Read Weh Chi dii 22 Bible Online

Chi dii 22 - Weh bible

Chi dii 22

¹Tsəndəghə Kəzə̀ zey n dii bə mə n dzuu zey i khənə mmuu mey n fuunə muu zə. Dzuu i tii n nyiəllə tə a loʼ tay mən n ngii kwɔɔnə wən zə ghə tɔŋŋə nə̀ a loʼ krista nə i kuŋu shiə bə kuu kə fɔɔ K-a-zə̀ nsə Waa Nji zey.

²Dzuu tii n kuŋu tsəghə tsu ndow n fə̀ŋ ə jii inaʼ. Kaʼ mən n fuunə muu zə n loʼ n nguŋə tə dzuu tii. Kaʼ n tii mə n məə utam tənəŋə ighəm nsə ghii tə təbəghə nə kənum, dii tsu nə̀ mə â məə inəŋə imɔʼ n ndzɔŋ. Fəbə tə kaʼ n tii mə n loʼ utey ni baŋŋə dzaŋa tə aghə̂ tə nə tənaʼa tədzəm.

³Fə kə loʼ kə nə doʼo koʼ way fu inaʼ nə̀ Zə̀ kə n ləŋ naŋa. Kuu kə fɔɔ K-a-zə̀ nsə kə Waa Nji kə i loʼ fu n naʼ i tii. A loʼ fu ghə̂ a kəfwaʼ a wi ghə i ngɔɔmənə wi.

⁴Ghə nə koʼo tûm usə u wi ghə nə tɔ̀ɔ naŋa tsu soʼo zəd i wi n tûm n təsə n ghə.

⁵Ləm kə nə kəm doʼo koʼ way, daa kə nə kəm khə way fwaʼ kə loʼ kə nkee tsə̀ n təŋkey Mûkəbii tə loʼnə Zə̀ kə, i loʼ daa kə ghə, ghə nə saʼ tə a loʼ udəŋ nə tənəŋə tədzəm.

⁶Tsəndəghə Kəzə̀ zey n dza bə tə mə nə̀, “Ghɔɔmə zən loʼ ghɔɔmə zən ghə̂ a loʼ gaʼ fə̀ŋ tii, zə a loʼ soʼo isəŋə. Mûkəbii, Zə̀ kən kə ghəŋŋənə nə̀ Zay kə wi kə dii ghəə ghə tə tûm tə Kəzə̀ tə. Tə n tûm bə tsəndəghə ə wi nə tə bə dii tə ghə̂ a kəfwaʼ a wi ghə, ghəə zey i khə ni teeli kuʼlə ney kəbənə.”

⁷Yeso dza nə̀, “Zow na! Mə i kuʼlə bəghənu! Zə̀ kə i buulə ghə̂ ghey ghə i dzûmənə ghɔɔmə zən ghə dza naŋa zeynə n màʼlə kən!”

⁸Mə Jɔn, mə n zow ghəə a tii ghə, koʼ ndow soʼo ghəə a tii ghə adzəm. Ambə n zow may tsunə, koʼ may tsu soʼo ghəə a tii ghə adzəm, mə n bwu ndow n tənə tsəndəghə Kəzə̀ zey zə â dii bənə ghəə ghən tə mə ni ngɔɔmə wi.

⁹Tə n fəd dza bə tə̀ mə nə̀, “Ka ghəŋə dzə sey! N loʼ soʼo wù kəfwaʼ tə a loʼ wɔ ghi waazə ghə ghə̀, ghə loʼnə tûm tə Kəzə̀ nsə ghi ghə̂ ghey adzəm ghə dzûmənə ghɔɔmə zən i loʼnə n màʼlə kən. Ngɔɔmə Zə̀ kə!”

¹⁰Tsəndəghə Kəzə̀ zey n dza bə tə̀ mə nə̀, “Kə wə i nyi naŋa ghɔɔmə zən ghə tɔ̀ɔ naŋa zey bənə n màlə kən, n təŋkey, nəŋə zey ghəə ghən adzəm khə ni ney kəbənə tii n shɔd.

