Read Weh Chi dii 2 Bible Online

Chi dii 2 - Weh bible

Chi dii 2

¹Yeso Klisto n dza bə soʼo tə mə nə̀, “Tɔ̀ɔ tsu tə tsəndəghə ə Kəzə̀ zey i keyyənə dzəŋi kə dzûmə tə Klisto key n Efesus nə̀, wù wey tə khənə səghəbələ mə nsəghəmbəghə n wɔɔ kə wi kə zəə kə, bwey soʼo n fəŋŋə kə nyəllə u kədaa wən usəghəmbəghə nə̀ ghə faalə nə itsàa, dza nə̀,

²n khə maynu ghəə ghey wə loʼ nə̀ wə n ghəŋə. N khənu nghee tə wə kuunə səŋ zə a tii ni fwaʼ nsə nghee wə kownə fə̀ŋ tii. N khənu nə̀ wə way ni bəghəm naŋa ghə̂ ghey ghə ghəŋŋənə ghəə a bəbə ghə. N khə soʼonu nə̀ wə n mɔm koʼ ghə̂ ghən ghə tɔŋŋə wû i ghə zə nə̀ à loʼ ngəd tə Yeso loʼ sey nə̀ ghə way dzə, wə u keeli tsu nə̀ ghə loʼ ghə̂ a badla ghə aghəə ghə.

³N khənu nə̀ wə mâ ngii fəghə, kow soʼo fə̀ŋ bòʼ mə, wə n ka kam tsəm buu doʼo koʼ.

⁴À kee loʼ nə̀ ghə i loʼ i loʼnu wə ghəŋŋənə nə̀ n ləghə way. Ghə i tii i loʼ nə̀, wə kəm ləghə way mə nya tə̀ wə â buʼu ləghənə, ləghə soʼo way wû i ghaa zə.

⁵Moʼlə tsu nghee wə â buʼ loʼ tsə tii tə̀ wɔ ni bə bwu khə̂mə. Kweyyə nuu bə fə̀ŋ zə n ghəə a bəbə ghey ghaa ghəŋŋənə, wə i ghəŋŋə ndow ghəə ghey wə â buʼu ghəŋŋə tsənə. Nə̀ à way sey, mə i bə ney nuu kɔʼ nyəllə kə kədaa kə key n bənə kə wi.

⁶Wə kee khənu ghə i dzuŋu i loʼ zə wə ghəŋŋənə. Wə baa ghəə ghey dzûmə tə Nikolus tə ghəŋŋənə, ighələ tə n baa soʼonə.

⁷Wù wey tə khənə tuŋŋə wə, tə zow ghəə ghey Zay kə Zow kə dzanə tə dzəŋi u dzûmə tə Klisto wən. Mə i fuu tsu kədaʼa tə̀ ghə̂ ghey ghə i taw tsəghəshiənə ghəə a bəbə ghə, ghə i kɔy nəghə tam wə n kaʼ fey fə fuunə muu zə, fə loʼnə n sum u Kəzə̀ idəŋ.”

⁸Yeso n dza bə tə̀ mə nə̀, “Tɔ̀ɔ tsu tə tsəndəghə ə Kəzə̀ zey i keyyənə dzəŋi kə dzûmə tə Klisto key n naʼ i Smayna nə̀, wù wey tə loʼnə sə kə loʼ soʼo wù ibam, tə wey tə â kpunə, kəm doʼo dzəŋŋə bə utaw, dza nə̀,

⁹n khənu chɔd wə wə̀ nsə nghee wə laanə tii loʼ sey nə̀ wə kee kuumnu n ghəə a Kəzə̀. N khənu ghəə a bəbə ghey ghə̂ ghən ghə tɔŋŋə wû i ghə zə nə̀ à loʼ ghə̂ a Təjuu loʼ sey nə̀ ghə way dzə dza kaabə tsənə n tow kə. À ndaw kədzəŋi ghə khə Satan.

