Read Weri Maak 16 Bible Online

Maak 16 - Weri bible

Maak 16

¹Kë yesa akunet pet irën Maria Matala kakaanëpre Maria Semsë ëlëpre Salomiiringörö pit Yesuu sokurak kolap köp nga kamp ompyaut wa mëëpënëak sum ëak kopëta wesa.

²Pël ëak Sante ëlpam yewalën oröak kan kourak yesën këtëp apra.

³Pël ëën yangaö temanöm yewasem neneren epël mëëa. “Yangaöökë kanrakaan këlö talëpök wa pëlëër niwiipën?”

⁴Pël mëak itaangkën kël kësang pö wa pëlëër wieëa.

⁵Pël ëaan yangaöök ilëak itaangkën omp ulwas namp ulpëën kölam waliip mëaup yaapkëël wel aisëaan itenak yaan sa.

⁶Pël yaëën epël mëëa. “Yaan sëngan. Ar Yesu Nasaret kakaanëp yetaprak möaupön itaampunëak waisan. Pi eprek won wia. Yok wal ëa. Ur koseten iteneë.

⁷Ar së pim ruuröere Pitaan ök man. ‘Pi Kalili yangerakël arimëën wet rëak sëpënëak ök niiaup. Pörek së itaampun.’ ”

⁸Pël maan öngörö kas utpet ëak reireë urö yangaöökaan oröak kas pöömpö sa. Pël ëak kas panë ëën omnaröen ök nemaan ëa. Yesuuk Maria Matala kakaanëp ëö pet elmëa (Mat 28:9-10; <a href='B:500 20:11'>Son 20:11-18)

⁹[Yesu pi Santeetak ëlpam yewalën wal ëak wet rëak Maria Matala kakaanëp ngaan urmer 7 ëak waö ë momëa pöp ëö pet elmëa.

¹⁰Pël ëën së piiring wëaö muntarö ingre ya ilak aim wëën ök mëëa.

¹¹Pël ëën Yesu pi wal ëak wëën öngöp itena ngön pöten kat wiin kë won ëa. Yesuuk ru naarën ëö pet elmëa (Luk 24:13-35)

¹²Akun nentak ingre mor sauröakaan omën naar kak nerekë sëpënëak yesën kan kourak möönre koröp maim wak ëö pet elmëa.

¹³Pël elmëën piarip së ru muntaröen ök maan kat wiin tapël kë won ëa. Yesuuk ru 11 pöröen ëö pet elmëa (Mat 28:16-20; Luk 24:36-49; <a href='B:500 20:19'>Son 20:19-23)

¹⁴Ënëmak ru 11 pörö wa top ëak kaömp neim wëën ëö pet elmëa. Pël ëak wal ëak wëën itenauröak ök maan pitëm lupöt il wariak wëën kön wi kosang nemowasën ëa pötaan kos elmëa.

¹⁵Pël elmëak epël ök mëëa. “Ar yang ël epotë yesem omnaröa wëaul ngön ompyaut ök man.

¹⁶Kön wi kosang yewesautaring i mëëpnaap pi kutömweri yaö sëpnaap. Kön wi kosang yewesaut wonöp pi pöt es parëaöökëën yaö sëpnaap.

¹⁷Kön wi kosang yewesautaring öpnaarö nook weëre kosang mangkën retëng ke nentere nent epël ëëpnaarö. Nem yapintak urmerarö waö ë momëëpnaat. Ngön köngköm ngolöpöök apnaat.

¹⁸Kamalörö moröak mësël ëëpnaat. I nak wel yawiaut nëën utpet nemowaspan. Yauman yaauröa rangk pitëm moröt mowiin ompyaö sëpnaat.” Yesu kutömweri isa (Luk 24:50-53; Ngön 1:9-11)

¹⁹Aköp Yesu pi ngön pipël ök më pet irën Anutuuk wak kutömweri isa. Pörek së pim yaapkëëtakël wel aisëak wë.

²⁰Pël ëën pit kaare yang ël epotë pim ngönte aö sa. Pël yaëën Aköpök kaamök elmëak retëng nentere nent yaalmëem pim ngön yaaö pöt yaap pël pet elmëa.]