Read West Ambae MATIU 1 Bible Online

MATIU 1 - West Ambae bible

MATIU 1

¹Hika a uliuli huri na ratubu i Jisas Kraes*, a gwaloana lui Devit, hinea u gwalo vanamai lui Evraham.

²I Evraham i tama i Aesik, i Aesik i tama i Sekov, i Sekov i tama i Suta mai ratuana. [1]

³I Suta i tama i Peres mai Sera. I retahigaru i Tamara. I Peres i tama i Hesron, i Hesron i tama i Ram.

⁴I Ram i tama i Aminadav, i Aminadav i tama i Nason, i Nason i tama i Salmon.

⁵I Salmon i tama i Boas. I retahi i Boas i Rehav. I Boas i tama i Obet. I retahi i Obet i Rut. I Obet i tama i Sese,

⁶i Sese i tama i Devit a hugwe lakua. [2] I Devit i tama i Solomon. I retahi i Solomon aia a gwati i Uria tomua.

⁷I Solomon i tama i Rehoboam, i Rehoboam i tama i Avia, i Avia i tama i Asa.

⁸I Asa i tama i Sehosavat, i Sehosavat i tama i Soram, i Soram i tama i Usia.

⁹I Usia i tama i Sotam, i Sotam i tama i Ahas, i Ahas i tama i Hesekia.

¹⁰I Hesekia i tama i Manase, i Manase i tama i Amon, i Amon i tama i Sosaea.

¹¹I Sosaea i tama i Sehoeakin mai ratuana. Lo taro hi a ngwera Babilon ramo gui na gwaloana noi Isrel*, ramo lavira vaki Babilon.

¹²Takuni tiua hini ramo lavira vaki Babilon, i Sehoeakin i tama i Sealtiel, i Sealtiel i tama i Seruvavel.

¹³I Seruvavel i tama i Aviut, i Aviut i tama i Eliakim, i Eliakim i tama i Aso.

¹⁴I Aso i tama i Satok, i Satok i tama i Akim, i Akim i tama i Eliut.

¹⁵I Eliut i tama i Eleasara, i Eleasara i tama i Matan, i Matan i tama i Sekov.

¹⁶I Sekov i tama i Sosev. I Sosev i vavinehina i Meri, i retahi i Jisas. Vae i Jisas rau kwarekinia kwara i Vurae*.

¹⁷Mo tinakaki lui Evraham, u gwalo vakahangavulu dongwana kaivati vaki lui Devit. Vunu mote tinakaki lui Devit, u gwalo vakahangavulu dongwana kaivati vaki lo taro hi a ngwera Babilon ramo lavi na gwaloana noi Isrel vaki Babilon. Vunu takuni tiua, mote gwalo vakahangavulu dongwana kaivati taliku, mo hagwe i Vurae.

¹⁸A voraana noi Jisas Kraes* aia hokinia hika. I retahina i Meri, i Sosev u taubibia kwara ne laki maia, vae raru he hugu tabulutaki te radu nga, mo kikilai luna kwara u tatagwangira kina Tanungwe Kokona.

¹⁹A nona tangaloi i Sosev a tangaloi bakoto, he lengaia tea kwara ne vitia tivarea kwara ne vaia ne maemae. U domi kwara ne tiraki butubutukinia.

²⁰Vae mo toko domidomi luna radu nga, a kaihora nona Hugwe tina taetae mo maravuti kinia lolo boborea, mo kwaha maia mo viti “Sosev, gwaloana noi Devit. Hatu mataku kwara kona lavi Meri ki vavinehimu, huri u tatagwangira kina Tanungwe Kokona.

²¹Ne bava i natuna a ngwera, kona kwareki na hinana i Jisas*, a domianaki kwara a Kaivakahi, huri ne vakahiki na nona tangaloi tina noga hatiana.”

²²A kinau vunuhia hika u mule luna lo leoki hinea a tangaloi* duruduruki mo viti, vae hika u kworo, hinea a Hugwe i God mo viti

²³“A toka kokona ne tatagwangira ne bava na natu ngwera, rana kwareki na hinana i Emanuel.” A hina hi a domianaki kwara, “I God aia maikita.”

²⁴I Sosev mo rada tina maturua, mo vai luna hokinia hi a kaihora nona Hugwe tina taetae mo viti, mo lavi Meri ki vavinehina.

²⁵Vae he tiutokakivanua te maia radu nga tarisaki mo bava i natuna a ngwera. I Sosev mo kwareki na hinana i Jisas.