¹⁰Kə wə i tsəŋ chɔd wən wə i bə keelinə. Wə ney ighə̂mə boʼnə Satan i kuu ghaa a loʼ ghə n ndaw tsaʼ ni mɔm koʼ ghaa, ghaa i fəghə nə ntsuʼu ighəm. Ghaa keeli tsu kə bəghəm i fə̀ŋ, abə a loʼ kə ivə, mə i fuu ghaa n muu i fəghə zə tə a loʼ kə naamə abə ghaa təm zə kɔʼ.

¹¹Wù wən tə khənə tuŋŋə wə, tə zow ghəə zey Zay kə Zow kə dzanə tə̀ dzəŋi u dzûmə tə Klisto tə. Wù wən tə təm zənə bəb zə, tə i kəm bə kpu way n bùʼ kə uvələ.”

¹²Yeso n dza kpiʼi bə tə̀ mə nə̀, “Tɔ̀ɔ ndow tə̀ tsəndəghə zey i keyyənə dzəŋi kə dzûmə tə Klisto key n naʼ i Pegamum nə̀, wù wey tə khənə kɔb zey i tɔbənə badla təbəghə, dza nə̀,

¹³N khənu luʼu key wə muunə tii. N khənu nə̀ wə muu n luʼu key Satan bəghə doʼonə tii. Wə təmi tən tsu kə n zəd zuŋ. Wə ka tuu maʼa dzə bəghəm i fə̀ŋ zən ghaa khənə n kow mə. N tsuʼu mən ghə â wey maʼanə Antipas wən tə â tɔʼ tiilə dzanə ghəə ghə bòʼ mə tə ghə̂ ghə n naʼ zə, wə n ka tsəm tuu maʼa mə.

¹⁴Sə fə aghəə fə loʼ fə loʼnu ghaa ghəŋŋənə nə̀ n ləghə way. Ghə̂ a loʼ a loʼnu n fəŋŋə kə ghaa ghə dzûmənə ghəə ghey Balam diinə. Balam â dii Balak nghee tə loʼ ni sìi ndzəŋ ghə̂ ghə Izree tii n ghəə a bəbə ghə, nə̀ tə nəəbə tsu ghə nə̀ ghə zə̂ fəzəə wən ghə fəələnə tə a loʼ umaʼlə tə muʼu mə, nsə nə ghə i ghəŋŋə ghəə a laŋŋə ghə.

¹⁵N jii i mɔʼɔ zə, ghaa khə soʼonu ghə̂ ghə, ghə dzûmənə ghəə ghən Nikolus â diinə.

¹⁶Ghaa khə ni kweyyə nuu bə fə̀ŋ tə ghaa n ghəə a bəbə ghən ghaa ghəŋŋənə. Nə a way sey, mə i maŋa bəghə n fəŋŋə kə ghaa, n zuu ballə ghi ghaa n kɔb zən i loʼnə n dzuu zuŋ.

¹⁷Wù wey tə khənə tuŋŋə wə, tə zow ghəə ghən Zay kə Zow kə dzanə tə dzəŋi u dzûmə tə Klisto wə. Wù wən tə i taw tsəghənə ghəə a bəbə ghə, mə i fuu ghə n fəzəə u loʼ wə ghə â nyi naŋanə, ghə tɔŋŋənə nə̀ a loʼ mana. Mə i fuu soʼo ghə n tay i fəmə zən ghə tɔ̀ɔ naŋanə zəd i fəghə zə tii, nə̀ wù loʼ khə way, nə̀ a khə kə wù wey tə i neynə tay i tii zə.”

¹⁸Yeso n dza bə tə̀ mə nə̀, “Tɔ̀ɔ ndow tə tsəndəghə ə Kəzə̀ zey i keyyənə dzəŋi kə dzûmə tə Klisto key n Tyatira nə̀, waa Kəzə̀ wən sə̂ a wi a baŋanə tə a loʼ uvəllə, fuu i wi zə u nyiəllənə tə a loʼ vuʼ kən ghə tsoʼlə tsunə, dza nə̀,

¹⁹N khənu ghəə ghey ghaa ghəŋŋənə, n khənu ləghə zey ghaa khənə n wû i ghaa, n khənu bəghəm i fə̀ŋ zey ghaa khənə n kow mə, khə fwaʼ kə ghaa, khə soʼo nghee ghaa kownə fə̀ŋ tii. N khənu nə̀ fwaʼ key ghaa fwaʼanə nya, tsəghəshinu kə key ghaa â buʼu fwaʼa tsənə.