¹¹Wù wey tə ləghə ni ghəŋŋə ghəə a bəbə ghə, tə ndow kə n sə kə ni ghəŋŋə ghəə a bəbə ghə. Wù wey tə ləghə ni ghəŋŋə ləbi tə aghəə tə, tə ndow kə n sə kə ni ghəŋŋə ləbi tə aghəə tə. Wù wey tə ləghə ni ghəŋŋə ghəə a dzuŋu ghə, tə khə ni teeli ndow kə n sə kə ni ghəŋŋə ghəə a dzuŋu ghə. Wù wey tə ləghə soʼonə ni ghəŋŋə ghəə a zow ghə, tə khə ni teeli ndow kə n sə kə ni ghəŋŋə ghəə a zow ghə.”

¹²Yeso dza nə̀, “Koʼo! Mə i kuʼlə bəghənu! N bəghənu n naamə kə, ni naamə kay wù nghee tə̀ tə fwaʼ kuumnə tii.

¹³N loʼ ney kəsə loʼ soʼo fii kəbam. A zey mə ghəə ghə adzəm, à guŋə soʼo mə ghəə ghə adzəm.”

¹⁴Zə̀ kə i buulə ghə̂ ghey ghə sow ndzə̂ tə ghə tə nə̀ tə i zow, ghə i khə daʼa kə ni zə tam wən u məə n kaʼ fey fə fuu muu zə nsə ni tsəghə nyi n fuʼ u mbàa u naʼ tii zə.

¹⁵Ghə̂ ghey ghə i kee nyi way fu inaʼ, loʼ ghə̂ ghey ghə ghəŋŋə ghəə a dzəə ghə nsə ghə̂ ghən ghə ghəŋŋə ghəə a fənnə ghə, ghə̂ ghey ghə ghəŋŋə ghə a laŋŋə ghə nsə ghə̂ ghey ghə weynə ghə̂ ghə, ghə̂ ghey ghə ngɔɔmə muʼu mə nsə ghə̂ ghey adzəm ghə ləghənə ni badla ghəə ghə n ghɔɔmə i ghə nsə n ghəə ghey ghə ghəŋŋənə.

¹⁶“Mə Yeso, mə n tûm bə tsəndəghə zuŋ nə tə bə naʼa bə ghəə ghən tə̀ ghaa n dzəŋi u dzûmə tə Klisto. N loʼ waa waa fɔɔ Devid, n loʼ səghəbələ fə n bələbələ tə fən fə nyiəllənə.”

¹⁷Zay kə Zow kə nsə wey Waa Nji zey dza nə̀, “Bəghə!” Wù wey tə zow ghəə ghən teeli khə ni dza soʼo nə̀, “Bəghə!” Wù wən fə̀ŋ ə mmuu zuʼlənə wi, tə bə. Wù wey tə ləghənə ni mə̂ mmuu mən n fuu muu zə nə̀ tə̀ ka tsə, tə bə mə̂.

¹⁸Mə Jɔn tɔʼɔ kii naŋŋə bə ghə̂ ghey adzəm, ghaa zownə zən ghə tɔ̀ɔ naŋa zeynə n màʼlə kən bòʼ ghəə ghey a khə ni ney kəbənə. Abə wù kuu kpiʼinə ghəə zə tii, Zə̀ kə i kuu kpii zəŋ tən ghə tiilənə fa n màʼlə kən n chɔd mey ghə khə ni fuu tə wi.

¹⁹Abə wù ney nuu shi kɔʼnə ghəə zə n ghɔɔmə zən ghə dza naŋa zeynə n màʼlə kən, Zə̀ kə i ney nuu tuʼ zey tə mə khə ni n tam wey u shiənə kaʼ fey fə fuunə muu zə tə ney nuu shi soʼo wi n naʼ i zow zey ghə tiilənə n màʼlə kən.

²⁰Wù wey tə tiilə dza bənə ghəə ghən, dza nə̀, “Ndzəm ndzəm! Mə i kuʼlə bəghənu!” Zə i loʼ kə sey. Bəghə a Mûkəbii Yeso!

²¹N gɔŋŋə nə̀, Mûkəbii Yeso dii fə̀ŋ ə wi i dzuŋu zə tə̀ ghə̂ a Kəzə̀ ghə adzəm.