Read Weri Ipru 3 Bible Online

Ipru 3 - Weri bible

Ipru 3

¹Yesuuk kölam niwesa nem karurö, Anutu kutömweri wëaupök ar piiring önëak yas niiaurö. Ar Yesuun këëkë kön wieë. Pi Anutuuk wes mëën pim ngönte ök ëak kiri yaauta wotöök saupë ngönte tiarök ök yaaurö.

²Anutuuk pim omnaröa naë Mosesën ya ngön maan ya panë wesak mëna pöl Yesuukta tapël ëa.

³Kaat ök rëaupë yapintak kaata yapinte il yewas pöl Yesu Anutuu kaata pepapök Moses pim kaatak wëaup il mowesën omnaröak pim yapinte wak isak ya.

⁴Ka epot pout ök rëaup wë. Omnant poutë pepap Anutu.

⁵Moses pi Anutuuk ya ngön maan pim omnaröa naë inëën ya yamëngkem Anutu pim ënëmak apna pöta ngönte ök maima.

⁶Kristo Anutuu Ruup pi Anutuuk ya ngön maan ya panë wesak yamëngkem Anutuu omnarö ngarangk elnieim wë. Anutuu omën pörö tiar tapörö. Pöt pas won. Tiar kön kosang wieë pim yaö niia pötön kor öpena pöt pim omnarö pël apenaat. Israel omnarö lup kosang ëak Anutuu ngönte wa olëa

⁷Pötaanök Ngëëngk Pulöök ngön epël ëa pöt tiarimëën yes.“Ar peene Anutuu ngönte kat yawi eptak

⁸Israel omnaröa Anutu kasëng menak lup kosang ëa pöl ëëngan.Pit yang mopöök ima akun pötak pim ngönte wa olëak ökre was elmëeima.

⁹Arim ëarö pörek krismaki 40 pötë öngpök nem ya kosang mëneima pötön iteneëakköntak utpet elnë ökre was elnëeimaut.

¹⁰Pël ëën ne omën pöröen ya sangën ëën epël ëaut.‘Pitëm könöt nem pet yaalmëa pöl nawiin sa rëak yesaurö.Pit nem yaautön ëwat sëpnaaten kaaö yaaurö.’

¹¹Pöten kölöp elmëak ngön kosang wesak epël ëaut.‘Pit nem kaare yang kë yesaurek newaispan pan.’ ” Israel omnaröa Anutuu ngönte wa olëa pöl ëëngan

¹²Karurö, arim naëaan namp lupmeri kön utpetat wieë kön wi kosang newasën ëak Anutu wëwëap kasëng mengkanëën ngarangk këëkë ëeim ön.

¹³Pël ëak arim naëaan namp utpetatë moröktak elniin lup pu wariinganëën kët ël epotë neneren wa korkor ngön maim ön. Pël ëak ar neneren ngön ëak kat yawiem pöt, “Ngönëntak, ‘Peene,’ pël ëa pöl peene taptakëër ngön ngaarëk ömaat,” pël kön wieë ngaarëk weim ön.

¹⁴Tiarim wet rëak Kristoon kön wi kosang wesan pöl taë wes wak yesem weletak orööpena pötaan Kristooring lup kopëtemer sak wë.

¹⁵Pöta ngönte ngönëntak epël ëa.“Ar peene Anutuu ngönte kat wiak pötIsrael omnaröa pi kasëng mena pöl lup kosang ëëngan.”

¹⁶Pöt talöröak Anutuu ngönte kat wiak kasëng mena? Pöt maim naröak naën, Israel omën Mosesök Isëp yangerakaan mësak waisa tapöröak ëaut.

¹⁷Ma talöröaan Anutuuk krismaki 40 pötë öngpök ya sangën elmë ima? Pörö utpetat ë yesem yang mopöök wel wi won sa.

¹⁸Ma talöröaan pi kölöp elmëak ngön kosang wesak, “Pit nem kaare yang kë yesaurek newaispan,” pël ëa? Pöt pim ngönte wa olaima pöröaan ëa.

¹⁹Tiar pöten ityaangk. Pit Anutuun kön wi kosang newasën ëautaan pim kaare yang kë yesaurek neilaan ëa.