Read Weh Chi dii 16 Bible Online

Chi dii 16 - Weh bible

Chi dii 16

¹Mə n daŋŋə zow ndow dzə̀ i taw zə i ghɔɔmə ndownə tə̀ tsətəndəghə tə Kəzə̀ tey təsəghəmbəghə nə̀ i shiə bə n ndaw Kəzə̀ i nii zey idəŋ. Zə n dzə nə̀, “Ndow feeli maʼa shi tsu ndow bɔm tey təsəghəmbəghə, nəghə u Kəzə̀ u fəə u loʼnə tii n ghəlikətsə!”

²Tsəndəghə Kəzə̀ u sə isə zey n ndow feeli maʼa ndow bɔm ə wi n ghəlikətsə. Faalə tə nsəghə nə tə fɔɔbə n bənnə shi kɔʼ n kow ghə̂ ghey ghə a khənə tsə̀ə faalə kə nyam mbvən key nsə n kow ghə̂ ghey ghə â ngɔɔmə muʼu fey fə fiilənə wi.

³Tsəndəghə Kəzə̀ zey nə ulii ubəghə n feeli maʼa ndow bɔm wi n nali kə dzuu. Mmuu mey n nali kə dzuu kə tii kə n doʼo bə tə a loʼ kaŋ tə wù kpuu, fə wey udzəm u loʼnə utaw fu tii n dzuu n kpu tsu soʼo.

⁴Tsəndəghə Kəzə̀ zey nə ulii utəghə n feeli maʼa ndow bɔm wi nə tədzuu nsə tɔŋ n tədzuu. Dzuu tə tii tə nsə tɔŋ n tədzuu n tii mə n fəd kɔʼ təkaŋ.

⁵Mə n zow ndow tsəndəghə Kəzə̀ zey i laalənə dzuu tə dza tsunə nə̀, “Ohooo wù zow wə, wɔ wən wə â loʼnə nə nzeyyə, wə loʼ soʼonə nya, Jìi zey wə saʼnə tii, wə n saʼ dzɔb

⁶Ghə n fəələ kaŋ tə ghə̂ zow ghə nsə tûm tə Kəzə̀ tə, Sey wə u fuunə ghə n kaŋ tə nə̀ ghə mə̂ nghee tə i kpiinə tə ghə.”

⁷Mə n zow nghee tsə zey ghə fəələnə maʼlə wə tii beeli kɔʼnə nə̀, “Mûkəbii Zə̀ kə, wə khə udaʼa udzəm, Wə saʼa ghəə ghə n jìi zey i kpiilənə, dza soʼo isəŋə nəŋə tədzəm.”

⁸Tsəndəghə Kəzə̀ zey nə ulii ukaykə n feeli maʼa shi ndow bɔm wi n kow inyi, ghə n zəghə inyi nə̀ i zuʼ maʼa kɔʼ aghə̂ nə uvələ.

⁹Ghə n fə kɔʼ n faalə faalə kə zuʼ kə num kən. Sey ghə n zey ndow ni tsayyə zəd i Zə̀ kən kə khənə daʼa kə n kow zəŋ tən, ghə kee tuu tən ni kwey nuu bə fə̀ŋ tə ghə n ghəə a bəbə ghə, tuu soʼo ni kɔʼlə wi.

¹⁰Tsəndəghə Kəzə̀ zey nə ulii utaa n feeli maʼa shi ndow bɔm wi n kuu kə fɔɔ kə faalə kə nyam mbvən key, ləm kə n bwu tsu n fɔɔ u wi. Ghə̂ ghə num faalə kənyim bòʼ fɔɔbə zey ghə â zownə.

¹¹Ghə n tsɔɔmə Zə̀ kə idəŋ kə, n fɔɔbə zey ghə â zownə nsə səghə ghə mey n kow ghə. Ghə n kee tuu tən ni kwey fə̀ŋ tə ghə n ghəə a bəbə ghey ghə â ghəŋŋənə.

¹²Tsəndəghə Kəzə̀ zey nə ulii utuubə n feeli maʼa ndow bɔm wi n dzuu i nii zey ghə tɔŋŋə Yufred, mmuu mey fu n daŋŋə zum nuu kɔʼ ni bayyə naŋa jii tə̀ də̀ŋ wən ghə bəghənə n bad key nyi i shiə kɔʼɔ bənə tii.

¹³Mə n koʼ ndow zay bwu wə utəghə u loʼ tə a loʼ utsam. Wə n shiə bə n dzuu i ngəm zey, n dzuu i faalə kə nyam mbvən key nsə dzuu i tûm tə Kəzə̀ tə tsɔŋɔ tey.

¹⁴Ghə loʼ zay wə avəətsəə wən ghə ghəŋŋənə ghəə a fənnə ghə. Zay wən utəghə shiə ndow ni ndow koʼ udəŋ udzəm n mbi, ni zuŋŋə naŋa bə ghə nə̀ ghə i zuu ballə Zə̀ kən kə khənə daʼa wə udzəm n tsuʼ fey mbi i maynə tii.

¹⁵Mûkəbii n dza nə̀, “Koʼo, n bəghə tə a loʼ wù tsɔŋɔ! Zə̀ kə i buulə wù wən tə i bweeli way, tə i loʼ tən soʼonə n ndzə̂ tə wi tə nə uwû, sey nə̀ kə tə i bwey kaabə n wû u zum wə, kə tow kə i dəd soʼo wi nə̀ tə loʼ ghi wuŋ wə bii.”

¹⁶Zay u bwu wey n daŋŋə zuŋŋə naŋa bə də̀ŋ wey n luʼu kə loʼ kə ghə tɔŋŋə n ghɔɔmə Hibru nə̀ a loʼ Amagədɔn.

¹⁷Tsəndəghə Kəzə̀ zey nə ulii usəghəmbəghə n feeli maʼa kɔʼ ndow bɔm wi idəŋ. Dzə̀ i taw zə n shi bə n kuu kə fɔɔ key ndaw Kəzə̀ i nii zə idəŋ. Zə n dza nə̀, “Mə n mayyə ghəə ghə adzəm!”

¹⁸Ghow zə mualə, kwɔɔ, kəmmə, ghəlikətsə kə n noʼlə soʼo nə kədaʼa. Ghəlikətsə kə ka kam noʼlə koʼ tsə sey ni ney nuu bə tə ghə â bɔmnə wù sɔŋtsuʼ fa n mbi. Jìi zey ghəlitsə kə â noʼlənə tii a ngii faalənu.

¹⁹Naʼ i nii zey n dzawwə doʼo tsu nə ubad utəghə, ghə n saʼa maʼa tsu soʼo luʼu tə nii tə nə tənaʼa tədzəm. Zə̀ kə n moʼlə bə Babilɔn u nii wey, ghəŋə tsu nə̀ tə mə̂ nlə n wɔɔ wi. N wɔɔ tii, â luu doʼo tən kə nlə mey n loʼnə nəghə u wi u fəə wə.

²⁰Naʼa tey dzuu dzəŋ ngəə kɔʼnə n saŋ nuu i tsu, ghə n way ni kəm koʼ soʼo kaʼa tə nii tə.

²¹Tətay n nii nii mə n tsɔʼlə tsu idəŋ n kow ghə̂ ghə nə̀ fəmɔʼ fə dədlə tə a loʼ mbəghə kə asəb. Zəŋ i tətay mən n ghəŋə nə̀ ghə kaʼ ni tsɔɔmə Kəzə̀ n təŋkey tətay n tii mə â ngii faalənu.