ngəm i tii zə nsə tsətəndəghə tə wi tə soʼo n zùu ballə ghi ghə.

⁸Ghə n kee təm zə kɔʼ ngəm zey. Sey, wi ghi tsətəndəghə tə wi tə n way ni kəm muu idəŋ.

⁹Ghə n tən maʼa shi tsu ndow faŋkwu kə ngəm key. À wən loʼ zuu i wey wey zən zə â loʼnə nə nzeyyə, ghə tɔŋŋə nə̀ à loʼ Avəətsəə nkee Satan. À loʼ wi tə â sii ndzəŋnə mbi idzəm. Ghə n tən maʼa shi tsu bə wi fa a ghəlitsə, tən maʼa tsu bə soʼo tsətəndəghə tə wi ghi wi.

¹⁰Mə n daŋŋə zow ndow dzə̀ i taw zə idəŋ i dzanə nə̀, “Nyisa, Zə̀ kə n bə ni bəghəshi ghə̂ a wi! Nyisa, Zə̀ kə n dii daʼa kə wi kə tə a loʼ kədə̀ŋ! Nyisa wù wey tə â dza naŋa nə̀ i tûm bənu n dii daʼa key tə khənə, N təŋkey, vəətsəə ghey ghə â teynə n sə kə Zə̀ kə saa, sɔʼɔ zeeli kəwɔɔ tə̀ waazə a saa ghə n tsə tə nsə n tsuʼu tə, Ghə n tən maʼa shi wi idəŋ.

¹¹Ghə â təm zə̂ wi n kaŋ tə Waa Nji tən ghə â fəələnə n zat kə fəkaʼ nsə nə isəŋə zən ghə â naʼlənə, dii tsu nə̀ ghə â tsəmə ləghənu ni fuu nuu muu i ghə, abə à buʼ loʼ kə ni kpu daŋŋə.

¹²Sey, ghaa ghən ghaa loʼnə idəŋ ghaa khə ni duʼlə, ghaa ghən adzəm ghaa muunə tii, khə ni duʼlə soʼo! À kee loʼ nə̀ ngoʼ i faalə i loʼ tə̀ ghə̂ ghən ghə muunə a ghəlitsə nsə ghə̂ ghən ghə muunə n nali kə dzuu, n təŋkey, vəətsəə ghə n tsu bə fu ghi bəbə bəbə kə nəghə fəə wə n təŋkey tə khənu nə̀ nəŋə i wi zə n shɔd.”

¹³Ambə ngəm zey koʼ tsu nə̀ ghə n wi tən maʼa tsu bə aghəlitsə, tə n dzûmə ndow weyzən wey tə â jinə waa u num wey.

¹⁴Ghə n fuu ndow weyzən wey n ghaw tə nnən fə nii fən ghə tɔŋŋə nə̀ a loʼ boʼo tûm təbəghə, nə̀ tə zəghə nuu ndow n luʼu key ghə bayyə naŋa tə wi n mbvən ə ntsaŋ. À loʼ fuu ghə i laalənə tə wi nə tənum tətəghə nsə bòʼ kə, ni ghəŋə nə̀ kə ngəm zey nə mɔmnə wi.

¹⁵Ngəm zey n bwaa shi bə mmuu n dzuu i wi tə a loʼ dzuu n baa weyzən wey, nə̀ n kuŋŋə maʼa ndow weyzən wey.

¹⁶Ghəlikətsə kə kee gaamə kɔʼ weyzən wey. Ghəlitsə kə n chi kɔʼ dzuu i wi mə̂ nuu ndow mmuu mey ngəm zey â tsə shi bə n dzuu i wi.

¹⁷Sey ngəm zey n fəələ nay ndow unəghə ghi weyzən wey, nuu ndow ni ndow ballə ghi waa a waa a wi ghən ghə doʼo səənə, ghə̂ ghey adzəm ghə naŋŋənə laŋ u Kəzə̀ wə, nsə ghə̂ ghey ghə gaʼnə fə̀ŋ nə isəŋə zən Yeso â chi dii bənə.

¹⁸[Ngəm zey n təmi tsu n nguŋ ə nali kə dzuu.][3]