²⁰À kee loʼ nə̀ ghə i loʼ i loʼnu ghaa ghəŋŋənə nə̀ n ləghə way. Ghə i tii i loʼ nə̀, ghaa ka buu naŋa weyzən wən ghə tɔŋŋə nə̀ à loʼ Jezebel, weyzən wən tə tɔŋŋə wû u wi wə nə tə loʼ wù tûm Kəzə̀, nə̀ ghəə ghey tə diinə sìi ndzəŋŋə ghə̂ a kəfwaʼ ghuŋ nə̀ ghə i ghəŋŋə ghəə a laŋŋə ghə, ghəŋŋə soʼo nə̀ ghə i zəə fəzəə wən u loʼ nə̀ ghə n fəələ tə a loʼ umaʼlə tə̀ muʼu mə.

²¹Mə n fuu wi n nəŋə zə nə̀ tə kweyyə nuu bə fə̀ŋ ə wi n ghəə a bəbə ghən tə ghəŋŋənə, à kee loʼ nə̀ tə ndɔm ləghə way ni zəghə maʼa ghəə a laŋŋə ghən tə ghəŋŋənə.

²²Sey, mə təm naŋŋə ndow wi n kay wə idzaŋ, n ghəŋə nə̀ tə fəghə, mwaŋ tə wi tey tə fəghə faalə soʼo. Mə i chɔdlɔ ghə, à may kə nə̀ ghə kwey nuu bənu n ghəə a bəbə ghən ghə â ghəŋŋənə ghi wi.

²³Mə i wey maʼa tsu soʼo ghə̂ ghey adzəm ghə neynə ghow kə ibwey kə wi kə. Dzəŋi u dzûmə tə Klisto udzəm i keeli tsu nə̀ à loʼ mə n khənə fə̀ŋ tə aghə̂ nsə moʼlə tə aghə̂ tə tədzəm. Ghə i keeli soʼo nə̀ mə i tsəə dzəŋŋə kə kay wù ghə n fə key kə kpiilənə ghi ghəə a wi a ghəŋŋə ghə.

²⁴Sey, n dzaa bə tə ghaa a loʼ ghey n Tyatira, tɔŋŋə ghaa ghən ghaa ka koʼ ney ghəə a bəbə a wi ghən tə diinə nsə ghəə ghə tɔŋŋə nə̀ à loʼ ghəə a Satan a nyiə doʼo ghə nə̀ kəm kuu kpiʼi dzə way fəm kə loʼ kə n kow ghaa.

²⁵N kee ləghə kə nə̀ ghaa bɔɔmə təmi taw tsu n bəghəm i fə̀ŋ i ghaa ni ndow kuum n nəŋə zey mə i bəghənə tii.

²⁶Wù wey tə i taw tsəghənə ghəə a bəbə ghə, kow tsu soʼo fə̀ŋ ni ghəŋə ghəə ghey n ləghənə ni ndow taa ndow, mə i fuu wi n daʼa kə ni saʼ naʼa tə tii tə.

²⁷Mə i fuu wi n daʼa kə mɔʼɔ key Bày wuŋ â fuunə tə̀ mə. Kə i kwu keeli ghə n wɔɔ a taw ghə, kə luʼlə maʼa ghə tə ghə nə luʼlə maʼanə tɔ̀ɔ tə itsaʼ tə.

²⁸Mə i fuu soʼo wi n səghəbələ fən fə shiə kɔʼɔ bənə n bələbələ tə.

²⁹Wù wey tə khənə tuŋŋə wə, tə zow ghəə zey Zay K-a-zə̀ kə dza tə dzəŋi u dzûmə tə Klisto wə.”