Read Weh Chi dii 20 Bible Online

Chi dii 20 - Weh bible

Chi dii 20

¹Mə n koʼ ndow tsəndəghə Kəzə̀ i shiə tsu bənə idəŋ, nə̀ tə khə chi kə fɔŋŋə k-a-bùʼ key kə kuʼu way, tə n kwu keeli soʼo tsaʼ i nii zə n wɔɔ.

²Tə n kwu kɔʼ ngəm zey, zuu i wey wey zey i loʼnə Vəətsəə ghə nkee Satan, kuum naŋa ndow wi n tsaʼ nə tənum kam.

³Tsəndəghə Kəzə̀ zey n ney maʼa nyi tsu ndow wi n fɔŋŋə k-a-bùʼ key kə kuʼu way fii naŋa kɔʼ dzuu i tii zə, nɔmi naŋa tən tsu soʼo, sey nə̀, kə tə nə kəm sìi ndəŋŋənə naʼa tə ni ndow kuum n nəŋə zey num tən kam i tsəghə tsunə. Abə num tə i tsəghə tsunə kam, ghə i teeli zìi zəghə tsu wi n kəmə fə inəŋə.

⁴Mə n koʼ ndow kuu wə udəŋ nə ghə̂ ghey ghə â doʼonə tii, ghə n fuu ghə n daʼa kə ni saʼ. Mə n koʼ ndow soʼo zay u ghə̂ ghən ghə â gboo tôw u ghə wə boʼnə ghə â tiilə dza aghəə bòʼ Yeso tiilə dza soʼo aghəə bòʼ ghɔɔmə i Kəzə̀. Mə n koʼ ndow soʼo ghə̂ ghey ghə â ka ngɔɔmə faalə kə nyam mbvən key, muʼu fey fə fiilənə wi, ka ney tsə̀ə faalə kə nyam mbvən key n kaʼ usə u ghə nkee n wɔɔ kə ghə. Ghə n doʼo bə utaw, saʼ soʼo tə a loʼ udəŋ ghi Klisto nə tənum kam.

⁵Ghə̂ â kpuu a loʼ ghən â ka doʼo bə dzə utaw ni ndow kuum n nəŋə zey num tən kam tsəghə nuu tsunə. À wən loʼ nəŋə i sə isə zə Zə̀ kə i zhəm nuu dzəŋŋə bənə ghə̂ ghə nə ivə.

⁶Zə̀ kə i ngii buulə ghə̂ ghən ghə i ney dzəŋinə ghə ghi ghə̂ a sə isə ghən Zə̀ kə i zhəm dzəŋŋə bənə ghə nə ivə, tə ney soʼo ghə nə̀ ghə loʼ ghə̂ a zow ghə. Və i zən i dzûmə ndow i sə isə zə, khə way daʼa kə n kow ghə. Ghə i fəd doʼo bə ghə fɔɔngili ghey ghə fwaʼanə tə Kəzə̀ nsə tə Klisto, ghə i saʼa ghi wi nə tənum kam.

⁷Abə num tən kam tsəghə nuu tsunə, ghə i chi zəghə tsu Satan n ndaw tsaʼ.

⁸Tə i nuu shi ndow ni sii ndzəŋ ghə̂ ghən ghə loʼnə n naʼa tən tə loʼnə n bow tə mbi tən təkaykə. Naʼa tə tii tə loʼ Gɔg nsə Magɔg. Tə i zuŋŋə naŋa bə soʼo ghə adzəm nə̀ ghə zuu tsam. Taŋ a ghə loʼ n ndəm tə a loʼ kəsəsay n nguŋ ə dzuu.

⁹Ghə n shi dzawwə naŋa kaabə ndow iwû nə təbadla tədzəm fa a ghəlitsə, dzəŋŋə naŋa kɔʼ bali u ghə̂ a Kəzə̀ nsə naʼa tey Zə̀ kə ləghənə. Vələ wə n kee shi tsu bə idəŋ ləŋi maʼa kɔʼ ghə.

¹⁰Ghə n ney maʼa nyi tsu ndow vəətsəə ghən ghə â sii ndzəŋ ghə n nyî zə uvələ wən u bəʼlə ghi sɔlfɔ. À loʼ fuu ghə a ney maʼa nyi tsu tsəghə dzənə faalə kə nyam mbvən key nsə tûm tə Kəzə̀ tə tsɔŋɔ tə. Ghə i chɔdlɔ ghə fu n tsə̂ tə nsə n tsuʼu tə, nəŋə tədzəm.

¹¹Mə n daŋŋə koʼ ndow kuu kə fɔɔ kə nii nii kə fəmə kə nsə wù wey tə doʼnə tii. Ghəlikətsə nsə dəŋ kə n tyi nuu tsu n luʼu key tə loʼnə tii, bùʼ kə n kəm way fu tə ghə.

¹²Mə n koʼ ndow ghə̂ a kpuu ghə, ghə̂ a səŋi ghə nsə ghə̂ ghən ghə way ghə̂ a səŋi ghə, ghə teynə n sə kə kuu kə fɔɔ key. Ghə n chiələ umàʼlə, bə chi kɔʼ kə loʼ kə nə à loʼ màʼlə ghə tɔ̀ɔ naŋanə zəd a ghə̂ ghey ghə i keelinə muu zə itsali zə a tii. Ghə i saʼa ghə a kpuu ghə n ghəə ghən ghə â ghəŋənə tə i tɔ̀ɔ doʼnə n màʼlə u tii wə.

¹³Nali kə dzuu kə n tən naŋa shi kɔʼ bə ghə̂ a kpuu ghey ghə â loʼnə tii a bii. Ivə nsə naʼ zə ivə zə n zəghə maʼa shi kɔʼ bə soʼo ghə̂ a kpuu ghey ghə â loʼnə fu. Zə̀ kə n saʼa ghə adzəm n ghəə ghən ghə â ghəŋənə

¹⁴Ghə n daŋŋə ney maʼa nyi tsu ivə nsə naʼ zə ivə zə n nyî zə uvələ. Nyî zə uvələ zən loʼ və i zən i dzûmə ndow və i sə isə zə.

¹⁵Wù wey zəd i wi zə â way n màʼlə key ghə tɔ̀ɔ naŋanə zəd a ghə̂ ghey ghə i keelinə muu zə itsali zə, ghə n ney maʼa nyi tsu ndow ghə n nyî zə uvələ.